شىمكەنتتە جول اپاتىنان اۋىر جاراقات العان جۇكتى كەلىنشەككە كۇردەلى وتا جاسالدى

جول اپاتىنا ۇشىراعان 28 جاستاعى جۇكتى كەلىنشەك جەدەل جاردەم قىزمەتىمەن №1-قالالىق كلينيكالىق اۋرۋحاناعا جەتكىزىلدى، دەپ حابارلايدى Kazinform.

جول اپاتىنىڭ سالدارىنان پاتسيەنتتە قوسارلانعان جاراقات، باس ميىنىڭ شايقالۋى، كوكىرەك قۋىسىنىڭ قىسىلۋى، قابىرعالاردىڭ سىنۋى انىقتالعان. دارىگەرلەر ناۋقاسقا ەكى رەت كۇردەلى وتا جاسادى.

وپەراتسيانىڭ ءبىرىنشى كەزەڭىندە جۇكتى ايەلدىڭ جامباس سۇيەكتەرىنە، كەيىن وڭ جاق سان سۇيەگىنە جانە بالتىر سۇيەگىنە حيرۋرگيالىق جولمەن بەكىتۋشى اپاراتتى قويىپ بەردى. بارلىق وتا ءساتتى ءوتىپ، دارىگەرلەر قاۋىپتىڭ الدىن الدى.

«اسا كۇردەلى وتانى №1-قالالىق كلينيكالىق اۋرۋحانانىڭ دارىگەر-تراۆماتولوگى اكادەميك اسحات ابدىماۋلەنوۆ جانە ەلدار سماعۇلوۆ جاسادى. بەس كۇن جانساقتاۋ بولىمىندە جاتقان ناۋقاس پالاتاعا اۋىستىرىلدى. قازىرگى ۋاقىتتا جۇكتى ايەلدىڭ جاعدايى قاناعاتتانارلىق. بارلىق فۋنكسيونالدى جانە قوزعالىس قابىلەتتەرى ساقتالعان. كۇردەلى وپەراتسياعا قاراماستان، جۇكتىلىك جالعاسۋدا» - دەلىنگەن شىمكەنت قالاسى دەنساۋلىق ساقتاۋ باسقارماسىنىڭ باسپا ءسوز قىزمەتى تاراتقان اقپاراتتا.