شينجاڭ 500 مىڭ باستان استام قازاق قويىن اسىلداندىردى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
تۇركيا حولدينگى قازاقستان اۋماعىندا قانت زاۋىتىن سالۋدى جوسپارلاۋدا - Eurasia Today
قازاقستان اۋماعىندا قانت زاۋىتىن سالۋ تاقىرىبى اۋىل شارۋاشىلىعى ءمينيسترى ايداربەك ساپاروۆ پەن تۇركيالىق Safi Holding كومپانياسىنىڭ باس اتقارۋشى ديرەكتورى سافي اتاكانمەن كەزدەسۋدە تالقىلاندى.
بۇل تۋرالى وسى اپتادا قىرعىزستاندا شىعاتىن Eurasia Today اقپارات اگەنتتىگى حابارلادى.
اتالعان ب ا ق-تىڭ كەلتىرگەن دەرەكتەرىنە سۇيەنسەك، تۇركياداعى ەڭ ءىرى ونەركاسىپتىك حولدينگتەردىڭ ءبىرى سانالاتىن Safi Holding قازاقستاندا جىلىنا 140 مىڭ تونناعا دەيىن قانت وندىرەتىن جوعارى تەحنولوگيالىق زاۋىت سالۋ جوباسىن جۇزەگە اسىرۋعا مۇددەلى. زاۋىتتىڭ قىزىلشا وڭدەۋ قۋاتى - 1 ميلليون توننا. جوبانىڭ بولجامدى ينۆەستيسيا كولەمى - 150- 200 ميلليون ا ق ش دوللارى.
قازىرگى ۋاقىتتا ينۆەستورلار زاۋىتتى ورنالاستىرۋ ءۇشىن قولايلى وڭىرلەردى قاراستىرۋدا. ورنالاساتىن ورىندى تاڭداۋداعى باستى فاكتورلار - قانت قىزىلشاسىن وسىرۋگە جارامدى ەگىستىك جەر كولەمىنىڭ جەتكىلىكتىلىگى جانە ينفراقۇرىلىممەن قامتاماسىز ەتىلۋى.
ق ر اۋىل شارۋاشىلىعى مينيسترلىگى جوبانى ىسكە اسىرۋ ءۇشىن تولىق قولداۋ كورسەتۋگە دايىن ەكەنىن، سونىڭ ىشىندە قولدانىستاعى زاڭناما اياسىندا مەملەكەتتىك قولداۋ شارالارىن ۇسىنۋعا ءازىر ەكەنىن راستادى.
قىرعىزستاننان 5,2 ميلليارد سۋمدىق التىن بۇيىمداردى زاڭسىز اكەلگەن ازامات ۇستالدى – ءوز ا
ءاندىجان جانە فەرعانا وبلىستارى بويىنشا مەملەكەتتىك قاۋىپسىزدىك قىزمەتى باسقارمالارىنىڭ قىزمەتكەرلەرى جۇرگىزگەن جەدەل شارا بارىسىندا قىرعىز رەسپۋبليكاسىنان وزبەكستان اۋماعىنا «ۆوديل اۆتو» شەكارا كەدەن بەكەتى ارقىلى وتپەك بولعان ءاندىجان قالاسىنىڭ 1992 -جىلى تۋعان تۇرعىنى ۇستالدى.
بەلگىلەنگەن تارتىپتە جۇرگىزىلگەن تەكسەرۋ ناتيجەسىندە، ازاماتتىڭ كيىمىنىڭ ىشىنە جاسىرىپ، زاڭسىز الىپ وتپەك بولعان 859 دانا زەرگەرلىك بۇيىم مەن 1 دانا قول ساعاتى تاركىلەندى، دەپ حابارلايدى «ءوز ا» اقپارات اگەنتتىگى.
اتالعان ب ا ق-تىڭ دەرەگىنشە، ساراپتاما قورىتىندىسى بويىنشا، اتالعان زەرگەرلىك بۇيىمداردىڭ حيميالىق قۇرامى - التىن، ال كەيبىرى بريلليانت تاستارمەن بەزەندىرىلگەن. زاتتاردىڭ تازا سالماعى - 4 كەلى 155 گ ر، ال جالپى نارىقتىق قۇنى - 5 ميلليارد 213 ميلليون سۋم دەپ باعالانعان.
تەرگەۋ بارىسىندا بەلگىلى بولعانداي، بۇل قىمبات اشەكەي بۇيىمداردى تۇركيادان قىرعىزستانعا جەتكىزگەن. ال كۇدىكتى ازامات ولاردى 400 اقش دوللارى كولەمىندەگى سىياقى ءۇشىن وزبەكستان اۋماعىنا شەكارا ارقىلى وتكىزىپ بەرمەك بولعان.
سونداي- اق وسى اپتادا «ءوز ا»-دا «تۇيە باعىپ جان باققان تورەحان» دەگەن تاقىرىپتاعى اقپارات جاريالاندى.
حابارلامادا ايتىلۋىنشا، قاراقالپاقستان رەسپۋبليكاسىنىڭ شوماناي اۋدانىنداعى «مامي» ەلدىمەكەنىندە تۇراتىن تورەحان مولداعاليەۆ ءومىرىن مال شارۋاشىلىعىنا ارناعان ناعىز ەڭبەك ادامى. ول كوپ جىلدان بەرى تۇيە وسىرۋمەن اينالىسىپ كەلەدى. قاراپايىم اۋىل تۇرعىنىنىڭ ەسىمى بۇگىندە اۋدان كولەمىندە عانا ەمەس، بۇكىل ارال ماڭىندا بىلگىر مالشى رەتىندە تانىلىپ وتىر.
بۇگىندە ونىڭ شارۋاشىلىعىندا 10 تۇيە بار، سونىڭ 6 سى ساۋىندى. تۇيە ءسۇتى حالقىمىز ءۇشىن ەجەلدەن بەلگىلى شيپالى سۋسىن. ءدارى- دارمەكتەن كەم تۇسپەيتىن بۇل ءونىم ادام اعزاسىن قۋاتتاندىرىپ، ءتۇرلى دەرتكە داۋا بولادى.
«ءبىراق پايداسى تەك سۇتپەن شەكتەلمەيدى. تۇيە جۇنىنەن ءتۇرلى بۇيىمدار توقۋعا، تۇرمىستىق جانە ساندىك ماقساتتا قولدانۋعا جارايدى. وسىنداي كاسىپ وتباسىنىڭ نەگىزگى تابىس كوزىنە اينالىپ قانا قويماي، اۋىلدىق جەرلەردە جۇمىسسىز وتىرعان ايەلدەرگە دە ۇيدەن تابىس تابۋعا مۇمكىندىك بەرەدى»، دەپ جازادى «ءوز ا».
شينجاڭدا 500 مىڭ باستان استام قازاق قويىن اسىلداندىردى - «جەنمين جيباو»
شينجاڭ مال شارۋاشىلىعى عىلىم- تەحنيكا ينستيتۋتىنان الىنعان مالىمەتكە سۇيەنسەك، شينجاڭ قازاق قويىنىڭ تۇقىمىن اسىلداندىرۋ جانە بۋدانداستىرىپ ساپالى تۇقىم جەتىلدىرۋ سالاسىندا كورنەكتى تابىسقا قول جەتكىزىپ، قازىرگە دەيىن 514 مىڭنان استام قازاق قويى اسىلداندىرىلعان، دەپ حابارلايدى قىتايلىق «جەنمين جيباودىڭ» باسىلىمى.
بۇدانداستىرۋ بارىسىندا العان ءتول 565 مىڭ باستان استام بولىپ، ەكونوميكالىق قۇنى جوعارلاپ، شارۋالاردىڭ كىرىسىن 170 ميلليون يۋاننان استام ارتتىرعان.
قىتايلىق باسىلىمنىڭ دەرەگىنشە، قازاق قويى شينجاڭداعى مال شارۋاشىلىعى رايوندارىندا باعىلادى. كەنەۋسىز جەم-شوپكە ءتوزىمدى، ءارتۇرلى قيىن شارت-جاعدايلارعا شىدامدى بولۋ سىندى ەرەكشەلىكتەرگە يە.
الايدا، تۇقىم قۋالاۋ ەرەكشەلىگىنىڭ ىقپالىنا ۇشىراعاندىقتان، بۇل قوي سورتىنىڭ ەتى ءبىرشاما از، جەتىلۋى باياۋ، ماي قۇرامى دا جوعارى. اسىرەسە، قۇيرىعى ۇلكەن، قۇيرىق مايىنىڭ ۇستايتىن مولشەرى جوعارى، جەم-ءشوپتى شىعىن ەتۋ مولشەرى ءبىرشاما كوپ، بازاردىڭ قاجەتىن وڭايشىلىقپەن قاناعاتتاندىرا المايدى. سوندىقتان اتالعان قوي تۇقىمىن اسىلداندىرىپ، ساپاسىن جوعارىلاتۋ قاجەت بولعان.
قازاقستاندىق ءان-بي ۇجىمى قىتايلىق بي فەستيۆالىنە قاتىسۋ ءۇشىن ۇرىمجىگە باردى - «حالىق گازەتى»
قازاقستاندىق ءان-بي ۇجىمى 7- قىتاي شينجاڭ حالىقارالىق حالىق بي فەستيۆالىنە قاتىسۋ ءۇشىن ۇرىمجىگە كەلدى، دەپ حابارلايدى «حالىق گازەتى» باسىلىمى.
2025 -جىلدىڭ 21-شىلدەسىندە شينجاڭنىڭ ءۇرىمجى قالاسىنا 7- قىتاي شينجاڭ حالىقارالىق حالىق بي فەستيۆالىنە قازاقستاننىڭ قورقىت ۇلتتىق ءان- بي توبى، «ناز» ۇلتتىق بي تەاترىنىڭ ارتىستەرى كەلگەن.
قىتايلىق ب ا ق-تىڭ دەرەگىنە سۇيەنسەك، فەستيۆالگە كەلگەن قازاقستاندىق ءانشى-بيشىلەر ۇجىمىن ۇرىمجىدەگى ونەر توبى كۇتىپ الدى. اۋەجايدا ەكى تاراپتىڭ ونەرپازدارى بۇرالا بيگە باسىپ، اينالاسىن دۋمانعا بولەگەن.
سونداي-اق وسى اپتادا «حالىق گازەتى» باسىلىمىندا «قىتايدا 9 جاڭا «حالىقارالىق سازدى قالا» قوسىلدى» دەگەن تاقىرىپتاعى اقپارات جاريالاندى.
قىتايلىق ب ا ق-تىڭ مالىمەتىنشە، ۇلتتىق ورمان جانە جايىلىم بيۋروسىنان العان مالىمەتىنە سايكەس، جاڭادان اشىلعان «سازدى جەرلەر تۋرالى كونۆەنسيانىڭ» 15-كونفەرەنسياسىندا ەلىمىزدىڭ 9 ورىنى «حالىقارالىق سازدى قالالار» رەتىندە سەرتيفيكاتتالدى. قازىرگە دەيىن قىتايداعى «حالىقارالىق سازدى قالالاردىڭ» جالپى سانى 22 گە جەتىپ، الەمدە كوش باستاۋدا.
«بۇل 9 ايماققا كەلەتىن بولساق، ولار: شانحايداعى چۋنمين، جىجياڭ ولكەسىندەگى ۆەنجوۋ، يۋننان ولكەسىنىڭ دالي قالاسى، فۋجيان ولكەسىندەگى فۋجوۋ، جىجياڭ ولكەسىنىڭ ورتالىعى حاڭجوۋ، جياڭشيدەگى جيۋجياڭ، شيزاڭنىڭ ورتالىعى لحاسا قالاسى، جياڭسۋدىڭ سۋجوۋ قالاسى جانە حۋنان ولكەسىندەگى يۋەيان»، دەپ جازادى «حالىق گازەتى».
يران حالقى - الەمدەگى ەڭ اقىلدى حالىقتاردىڭ ءبىرى - ParsToday
سوڭعى جاھاندىق ەسەپتەر مەن ستاتيستيكا يراندىقتاردىڭ الەمدەگى ەڭ اقىلدى حالىقتاردىڭ ءبىرى ەكەنىن كورسەتەدى، دەپ جازدى ParsToday اقپارات اگەنتتىگى.
ParsToday اقپارات اگەنتتىگىنىڭ مالىمەتى بويىنشا، سوڭعى جاھاندىق ەسەپتەر مەن ستاتيستيكاعا سايكەس، يراندىقتار الەمدەگى ەڭ اقىلدى ادامداردىڭ قاتارىنا كىرەدى. 2025 -جىلعى ورتاشا ينتەللەكت كوەففيتسيەنتىنىڭ (IQ) سوڭعى تىزىمىندە يراندىقتار ورتا ەسەپپەن 106,30 كورسەتكىشپەن الەمدە ءتورتىنشى ورىندا تۇردى.
گازادا قازا تاپقان جۋرناليستەر سانى 232 گە جەتتى - TRT
گازاداعى ۇكىمەتتىك باق كەڭسەسىنىڭ مالىمەتىنشە، 2023 -جىلدىڭ 7-قازانىنان بەرى گازادا 232 جۋرناليست قازا تاپقان.
كەڭسەنىڭ مالىمدەمەسىندە «گازادا سوعىس باستالعاننان بەرى قازا تاپقان جۋرناليستەر سانى فوتو ءتىلشى ادەم ابۋ حاربيدتىڭ ولىمىمەن بىرگە 232 گە جەتتى»، - دەلىنگەن.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
بىرنەشە بۇقارالىق اقپارات قۇرالدارىندا جۇمىس ىستەگەن پالەستينالىق فوتو ءتىلشى ادەم ابۋ حاربيد يزرايلدىڭ گازاعا جاساعان اۋە شابۋىلى كەزىندە قازا تاپتى.
تۇركيالىق ب ا ق-تىڭ مالىمەتىنشە، ابۋ حاربيد يزرايلدىڭ ءال-يەرمۋك بازارى ماڭىنداعى شاتىردى نىساناعا العان شابۋىلى كەزىندە ءۇش تۋىسىمەن بىرگە كوز جۇمعان. شابۋىل كەزىندە ونىڭ ايەلى مەن بالالارى دا جارالانعان.
اۆتور
بەيسەن سۇلتان ۇلى