شىمبۇلاقتىڭ ارقان جولدارى ۋاقىتشا جابىلادى

الماتى. KAZINFORM - شىمبۇلاق تاۋ كۋرورتىندا قىسقى سىرعاناۋ ماۋسىمىنا دايىندىق جۇمىستارى ءجۇرىپ جاتىر. وسىعان وراي، تاۋ كۋرورتىنا باراتىن ارقان جولداردىڭ كەيبىرى جابىق بولادى.

اتاپ ايتقاندا، بۇگىننەن باستاپ 3-قاراشانى قوسا العاندا «كومبي-1» جانە «كومبي-2» ارقان جولدارى جابىق بولادى. سونداي-اق، ارقان جولداردىڭ كۇزگى پروفيلاكتيكاسى بولاتىن وزگە كۇندەر:

- 21 -قازاننان 3 -قاراشانى قوسا العاندا «مەدەۋ-شىمبۇلاق» ارقان جولى جابىق بولادى؛

- 21 -قازاننان 3 -قاراشانى قوسا العاندا «ك ك د-4» ارقان جولى جابىق بولادى.

21 -قازاننان كەيىن شىمبۇلاققا تەك ەكو- اۆتوبۋستارمەن، تاكسيمەن نەمەسە ەلەكروكارلارمەن كوتەرىلۋگە بولادى. «مەدەۋ- شىمبۇلاق» اۆتوجولى دۇيسەنبىدەن جەكسەنبىگە دەيىن 9:00- دەن 13:00- گە دەيىن جانە 14:00- دەن 18:00- گە دەيىن جابىق.

سوندىقتان اۆتوكولىكپەن 9:00- گە دەيىن، 13:00- دەن 14:00- گە دەيىنگى تۇسكى ۇزىلىستە جانە 18:00- دەن كەيىن وتە الاسىز. تۋريستتەردىڭ جاياۋ وتۋىنە شەكتەۋ جوق، - دەپ حابارلادى تاۋ كۋرورتىنىڭ باسپا ءسوز قىزمەتى.

ەسكە سالايىق، بۇعان دەيىن شىمبۇلاققا بيىل وڭتۇستىك كورەيادان 15 مىڭعا جۋىق تۋريست كەلەتىنىن جازعانبىز.

اۆتور

دوسبول اتاجان