شىمكەنتتە جول ۇستىندە توبەلەسكەن جۇرگىزۋشىلەرگە قاتىستى قىلمىستىق ءىس قوزعالدى
شىمكەنت. KAZINFORM - شىمكەنتتە كولىك جۇرگىزۋشىلەرى اراسىنداعى توبەلەسكە ۇلاسقان جول كيكىلجىڭىنە قاتىستى قىلمىستىق ءىس قوزعالدى.
جول ۇستىندە توبەلەسكەن جاستاردىڭ ارەكەتى الەۋمەتتىك جەلىدە كەڭىنەن تاراپ كەتتى. جانجال ناتيجەسىندە جۇرگىزۋشىلەردىڭ ءبىرى دەنە جاراقاتىن العان.
قالالىق پوليتسيا دەپارتامەنتىنىڭ باستىعى نۇرلان الماسبەكوۆ اتالعان وقيعاعا قاتىستى قىلمىستىق ءىس تىركەلگەنىن جەتكىزدى. قازىرگى تاڭدا تەرگەۋ ارەكەتتەرى ءجۇرىپ جاتىر.
«ەشبىر قۇقىق بۇزۋشىلىق جازاسىز قالمايدى. قالا تۇرعىندارىن قوعامدىق قاۋىپسىزدىكتى نىعايتۋ ماقساتىندا قۇقىق بۇزۋشىلىقتارعا نولدىك توزىمدىلىكپەن قاراۋعا شاقىرمىن»، - دەدى نۇرلان الماسبەكوۆ.
پوليتسيا پولكوۆنيگى ازاماتتاردىڭ قاۋىپسىزدىگىن نىعايتۋ ءۇشىن زاڭمەن كەز كەلگەن زورلىق-زومبىلىق ءۇشىن جاۋاپكەرشىلىك كۇشەيتىلگەنىن، دەنساۋلىققا قاساقانا جەڭىل زيان كەلتىرۋ جانە ۇرىپ-سوعۋ قىلمىستىق قۇقىق بۇزۋشىلىققا جاتاتىنىن ەسكە سالدى.
اۆتور
قايرات زاينيشەۆ