شىمكەنتتەگى ۋنيۆەرسيتەتتە اسا ءىرى كولەمدە بيۋدجەت قاراجاتىن جىمقىرعاندار ۇستالدى

شىمكەنت. KAZINFORM - ق م ا شىمكەنت قالاسى بويىنشا دەپارتامەنتى م. اۋەزوۆ اتىنداعى وڭتۇستىك قازاقستان ۋنيۆەرسيتەتىندە اسا ءىرى كولەمدە بيۋدجەت قاراجاتىن جىمقىرۋ جانە قىلمىستىق جولمەن الىنعان مۇلىكتى زاڭداستىرۋ فاكتىسى بويىنشا قىلمىستىق ءىستى تەرگەپ- تەكسەرۋدى اياقتادى.

اگەنتتىكتىڭ مالىمەتىنشە، كۇدىكتىلەر قاتارىندا رەكتوردىڭ مىندەتىن اتقارۋشى، قارجى جانە اكىمشىلىك دەپارتامەنتتەردىڭ ديرەكتورلارى، سونداي-اق سەرىكتەس ۇيىمداردىڭ باسشىلارى بار.

تەرگەۋ ناتيجەسىندە ۋنيۆەرسيتەت قىزمەت كورسەتۋ، قۇرىلىس-مونتاج جۇمىستارى مەن تاۋار جەتكىزۋگە قاتىستى جالپى سوماسى 256 ميلليون تەڭگە بولاتىن جالعان كەلىسىمشارتتار جاساعانى انىقتالدى.

اتالعان جۇمىستار ءىس جۇزىندە ورىندالماعان. بيۋدجەت قارجىسى جالعان اكتىلەر نەگىزىندە بايلانىسى بار كومپانيالاردىڭ شوتتارىنا اۋدارىلىپ، كەيىن قولما-قول اقشاعا اينالدىرىلعان.

قىلمىستىق جولمەن الىنعان كىرىستەرگە كۇدىكتىلەر 6 قىمبات كولىك (Mercedes-Benz S- كلاسس، Lexus LX570 جانە ت. ب. ) پەن شىمكەنت قالاسىنىڭ ورتالىعىنان قۇنى 254 ميلليون تەڭگە بولاتىن ەليتالىق كوتتەدج ساتىپ العان. ولارعا سوت سانكسياسىمەن تىيىم سالىندى. 4 كۇدىكتىگە قاتىستى ءۇيقاماق تۇرىندەگى بۇلتارتپاۋ شاراسى قابىلداندى.

قىلمىستىق ءىس سوتقا جولداندى.

ايتا كەتەيىك، اتىراۋ وبلىسىندا ءبىلىم مەكەمەلەرىندەگى قارجى جىمقىرۋ دەرەگى ونلاين باقىلانادى.