شۆەيتساريا قازاقستاننان زاڭسىز شىعارىلعان اكتيۆتەردى قايتارۋعا كومەكتەسەتىن بولدى

استانا. KAZINFORM - قازاقستان مەن شۆەيتساريا قىلمىستىق ىستەر بويىنشا ءوزارا قۇقىقتىق كومەك كورسەتۋ جانە زاڭسىز شىعارىلعان اكتيۆتەردى قايتارۋ تۋرالى كەلىسىمگە قول جەتكىزدى، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.

باسپاءسوز قىزمەتىنىڭ مالىمەتتەرىنە قاراعاندا، قازاقستاننىڭ باس پروكۋرورى بەرىك اسىلوۆتىڭ 2024 -جىلعى 5-قاراشادا بەرن قالاسىنا (شۆەيتساريا) جاساعان ساپارى بارىسىندا شۆەيتساريانىڭ باس پروكۋرورى شتەفان بلاتتلەرمەن جانە شۆەيتساريانىڭ فەدەرالدىق ادىلەت وفيسى ديرەكتورىنىڭ ورىنباسارى لورەنس فونتانا يۋنگومەن كەلىسسوزدەر جۇرگىزدى.

تاراپتار قىلمىستىق ىستەر بويىنشا حالىقارالىق قۇقىقتىق ىنتىماقتاستىقتىڭ جانە زاڭسىز اكتيۆتەردى قايتارۋدىڭ تەتىكتەرىنىڭ تيىمدىلىگىن ارتتىرۋدىڭ وزەكتى ماسەلەلەرىن تالقىلادى.

قاداعالاۋ ۆەدومستۆوسىنىڭ باسشىسى قازاقستان رەسپۋبليكاسىنىڭ پرەزيدەنتى ق. ك. توقايەۆ باستاعان رەفورمالار، 2023 -جىلعى شىلدەدە قابىلدانعان زاڭسىز شىعارىلعان اكتيۆتەردى مەملەكەتكە قايتارۋ تۋرالى زاڭ، قازاقستاننىڭ باس پروكۋراتۋرا جانىندا ءتيىستى كوميتەتتىڭ، سونداي-اق قايتارىلعان قاراجاتتى الەۋمەتتىك-ەكونوميكالىق ماڭىزدى جوبالاردى قارجىلاندىرۋ ءۇشىن بولەتىن ارنايى قوردىڭ قۇرىلۋى جانە 2022 -جىلدان بەرى قازاقستانعا 3,5 ميللياردتان استام دوللار قايتارىلعانى تۋرالى ايتتى.

قازاقستاننىڭ باس پروكۋرورى شەتەلدىك، سونىڭ ىشىندە شۆەيتساريالىق ينۆەستورلاردى قۇقىقتىق قورعاۋدىڭ ماڭىزدىلىعىن اتاپ ءوتىپ، بۇل ەكى ەل اراسىنداعى ەكونوميكالىق ىنتىماقتاستىقتى نىعايتۋعا ىقپال ەتەتىنىن جەتكىزدى.

باس پروكۋرور بلاتتلەر مەن ديرەكتوردىڭ ورىنباسارى فونتانا يۋنگو قازاقستانعا زاڭسىز شىعارىلعان اكتيۆتەردى قايتارۋ جانە حالىقارالىق ىنتىماقتاستىقتى ودان ءارى دامىتۋ ماسەلەلەرىندە قولداۋ كورسەتۋگە دايىن ەكەندىكتەرىن راستادى.

شۆەيتساريا ادىلەت باسقارماسىنىڭ وكىلدەرى قازاقستاننىڭ قىلمىستىق ىستەر بويىنشا ءوزارا قۇقىقتىق كومەك تۋرالى ەۋروپالىق كونۆەنتسياعا قوسىلۋعا دەگەن ۇمتىلىسىن قولدادى.

ساپاردىڭ قورىتىندىسى بويىنشا تاراپتار قىلمىستىق ىستەر بويىنشا ءوزارا قۇقىقتىق كومەك كورسەتۋ تۋرالى ءوزارا تۇسىنىستىك تۋرالى ۇكىمەتارالىق مەموراندۋمعا قول قويدى. قۇجاتقا قازاقستاننىڭ ۇكىمەتى اتىنان باس پروكۋرور، ال شۆەيتساريا ۇكىمەتى اتىنان فەدەرالدىق ادىلەت باسقارماسى ديرەكتورىنىڭ ورىنباسارى قول قويدى.

مەموراندۋم ەكى ەلدىڭ قىلمىستىق ىستەر بويىنشا دالەلدەمەلەر مەن اقپارات الماسۋ، سونىڭ ىشىندە زاڭسىز شىعارىلعان اكتيۆتەردى قايتارۋ راسىمدەرىن جەدەلدەتۋگە دەگەن ۇمتىلىسىن كورسەتەدى.