شىمكەنتتىك دارىگەرلەر سالماعى 980 گرام بوپ تۋعان ءسابيدى امان الىپ قالدى

شىمكەنت. KAZINFORM - شىمكەنتتە سالماعى نەبارى 980 گرام بوپ تۋعان شاقالاق امان قالدى. دارىگەرلەر ونىڭ ءومىرى ءۇشىن 28 كۇن كۇرەسكەن.

39 جاستاعى جۇكتى كەلىنشەك №2 قالالىق اۋرۋحانانىڭ پەرزەنتحانا بولىمىنە جەتكىزىلىپ، جاعدايى اۋىر بولعاندىقتان دارىگەرلەر كەسار تىلىگىن جاساعان. سالماعى ءبىر كەلىگە دە جەتپەيتىن ۇل بالانىڭ جاعدايى اۋىر بولعان.

دارىگەرلەر نارەستەنى دەرەۋ جانساقتاۋ بولىمىنە جاتقىزىپ، وكپەنى جاساندى جەلدەتۋ اپپاراتىنا قوسىپ، ينفۋزيوندى جانە ينوتروپتى ەم شارالارىن جۇرگىزگەن.

«جانساقتاۋ بولىمىندە 28 كۇن جاتقان مۇستافا دارىگەرلەردىڭ شەشىمىمەن نارەستەلەر پاتولوگياسى بولىمىنە اۋىستىرىلدى. وزدىگىمەن دەم الا باستادى. ءسابيدى دارىگەرلەر اناسىنىڭ قۇشاعىنا بەردى. قازىرگى تاڭدا بالانىڭ سالماعى 2700 گرام بولدى. جاعدايى قاناعاتتانارلىق. جاقىن ارادا انا مەن بالا وتباسىمەن قاۋىشاتىن بولادى»، - دەدى قالالىق دەنساۋلىق ساقتاۋ باسقارماسىنداعىلار.

ەسكە سالساق، ءبىز بۇعان دەيىن ەلىمىزدە «اڭساعان ءسابي» باعدارلاماسى ارقىلى 3 جىلدا 7 مىڭ نارەستە دۇنيەگە كەلگەنىن جازعان بولاتىنبىز.

شىمكەنتتە ءار 15 مينۋت سايىن 1 نارەستە جارىق دۇنيە ەسىگىن اشاتىنى بەلگىلى بولعان.

اۆتور
جانسايا تاۋەكەل قىزى