شىمكەنتتە ەسىرتكى كۋرەرى قىلمىس ۇستىندە وڭباي ۇستالدى

شىمكەنت. KAZINFORM - شىمكەنتتە ەسىرتكى جاسىرۋمەن اينالىسقان ەر ادام ۇستالدى. كۇدىكتى پوليتسەيلەرگە باعىنباي، قاشىپ كەتۋگە تىرىسقان. ءبىراق ءتارتىپ ساقشىلارى ونىڭ سوڭىنان قۋىپ، قاماۋعا الدى.

قالا تۇرعىنىنان اسا ءىرى مولشەردەگى سينتەتيكالىق ەسىرتكى تاركىلەندى.

پوليتسەيلەر ەسىرتكى كۋرەرىن قاراتاۋ اۋدانىنداعى رەيد بارىسىندا قالا كوشەلەرىنىڭ بىرىنەن قىلمىس ۇستىندە ۇستاعان.

ەر ادامنان 36 وراما مەفەدرون تابىلدى.

«ۇستالعان ازاماتتىڭ ينتەرنەت ارقىلى وڭاي «جۇمىس» تاۋىپ، قالا اۋماعىندا ەسىرتكى قويىپ كەتۋمەن اينالىسقانى انىقتالدى. ال جاسىرىن ورىندار تۋرالى اقپاراتپەن ول مەسسەندجەردە ءبولىسىپ وتىرعان. قازىرگى تاڭدا كۇدىكتى قاماۋدا. اتالعان فاكتى بويىنشا سوتقا دەيىنگى تەرگەۋ جۇرگىزىلىپ جاتىر»، - دەدى قالالىق پوليتسيا دەپارتامەنتى.

بۇعان دەيىن شىمكەنت پوليتسەيلەرى سينتەكتيكالىق ەسىرتكىنىڭ 2 مىڭنان استام دوزاسىنىڭ قالا اۋماعىندا تارالۋىنىڭ الدىن العان بولاتىن.

ەسىرتكى ساتۋشىنى جەدەل ۋاكىلدەر اباي اۋدانىنىڭ اۋماعىندا ۇستادى.

ونىڭ جالدامالى پاتەرىن تەكسەرۋ كەزىندە ەسىرتكىنى ولشەپ وراۋعا ارنالعان تارازى، يزولەنتا، «تەرموۋسادكا»، گريپپەر-پاكەتتەر، سونىمەن قاتار اسا ءىرى مولشەردەگى مەفەدرون تابىلدى.

ەر ادام ينتەرنەت- مەسسەندجەر ارقىلى ەسىرتكى سالىنعان پاكەتتەر جاسىرىلعان ورىندار تۋرالى اقپارات الىپ، ولاردى ءبىر رەتتىك دوزالارعا ءبولىپ، وتكىزۋمەن اينالىسقان.

اتالعان قىلمىستى جاساعانى ءۇشىن 34 جاستاعى كۇدىكتى ون جىلدان ون بەس جىلعا دەيىن باس بوستاندىعىنان ايىرىلۋى مۇمكىن.

ەسكە سالساق، اتىراۋدا 1 كەلىدەن استام سينتەتيكالىق ەسىرتكى ساتپاق بولعان ەكى كۇدىكتى قاماۋعا الىنعان بولاتىن.

وبلىستىق پوليتسيا دەپارتامەنتى ءمالىم ەتكەندەي، كۇدىكتىلەر تاراز قالاسىنان كەلگەن.

اۆتور

جانسايا تاۋەكەل قىزى