شىمكەنتتە مەكتەپ باسشىلىعى بۋحالتەرمەن بىرگە 48 ميلليون تەڭگە جىمقىرعان

شىمكەنت. KAZINFORM. شىمكەنتتە №44-ورتا مەكتەپ ديرەكتورى جانە ونىڭ ورىنباسارى، ءبىلىم مەكەمەسىنىڭ بۋحالتەرى سوتتالدى. ولارعا پەداگوگتەردىڭ ەڭبەگىنە اقى تولەۋ قورىنا بولىنگەن 48 ميلليون تەڭگە كولەمىندەگى بيۋدجەت قاراجاتىن جىمقىردى دەگەن ايىپ تاعىلدى.

ۇكىم شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا وقىلدى.

سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى ءمالىم ەتكەندەي، سوت ۇكىمىمەن بەلگىلەنگەن نورماتيۆتەن تىس جالاقىنى زاڭسىز اۋدارعانى، سونداي-اق «ءولى جاندارعا» جۇيەلى تولەم جاساپ كەلگەنى ءۇشىن ديرەكتور ورىنباسارى مەن مەكتەپ بۋحالتەرى 7 جانە 8 جىلعا باس بوستاندىعىنان ايىرىلعان.

ال جۇمىسىنا سالعىرت قاراعان مەكتەپ ديرەكتورىنا 6,9 ميلليون تەڭگە ايىپپۇل سالىندى.

ۇكىم زاڭدى كۇشىنە ەنگەن جوق.

ايتا كەتەيىك، سىبايلاس جەمقورلىقتىڭ الدىن الۋ ماقساتىندا سوت پروتسەسىنە قالالىق مەكتەپ ديرەكتورلارى مەن بۋحالتەرلەرى، جالپى سانى 50 ادام وففلاين، 650 دەن استام ونلاين قاتىستى.

ءبىز بۇعان دەيىن قىزىلوردا وبلىسى جاڭاقورعان اۋداندىق ءبىلىم ءبولىمىنىڭ باسشىسى مەن 24 مەكتەپتىڭ بۋحالتەرى ءىرى كولەمدە قارجى جىمقىرعانى ءۇشىن سوتتالعانىن جازعان بولاتىنبىز.

ناۋرىز ايىندا ماجىلىسمەن بولاتبەك ناجمەتدين ۇلى پرەمەر-ءمينيستردىڭ ورىنباسارىنا جولداعان دەپۋتاتتىق ساۋالىندا ءبىلىم بەرۋ ۇيىمدارىنداعى بۋحالتەرلىك ەسەپ جۇيەسىن قايتا قاراۋ كەرەگىن اتاپ وتكەن ەدى.

اۆتور
جانسايا تاۋەكەل قىزى