شىمكەنتتىك ەمشى قيناعان اسىراندى بالالاردىڭ قازىر قايدا ەكەنى بەلگىلى بولدى

شىمكەنت. KAZINFORM. شىمكەنتتە جەرگىلىكتى ەمشى اسىراپ الىپ، ابدەن قورلاعان بالالارعا قاتىستى سوت شەشىمى شىقتى.

قالالىق سوتتىڭ مالىمەتىنشە، كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا ۇ. سمانوۆ پەن جۇبايىنا ءبىر ۇل مەن ءبىر قىزدى اسىراپ الۋعا بەرۋ تۋرالى 2021-جانە 2023 -جىلى شىققان سوت شەشىمىنىڭ كۇشى جويىلعان. 2-شىلدەدە كامەلەت جاسىنا تولماعان ەكى بالاعا قاتىستى شەشىم شىقتى. ناتيجەسىندە اسىراپ الۋعا بەرىلگەن ءجاسوسپىرىم ۇل شىمكەنتتەگى بالالار ءۇيىنىڭ، ال ءبۇلدىرشىن قىز قالاداعى بوبەكتەر ءۇيىنىڭ تاربيەسىنە بەرىلدى.

اتالعان سوت شەشىمى زاڭدى كۇشىنە ءالى ەنگەن جوق.

قالالىق ءبىلىم باسقارماسىنىڭ مالىمەتىنشە، ەمشىگە قامقورلىققا بەرىلگەن ءتورت بالانىڭ ىشىندە 2019 -جىلى تۋعان ۇل بالا شىمكەنتتەگى بالالار ءۇيىنىڭ قامقورلىعىنا بەرىلگەن. 2021 -جىلى دۇنيەگە كەلگەن ەگىز ۇل مەن قىز استانا قالاسىنىڭ مامانداندىرىلعان بوبەكتەر ۇيىنە جەتكىزىلگەن. 2020 -جىلى تۋعان ۇل بالا شىمكەنتتەگى بوبەكتەر ۇيىنە تاپسىرىلعان.