شىنجاڭدا پارتيا كوميتەتىنىڭ نەگىزگى باسشىسى اۋىستى

استانا. KAZINFORM - چەن چياوتسزيان قىتاي كوممۋنيستىك پارتياسى شىنجاڭ ۇيعىر اۆتونوميالىق رەگيوندىق كوميتەتىنىڭ حاتشىسى بولىپ تاعايىندالدى.

- ق ك پ و ك شەشىمىمەن، ما سينجۋي باسقا جۇمىسقا اۋىسۋىنا بايلانىستى ش ۇ ا ر پارتيا كوميتەتىنىڭ مۇشەسى، حاتشىسى قىزمەتىن قوسا اتقارمايدى. چەن سياوتسزيان ش ۇ ا ر پارتيا كوميتەتىنىڭ مۇشەسى، حاتشىسى بولىپ تاعايىندالدى، - دەلىنگەن شينحۋا اگەنتتىگى تاراتقان اقپاراتتا.

اشىق دەرەككوزدەن بەلگىلى بولعانداي، چەن سياوتسزيان 1962-جىلى تۋعان. 1984-جىلى ۋحان سۋ شارۋاشىلىعى جانە ەنەرگەتيكا ينستيتۋتىنان وقۋ ءبىتىرىپ، ۇزاق جىلدار بويى «قىتاي ەنەرگەتيكاسى» گازەتىنىڭ رەداكسياسىندا جانە سۋ شارۋاشىلىعى مينيسترلىگىنىڭ اپپاراتىندا جۇمىستا بولادى.

2015-جىلى ق ك پ ورتالىق تارتىپتىك تەكسەرىس كوميسسياسىنا جۇمىسقا اۋىسىپ، ۇگىت-ناسيحات ءبولىمىنىڭ جەتەكشىسى بولادى. 2016-جىلى لياونين پروۆينتسيالىق پارتيا كوميتەتى تۇراقتى كوميتەتىنىڭ مۇشەسى بولىپ تاعايىندالىپ، تارتىپتىك تەكسەرىس كوميسسيانىڭ جۇمىسىن باسقارادى.

2017-جىلى ق ح ر باقىلاۋ مينيسترلىگىنىڭ ۆيتسە-ءمينيسترى، ق ك پ ورتالىق تارتىپتىك تەكسەرىس كوميسسياسى ءتوراعاسىنىڭ ورىنباسارى بولىپ تاعايىندالادى. 2020-جىلى جەلتوقساننان كەيىن مەملەكەتتىك ۇلت ىستەرى كوميتەتتىڭ ءتوراعاسى، ق ك پ ورتالىق بىرىككەن مايدان ءبولىمى باسشىسىنىڭ ورىنباسارى، ءبىرىنشى ورىنباسارى قىزمەتتەرىن اتقارعان.

ايتا كەتەيىك، قىتايدا ب ق و كومپانيالارىنىڭ كەڭسەلەرى اشىلادى.