شىمكەنتتىك جىگىت الىپ قاشتى دەلىنگەن 20 جاسار بويجەتكەن جايلى تىڭ دەرەك شىقتى

شىمكەنت. KAZINFORM - بۇعان دەيىن الەۋمەتتىك جەلىلەردە شىمكەنتتىك جىگىت 20 جاسار بويجەتكەندى الىپ قاشىپ، كونبەگەن سوڭ زورلادى دەگەن اقپارات شىققان بولاتىن. ونداعى مالىمەتتە جاس قىزدىڭ قۇربىلارى اراشا ءتۇسىپ، پوليتسيادان كومەك سۇراعانى ايتىلعان. پوليتسيا اتالعان فاكتىگە قاتىستى تىڭ دەرەك ءبولىستى.

ۆەدومستۆو مالىمەتىنشە، جاس قىز ءوز ەركىمەن تۇرمىسقا شىققانىن، ءبىر اپتا جىگىتپەن بىرگە تۇرعانىن ايتقان.

ءبىراق كەيىن بىرگە تۇرا المايتىنىن ءتۇسىنىپ، كەتىپ قالعان.

ال كوپشىلىككە جالعان اقپارات تاراتقانى ءۇشىن ونىڭ قۇربىسى جاۋاپقا تارتىلعان.

«كەشە الەۋمەتتىك جەلىلەردە ۇيلەنۋ ءۇشىن قىزدى ءوز ەركىنەن تىس ۇرلاۋ جايتى تۋرالى اقپارات تارادى. وقيعاعا قاتىسى بار بارلىق تۇلعالار پوليتسياعا جەتكىزىلدى. ءوز جاۋابىندا ازاماتشا اتالعان اقپاراتتى جوققا شىعارىپ، جىگىتتىڭ ۇيىندە ءبىر اپتا تۇرعانىن جانە ودان ءارى بىرگە ءومىر سۇرۋدەن باس تارتىپ، كەتىپ قالعانىن، سونداي-اق قازىرگى تاڭدا ەشكىمگە ارىز-شاعىمى جوق ەكەنىن جەتكىزدى. جىنىستىق زورلىق-زومبىلىق كورسەتۋ تۋرالى اقپاراتتى تولىعىمەن جوققا شىعاردى. الەۋمەتتىك جەلىلەردە جالعان اقپارات تاراتقان ازاماتشاعا قاتىستى اكىمشىلىك شارا قابىلداندى»، - دەلىنگەن پوليتسيا مالىمەتىندە.

ەسكە سالساق، بۇعان دەيىن الىپ قاشۋدىڭ قۇربانى بولدى دەلىنگەن بويجەتكەنگە قاتىستى پوليتسيا تۇسىنىك بەرگەن بولاتىن.

مۇنىڭ الدىندا باسقا ءبىر شىمكەنتتىك بويجەتكەندى ماڭعىستاۋلىق جىگىت الىپ قاشپاق بولعان ەدى. بۇل ءساتتىڭ ۆيدەوسى قالا كوشەلەرىندەگى بەينەباقىلاۋ كامەراسىنا ءتۇسىپ قالدى.

كوپ ۇزاماي جاس جىگىت سوت ۇكىمىمەن كىنالى دەپ تانىلىپ، 4 جىلعا سوتتالدى.

اۆتور
جانسايا تاۋەكەل قىزى