شىمكەنتتىكتەر جىلاننىڭ كوبەيگەنىن ايتىپ شاعىمدانىپ جاتىر

شىمكەنتتە جىلان كوبەيدى. تۇرعىنداردىڭ سوزىنشە، باۋىرىمەن جوعالاۋشىلار اۋلالاردان بولەك، ءۇي ىشىنەن دە تابىلىپ جاتىر. ءتىپتى ادامعا شابۋىلدايتىندارى دا كەزدەسەدى ەكەن، - دەپ حابارلايدى otyrar.kz.

قاراسۋ شاعىناۋدانىنىڭ تۇرعىنى باحتيار اتامۇراتوۆ بىرنەشە كۇن بۇرىن ءۇي ماڭىنان جىلان كورگەن. ونىڭ سوزىنشە، كەيىنگى ۋاقىتتا ءوزى دە كورشىلەرى دە باۋىرىمەن جورعالاۋشىنى جيى بايقاعان. ول جىلاندار ادامداردان قورىقپاي، ەمىن-ەركىن جۇرەتىنىن ايتتى جانە بالالارى مەن نەمەرەلەرىن اۋلاعا ويناۋعا شىعارۋدان قالدىق دەيدى.

«مەن جاقىندا مولاعا بارعان ەدىم، سول جاقتا ءوزىم كوزىممەن كوردىم جىلانداردىڭ جۇرگەنىن. كورشىلەرىم دە كورىپتى، جىلانداردىڭ جۇرگەنىن، بارلىعى ايتىپ جاتىر قازىر جىلاندار كوبەيىپ جاتىر دەپ. قايدان شىعىپ جاتىر؟ ءبىراق، ىستىقتان دەپ تە ايتىپ جاتىر. ءارى- بەرى وتكەنىن كوردىم، ءبىراق شابۋىل جاساپ، شاقتى دەگەندى ەستىمەدىم»، - دەيدى شىمكەنت تۇرعىنى باحتيار اتامۇراتوۆ.

دارىگەرلەردىڭ سوزىنشە، جىل باسىنان بەرى 4 ادام جىلان شاعىپ اۋرۋحاناعا تۇسكەن. قاۋىپتى جاندىك ناۋقاستاردىڭ اياعىنان شاققان.

«بىزگە كەلىپ تۇسەتىن ناۋقاستاردىڭ 90-95 پايىزى دەسەك بولادى، كوبىنەسە اياعىنان شاعادى. ءجۇرىپ بارا جاتقاندا بايقامايدى قالادى. اياعىنان شاقسا، اياعىن ءسال بيىكتەۋ قويىپ جاتقىزۋ كەرەك. شاعىپ العان كۇندە شاققان جەردى سورىپ تاستاۋعا بولمايدى. پىشاقپەن كەسىپ، كۇيدىرۋگە بولمايدى»، - دەيدى توكسيكولوگيا ءبولىمىنىڭ مەڭگەرۋشىسى اسىلحان مىڭبوسىنوۆ.

جىلاننىڭ كوبەيگەنىن قۇتقارۋشىلار دا ايتىپ وتىر. سەبەبى جىل باسىنان بەرى "باۋىرىمەن جورعالاۋشىنى كوردىك» دەپ، 130 عا جۋىق تۇرعىن شاقىرعان. قاۋىپتى جاندىك اسىرەسە ءشوبى مول، تاسى كوپ جەر ۇيلەردىڭ اۋلاسىندا كەزدەسەتىن كورىنەدى.

«2024-جىلى جىل باسىنان بەرى 125 رەت شاقىرتۋ ءتۇستى. ونىڭ 78 ىندە جىلاندار ۇستالىپ، قاۋىپسىز جەرگە جىبەرىلدى. بۇل كورسەتكىش 2023-جىلى 138 رەت بولعان. ونىڭ 91 ىندە جىلاندار ۇستالىپ، قاۋىپسىز جەرگە جىبەرىلگەن. جىلاندار كوبىنەسە زابادام، ساۋلە، ازات، سامال، قايناربۇلاق ساياجايى، تەلمان بولىمشەسى تاعى باسقا شاعىناۋداندارىنان تابىلىپ جاتىر»، - دەدى شىمكەنت جەدەل-قۇتقارۋ جاساعى قۇتقارۋ بولىمشەسىنىڭ باسشىسى راحىمجان بەكەنبايەۆ.

ماماندار ۇستالعان جىلانداردىڭ ىشىندە ۋلى تۇرلەرى دە بار ەكەنىن ايتىپ وتىر.

سونداي-اق، اۋلانى رەتكە كەلتىرىپ، ۇيىلگەن تاستاردى، اعاشتى جانە باسقا قوقىستاردى الىپ تاستاۋعا كەڭەس بەرەدى.