شىمكەنت پوليتسەيلەرى بالالار ءۇيى تاربيەلەنۋشىسىنىڭ ارمانىن ورىندادى

شىمكەنت پوليتسەيلەرى بالالار ءۇيى تاربيەلەنۋشىسىنىڭ ارمانىن ورىندادى، - دەپ حابارلايدى Polisia.kz.

يسلام سۇلەيمەنوۆتىڭ وقيعاسىن ەرەكشە مەرەكە قارساڭىنداعى ناعىز عاجايىپ دەپ اتاۋعا بولادى.

14 جاستاعى يسلام - شىمكەنتتەگى №4-بالالار ءۇيىنىڭ تاربيەلەنۋشىسى. ول كىشكەنتايىنان پوليتسيا قىزمەتكەرى بولۋدى ارماندايدى. فورما كيگەن پاترۋلدىك كولىكتەگى ادامداردىڭ جۇمىسىن قىزىعا باقىلايدى ەكەن.

ءتارتىپ ساقشىلارى جاس ءوسپىرىمنىڭ ارمانىن جۇزەگە اسىرۋدى ۇيعارىپ، پوليتسيا دەپارتامەنتىنە شاقىردى. مۇندا يسلامعا پوليتسيا باسقارماسىنىڭ «جۇرەگى» - جەدەل باسقارۋ ورتالىعى كورسەتىلدى.

ول ۇلكەن زالدىڭ قابىرعاسىن الىپ جاتقان ەكراندار ارقىلى مەگاپوليس ءومىرىن تاماشالاۋ كەزىندە ءتۇرلى ەموتسياعا بولەندى.

ج ب و-عا بارعاننان كەيىن مەكتەپ وقۋشىسى پاترۋلدىك پوليتسيا پولكىنىڭ قىزمەتتىك كولىگىنىڭ جۇرگىزۋشى ورىندىعىنا وتىرىپ، كولىك ىشىندەگى قۇرال-جابدىقتارمەن تانىسىپ، ناعىز راتسيا ارقىلى بايلانىسقا شىقتى.

وسىدان سوڭ يسلام قالانىڭ باس پوليتسەيىمەن كەزدەستى. دۋمان تايەۆ ونى جىلى قابىلداپ، بولاشاق وفيتسەرمەن كەزدەسكەنىنە قۋانىشتى ەكەنىن ءبىلدىردى.

8-سىنىپ وقۋشىسى قۇقىق قورعاۋ ماماندىعىن تاڭدايتىنىن، ويتكەنى ول ءارقاشان ادامداردى قورعاپ، ولارعا كومەكتەسۋدى قالايتىنىن ايتتى. دۋمان تايەۆ جەتكىنشەككە ءوز فۋراجكاسى مەن قولساعاتتى سىيعا تارتىپ، العا قويعان بارلىق ارمان-ماقساتتارىنا جەتۋىن، بولاشاعى جارقىن بولۋىن تىلەدى.

ايتا كەتەيىك، №4-بالالار ءۇيىنىڭ تاربيەلەنۋشىلەرى ءتورت جىلدان استام ۋاقىتتان بەرى شىمكەنت قالاسى پ د قىزمەتكەرلەرىنىڭ قامقورلىعىندا. ال وسى مەكەمەنىڭ ءۇش تۇلەگى بۇگىندە ق ر ءى ءى م قاراعاندى اكادەمياسىنىڭ كۋرسانتى.