شىمكەنتتە رەسپۋبليكالىق اقىندار ايتىسى وتەدى
شىمكەنت. KAZINFORM - شىمكەنتتە سوڭعى 4-5 جىلدان كەيىن العاش رەت رەسپۋبليكالىق اقىندار ايتىسى وتەدى.
قالالىق مادەنيەت، تىلدەردى دامىتۋ، ونوماستيكا جانە مۇراعاتتار باسقارماسىنىڭ باسشىسى باۋىرجان ورىنتايەۆتىڭ ايتۋىنشا، جەرگىلىكتى اقىندار مەن ايتىستى ساعىنعان حالىقتىڭ سۇرانىسىنان كەيىن وسىنداي شەشىم قابىلدانعان.
«وزدەرىڭىز بىلەتىندەي، قالادا اقىندار ايتىسى وتكىزىلمەگەلى 4-5 جىلعا جۋىق ۋاقىت بولدى. ايتىستى ساعىنعان حالىقتىڭ سۇرانىسى بويىنشا جانە جەرگىلىكتى اقىنداردىڭ ۇسىنىسىنا سايكەس بيىل رەسپۋبليكا كولەمىندە اقىندار ايتىسىن وتكىزۋدى جوسپارلاپ وتىرمىز»، - دەدى باسقارما باسشىسى وڭىرلىك كوممۋنيكاتسيالار قىزمەتىندە وتكەن بريفينگتە.
سپيكەردىڭ سوزىنشە، مامىر ايىنداعى مەرەكەلەردى كەڭىنەن اتاپ ءوتۋ ەلدەگى سۋ تاسقىنىنا بايلانىستى توقتاتىلىپ، وعان بولىنگەن قارجى قىسقارتىلعان. ال باسقا دا مەرەكەلەرگە ارنالعان مادەني شارالار جوسپارعا سايكەس كەزەڭ-كەزەڭىمەن وتەتىن بولادى.
«پرەزيدەنتىمىز قاسىم-جومارت كەمەل ۇلى توقايەۆتىڭ «ەگەمەن قازاقستان» گازەتىنە بەرگەن سۇقباتىندا اتاۋلى داتالارعا كەڭىنەن كوڭىل بولگەن بولاتىن. سونىڭ ىشىندە جوشى ۇلىسى ىرگەسىنىڭ قالانعانىنا - 800 جىل، كەنەن ازىربايەۆتىڭ تۋعانىنا - 140 جىل، جازۋشى بەيىمبەت مايليننىڭ 130 جىلدىعى، سۋرەتشى ءابىلحان قاستەيەۆتىڭ 120 جىلدىعى، بالالار جازۋشىسى بەردىبەك سوقپاقبايەۆتىڭ تۋعانىنا - 100 جىل، سونىمەن قاتار حالىق قاھارمانى راحىمجان قوشقاربايەۆتىڭ تۋعانىنا 100 جىل تولۋىنا وراي اۋقىمدى ءىس- شارالار وتكىزۋدى جوسپارلاپ وتىرمىز. ودان بولەك، بەلگىلى اقىن، مادەنيەت سالاسىنىڭ ارداگەرى حانبيبى ەسەنقارا قىزىنىڭ 75 جىلدىق مەرەيتويىن اتاپ ءوتۋ جوسپارلانىپ وتىر»، - دەدى باۋىرجان ورىنتايەۆ.
2024 -جىلدىڭ العاشقى توقسانىندا اتقارىلعان جۇمىستار تۋرالى بايانداعان باسقارما باسشىسى تەاتر سۇيەر قاۋىمى ءۇشىن جاعىمدى جاڭالىقتا جاريا ەتتى.
«تەاتر سۇيەر قاۋىم ءۇشىن قۋانىشتى جاڭالىقتارىمىز دا جوق ەمەس، سونىڭ ىشىندە بيىل ەلىمىزدەگى ءبىرقاتار بەلدى تەاترر مەن وزبەكستان رەسپۋبليكاسىنىڭ تەاترلارى شىمكەنت قالاسىنا گاسترولدىك ساپارمەن كەلەدى»، - دەدى ول.
اتاپ ايتار بولساق، 5-مامىردا الماتى قالاسىنىڭ JOL تەاترى، 11-14-مامىردا اقمولا وبلىستىق ورىس دراما تەاترى، 13-18-مامىر وزبەكستان رەسپۋبليكاسىنىڭ فەرعانا، انديجون وبلىستىق قۋىرشاق تەاترلارى، 15-16-مامىردا شىعىس قازاقستان وبلىستىق دراما تەاترى، 18-مامىر وزبەكستان رەسپۋبليكاسىنىڭ سىرداريا وبلىستىق مۋزىكالىق دراما تەاترى شىمكەنت كورەرمەندەرىنە ءوز ونەرلەرىن پاش ەتەتىن بولادى.