شىن جاسىڭىز نەشەدە ەكەنىن سەلفي ارقىلى انىقتاپ بەرەتىن باعدارلاما شىقتى

عالىمدار ادامنىڭ بيولوگيالىق جاسىن سەلفي ارقىلى انىقتايتىن جاساندى ينتەللەكت قۇرالىن ازىرلەدى، دەپ حابارلايدى  euronews.com.

جاڭا زەرتتەۋ ناتيجەسىندە جاساندى ينتەللەكت (AI) ادامنىڭ سەلفي سۋرەتىنە قاراپ ونىڭ بيولوگيالىق جاسىن جانە قاتەرلى ىسىككە شالدىققان جاعدايدا ءومىر ءسۇرۋ ۇزاقتىعىن بولجاي الاتىن قۇرال جاساپ شىعاردى.

زەرتتەۋ The Lancet Digital Health جۋرنالىندا جاريالانىپ، FaceAge دەپ اتالاتىن AI مودەلىن 59 مىڭ ادامنىڭ سۋرەتىنە ۇيرەتكەن. بۇل مودەل ادامنىڭ تۋعان جىلىنا ەمەس، جاسۋشالىق دەنساۋلىعىنا قاراي بيولوگيالىق جاسىن انىقتاي الادى. كەيىن زەرتتەۋشىلەر بۇل قۇرالدى شامامەن 6200 ونكولوگيالىق ناۋقاسقا قولدانىپ كورگەن. ناتيجەسىندە، قاتەرلى ىسىككە شالدىققان ادامدار ورتا ەسەپپەن ناقتى جاسىنان بەس جاس ۇلكەن كورىنەتىنى جانە ولاردىڭ FaceAge كورسەتكىشى ساۋ ادامدارعا قاراعاندا جوعارى بولاتىنى انىقتالعان.

ەڭ قىزىعى، FaceAge مودەلى پاللياتيۆتىك كومەك الىپ جاتقان ناۋقاستاردىڭ قىسقا مەرزىمدى ءومىر ءسۇرۋ بولجامدارىن دالىرەك انىقتاۋعا كومەكتەسكەن. بۇل كورسەتكىش تەك ەڭ تاجىريبەلى دارىگەرلەردىڭ بولجامىمەن عانا سالىستىرۋعا كەلەتىن دالدىككە يە بولعان.

«ادامنىڭ سىرت كەلبەتى ونىڭ ناقتى جاسىمەن قانشالىقتى سايكەس كەلەتىنى - وتە ماڭىزدى كورسەتكىش»، - دەيدى زەرتتەۋ اۆتورلارىنىڭ ءبىرى، ا ق ش-تاعى Mass General Brigham مەديتسينالىق ورتالىعىنىڭ جاساندى ينتەللەكت جانە مەديتسينا باعدارلاماسىنىڭ ديرەكتورى حۋگو اەرتس.

عالىمدار بۇل قۇرال بولاشاقتا دارىگەرلەر مەن ناۋقاستارعا ءومىرىنىڭ سوڭعى كەزەڭىنە قاتىستى ماڭىزدى شەشىمدەر قابىلداۋعا كومەكتەسە الاتىنىن ايتادى. سونىمەن قاتار، FaceAge كوپتەگەن سوزىلمالى اۋرۋلاردى ەرتە انىقتايتىن جۇيە رەتىندە دە پايدالانىلۋى مۇمكىن.

«سوزىلمالى اۋرۋلاردى قارتايۋ اۋرۋلارى رەتىندە قاراستىراتىن بولساق، ادامنىڭ قارتايۋ قارقىنىن ءدال بولجاۋ بارعان سايىن ماڭىزدى بولىپ بارادى»، - دەيدى ونكولوگ دارىگەر جانە زەرتتەۋ اۆتورى دوكتور رەي ماك.

دەگەنمەن، قۇرالدىڭ كەيبىر شەكتەۋلەرى بار. مودەل نەگىزىنەن ەۋروپالىق ءناسىلدى ادامداردىڭ بەت-الپەتى ارقىلى ۇيرەتىلگەن. سونىمەن قاتار جارىق، ماكياج سەكىلدى سىرتقى فاكتورلار ناتيجەگە اسەر ەتۋى مۇمكىن. قازىر زەرتتەۋشىلەر FaceAge دالدىگىن پلاستيكالىق حيرۋرگيا مەن ماكياج قولدانىلعان سۋرەتتەردەن تۇراتىن دەرەكتەر بازاسىندا تەكسەرىپ جاتىر.

FaceAge قۇرالىن ناقتى مەديتسينالىق تاجىريبەدە قولدانۋ ءالى الدا تۇرعان جۇمىس. الايدا، دوكتور ماك بۇل زەرتتەۋ «فوتوسۋرەت ارقىلى بيوماركەرلەردى انىقتاۋدىڭ مۇلدە جاڭا مۇمكىندىكتەرىنە جول اشادى» دەيدى.