شىمكەنتتە «ديكي ارماننىڭ» اينالاسىنداعى ادامدار سوتتالدى

شىمكەنت. KAZINFORM - شىمكەنتتە داۋلى سوت پروتسەسى اياقتالدى.

ارنايى مامانداندىرىلعان اۋدانارالىق قىلمىستىق ىستەر جونىندەگى سوت التى ايىپتالۋشىعا ۇكىم شىعاردى. ولار اۋىر قىلمىس جاساعانى ءۇشىن ايىپتالدى. اتاپ ايتار بولساق، بوپسالاۋ، زاڭسىز بوستاندىقتان ايىرۋ، دەنساۋلىققا اۋىر زيان كەلتىرۋ، سونداي-اق اتىس قارۋىن ساقتاۋ جانە تاسىمالداۋ.

ديكي ارماننىڭ ەڭ جاقىن اينالاسىنا قاتىستى ءىس بويىنشا باستى فيگۋرانتتاردىڭ ءبىرى 1989 -جىلى تۋعان ءداۋىر تاۋكەيەۆ بولدى. بۇل قىلمىستىق ءىس اياسىنان تىس ول بۇعان دەيىن بۇقارالىق اقپارات قۇرالدارىندا ارمان جۇماگەلديەۆتىڭ، ياعني «ديكي ارماننىڭ» ەڭ جاقىن سەرىكتەرىنىڭ ءبىرى رەتىندە اتالعان. 2021 -جىلى تاۋكەيەۆ باسقا ءبىر ءىس بويىنشا 5 جارىم جىلعا باس بوستاندىعىنان ايىرىلعان بولاتىن. الايدا قازىرگى ءىس بويىنشا جۇماگەلديەۆتىڭ، ياعني ديكي ارماننىڭ ارەكەتتەرىمەن ەشقانداي بايلانىس انىقتالعان جوق جانە بۇل سوتتالۋشىلارعا تاعىلعان ايىپتاردىڭ قۇرامىنا ەنگەن جوق.

سوت انىقتاعانداي، س. ا. 2018 -جىلدان 2023 -جىلعا دەيىن جابىرلەنۋشى ءو. ن. -عا شامامەن 50 ميلليون تەڭگە قارىزعا بەرگەن. قارىزىن قايتارا الماعاننان كەيىن، 2023 - 2024 -جىلدارى س. ا. جابىرلەنۋشىدەن ءوز بەتىمەن 43600000 تەڭگە الىپ قويعان. سونىمەن قاتار، و. د. , ا. ع. جانە ت. ە. -مەن بىرگە ءو. ن. مەن ونىڭ دوسى ە. د. -نى قوناق ۇيلەر مەن جالدامالى پاتەرلەردە زاڭسىز ۇستاۋدى ۇيىمداستىرىپ، ولاردىڭ بوستاندىعىن شەكتەگەن.

بولەك ءبىر ەپيزودتا تاۋكەيەۆ (ت. د.) 2023 -جىلعى قاراشا ايىندا كولىك ساتىپ الۋ سىلتاۋىمەن سول جابىرلەنۋشىدەن 2 ميلليون تەڭگە «كورىمدىك» تالاپ ەتىپ، كۇش قولدانامىن دەپ قورقىتقان. جابىرلەنۋشى شاراسىز كۇيدە وعان 1 ميلليون تەڭگە بەرگەن.

سونداي-اق، ءىس ماتەريالدارىندا قارۋدى زاڭسىز ساقتاۋ دەرەگى دە كورسەتىلگەن. و. ا. الماتى قالاسىندا تاپانشا مەن وق- دارىلەردى تاۋىپ الىپ، ونى ت. د. -عا كورسەتكەن. الايدا، قارۋ قۇقىق قورعاۋ ورگاندارىنا تاپسىرىلماعان، وسىلايشا، ەكەۋى دە اتىس قارۋىن زاڭسىز يەلەنىپ، ساقتاپ جانە تاسىمالداعان.

تاعى ءبىر ەپيزود 2024 -جىلعى مامىردا نازاربايەۆ داڭعىلىنداعى ءدامحانادا بولعان جانجالعا قاتىستى. تەرگەۋ مالىمەتىنشە، و. د. جابىرلەنۋشى م. ا. -نىڭ سوققىلارىنا جاۋاپ رەتىندە قاجەتتى قورعانۋ شەگىنەن اسىپ، وعان بىرنەشە مارتە زاتپەن سوققى بەرىپ، اۋىر دەنە جاراقاتىن سالعان.

سوت تەرگەۋ بارىسىندا قىلمىستىق ءىستىڭ ماتەريالدارىن، سونىڭ ىشىندە ايىپتالۋشىلاردىڭ، جابىرلەنۋشىلەردىڭ، كۋالاردىڭ جاۋاپتارىن، سوت ساراپتامالارىنىڭ ناتيجەلەرىن جانە زاتتاي دالەلدەردى قاراستىردى. پروكۋرور بارلىق ايىپتالۋشىعا باس بوستاندىعىنان ايىرۋ جازاسىن تاعايىنداۋدى سۇرادى، تەك و. د. -نىڭ ارەكەتىن جەڭىل قىلمىس رەتىندە قايتا سارالاۋدى ۇسىندى. ال جابىرلەنۋشىلەردىڭ كەيبىرى، تاراپتاردىڭ تاتۋلاسۋىنا بايلانىستى، جەڭىل ۇكىم شىعارۋدى سۇرادى.

سوتتىڭ ۇكىمىمەن، س. ا. - 4 جىل 8 اي باس بوستاندىعىنان ايىرۋ، ت. د. (ءداۋىر تاۋكەيەۆ) - 8 جىل باس بوستاندىعىنان ايىرۋ، و. ا. - 4 جىل باس بوستاندىعىنان ايىرۋ، و. د. - 1 جىل شارتتى جازا (قىلمىستىق باپ قايتا سارالانعاننان كەيىن)، ا. ع. - 1 جىل باس بوستاندىعىنان ايىرۋ، ت. ە. - تاراپتاردىڭ تاتۋلاسۋىنا بايلانىستى ق ر ق ك 68-بابى نەگىزىندە جازادان بوساتىلدى.

بۇل ۇكىم ءالى زاڭدى كۇشىنە ەنگەن جوق. ءىس فيگۋرانتتارىنىڭ جەكە ومىرىنە قاتىستى جەكەلەگەن مالىمەتتەرگە قاراماستان، سوت تەك وسى قىلمىستىق ءىس شەڭبەرىندەگى ناقتى ارەكەتتەر مەن ەپيزودتاردى عانا قاراستىردى. ەشبىر سوتتالۋشىعا ارمان جۇماگەلديەۆتىڭ قىلمىستىق ارەكەتىنە قاتىسى بار دەگەن ايىپ تاعىلعان جوق.

ايتا كەتەيىك، بۇدان بۇرىن زاڭسىز قاجىلىق جاساعاندار جازالاناتىنىن جازعان بولاتىنبىز.

اۆتور

قايرات زاينيشيەۆ