شىمكەنتتە 10 كۇن بويى سالت-ءداستۇر ناسيحاتتالادى

شىمكەنت. KAZINFORM - شىمكەنت قالاسىنىڭ تۇرعىندارى بۇگىن «قايىرىمدىلىق» كۇنىن اتاپ وتەدى. ءىس-شارالار بارىسىندا قارتتار ءۇيى مەن بالالار ۇيىندە جانە كوپبالالى وتباسىلارعا ارنالعان مەرەكەلىك باعدارلامالار ۇيىمداستىرىلادى. سونداي- اق، الەۋمەتتىك تۇرمىسى تومەن وتباسىلار مەن زيالى قاۋىم وكىلدەرىنە اۋىزاشار بەرىلەدى.

جالپى قالا تۇرعىندارى-ناۋرىز مەرەكەسىن 10 كۇن بويى اتاپ وتەدى. كەشە امال كۇنىنە وراي قالا اۋماعىندا بىرنەشە ءىس-شارا ۇيىمداستىرىلدى. ال، بۇگىنگى قايىرىمدىلىق كۇنىندە دە يگى ىستەر جالعاسىن تابادى.

16-ناۋرىز - «مادەنيەت جانە ۇلتتىق سالت- ءداستۇر كۇنى» -ناۋرىز الاڭىندا «ءسۇيىنشى سۇراۋ»، «بالاعا ات قويۋ»، «بەسىككە سالۋ»، «جاقسىنىڭ ورنىنا اۋناتۋ»، «تۇساۋكەسەر»، «اشامايعا مىنگىزۋ»، «قۇلاق تەسۋ»، «بۇرىمىن ءورۋ»، «قىزدى وڭ بوساعاعا وتىرعىزۋ»، «قىز ۇزاتۋ»، «بەتاشار»، «تىلەۋ كوجە دايىنداۋ» عۇرىپتارى ناسيحاتتالىپ، مۋزىكالىق-تەاترلاندىرىلعان قويىلىم كوپشىلىك نازارىنا ۇسىنىلادى.

17-ناۋرىز - «شاڭىراق كۇنى» اياسىندا پەرزەنتحانالاردا جاڭا تۋعان نارەستەلەردىڭ اتا-انالارىنا «ناۋرىز بازارلىق» ەستەلىك كادەسىيلارى تابىستالادى.

18-ناۋرىز - «ۇلتتىق كيىم كيۋ» كۇنى اياسىندا شىمكەنت قالاسىنىڭ مەملەكەتتىك قىزمەتكەرلەرى ۇلتتىق كيىم كيۋ چەللەندجىن باستايدى. سونداي- اق، كورمە ورتالىعىندا ءۇش نوميناتسيادان تۇراتىن «ەڭ ۇزدىك بالالار مەن جاسوسپىرىمدەردىڭ كيىم ۇلگىسى»، «ەڭ ۇزدىك كۇندەلىكتى كيىم ۇلگىسى»، «ەڭ ۇزدىك جۇمىس كيىم ۇلگىسى» اتتى ۇلتتىق كيىم ديزاينەرلەرىنىڭ بايقاۋى وتەدى.

19-ناۋرىز - «جاڭارۋ كۇنى» اياسىندا قالانىڭ ساياباقتارىندا كوكتەمگى اعاش ەگۋ ءداستۇرى قولعا الىنباق.

20-ناۋرىز - «ۇلتتىق سپورت كۇنى» يپپادرومدا بايگە، اۋدارىسپاق، كوكپار، جامبى اتۋ، ءداستۇرلى ساداق اتۋ، تەڭگە ءىلۋ سىندى ۇلتتىق سپورت ويىندارىنان جارىستار ۇيىمداستىرىلادى.

21-ناۋرىز - «ىنتىماق كۇنى» زيالى قاۋىم وكىلدەرى مەن قوعام قايراتكەرلەرى قالا تۇرعىندارىن-ناۋرىز مەرەكەسىمەن قۇتتىقتايدى.

22-ناۋرىز - «جىل باسى» استانا الاڭىندا «ارمىسىڭ، ءاز- ناۋرىز» اتتى ساحنا ونەرىندەگى ەتنيكالىق جانە زاماناۋي ۇردىستەردى ۇيلەستىرەتىن مۋزىكالىق تەاترلاندىرىلعان قويىلىم كورسەتىلەدى. سونىمەن قاتار، «ءال-فارابي» جانە-ناۋرىز الاڭدارىندا، «جەڭىس» ساياباعىندا، سايرام تۇرعىن الابىنداعى «ناۋرىز» ساياباعىندا، «قاجىمۇقان» اتىنداعى ورتالىق ستاديوندا مەرەكەلىك دۋماندى ءىس-شارالار وتەدى. سالتاناتتى شارا كەشكى گالا-كونسەرتكە ۇلاسادى. وندا ەلىمىزدىڭ ونەر جۇلدىزدارى «وردا» توبى، «ەر تۇران»، Qanay، نازيما جانە شىمكەنت قالالىق مادەنيەت ءۇيى ونەرپازدارى مەن «قازىنا»، «قاراگوز»، «شامسينۇر»، «شاتتىق» ءبي انسامبلدەرى ونەر كورسەتەدى.

23-ناۋرىز - «تازارۋ كۇنى» تازالىق ەستافەتاسىن باستاپ، قالانىڭ كورىكتى جەرلەرى مەن ساياباقتارىندا، مەرەكەدەن كەيىنگى قالدىق زاتتاردان تازالاۋ جالپى ۇلتتىق سەنبىلىك ۇيىمداستىرىلادى.

اۆتور

قايرات زاينيشەۆ