شىمكەنتتەگى مەكتەپ بۋحالتەرى ەندى 8 جىل تۇرمەدە وتىرادى
شىمكەنت. KAZINFORM - شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا اسا ءىرى كولەمدە قارجى جىمقىرعان ەسەپشىنىڭ ءىسى قارالدى.
سوتتالۋشى ق ك-نىڭ 189-بابى 4-بولىگىنىڭ 2-تارماعىمەن ايىپتالعان.
ول شىمكەنت قالاسىنداعى جالپى ورتا ءبىلىم بەرەتىن مەكتەبىنىڭ باس ەسەپشىسى لاۋازىمىن اتقارىپ ءجۇرىپ، 2021-2023 -جىلدار ارالىعىندا بەلگىلەنگەن ەڭبەكاقى سوماسىنان ارتىق مولشەردەگى قاراجاتتى ءوزىنىڭ شوتىنا اۋدارىپ وتىرعان.
وسىلايشا ك. وزىنە سەنىپ تاپسىرىلعان 64295513 تەڭگە، ياعني اسا ءىرى مولشەردە مەملەكەت اقشاسىن جىمقىرعان. قازىرگى تاڭدا كەلگەن شىعىن وتەلمەگەن.
سوتتالۋشىنىڭ كىناسى ءوز جاۋابىمەن، جابىرلەنۋشى وكىلىنىڭ جاۋاپتارىمەن، زاتتاي دالەلدەمەلەرمەن جانە ءىس بويىنشا جيناقتالعان وزگە دە ايعاقتار جيىنتىعىمەن تولىق دالەلدەندى.
پروكۋرور ك- عا 7 جىلعا باس بوستاندىعىن ايىرۋ جازاسىن تاعايىنداۋدى سۇرادى.
جابىرلەنۋشىنىڭ وكىلى جازا تاعايىنداۋ ماسەلەسىن سوتتىڭ قاراۋىنا قالدىردى.
ك. كىناسىن تولىق مويىنداپ جەڭىل جازا تاعايىنداۋدى، ق ك-نىڭ 63-بابىن قولدانىپ شارتتى جازا بەرۋدى سۇرادى.
سوت ك-نى ق ك-نىڭ 189-بابى 4-بولىگىنىڭ 2-تارماعىمەن ءومىر بويىنا مەملەكەتتىك قىزمەت اتقارۋ قۇقىعىنان ايىرا وتىرىپ، 8 جىلعا سوتتادى.
ءىس بويىنشا بەرىلگەن تالاپ ارىز تولىق قاناعاتتاندىرىلدى.