بۇل تۋرالى ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ءمالىم ەتتى.
- شىلدە ايىندا قازاقستان اۋماعىنىڭ باسىم بولىگىندە اۋا تەمپەراتۋراسى نورما شەگىندە بولادى دەپ بولجانىپ وتىر. باتىس قازاقستان، اتىراۋ، ماڭعىستاۋ وبلىستارىندا جانە اقتوبە ءوڭىرىنىڭ باسىم بولىگىندە تەمپەراتۋرا 1-2 گرادۋسقا ارتۋى مۇمكىن. شىعىس وڭىرلەردە جاۋىن-شاشىن نورمادان كوپ، ال سولتۇستىك جانە ورتالىق وڭىرلەردە نەگىزىنەن نورما شاماسىندا. بۇل رەتتە ەلدىڭ باتىسىندا بولجام بويىنشا جاۋىن- شاشىن نورمادان از بولادى،- دەدى ە. نىسانبايەۆ.
ونىڭ سوزىنە قاراعاندا، جالپى ۆەگەتاتسيالىق ماۋسىمنىڭ باستالۋى ەگىن ەگۋ جۇمىستارىن جۇرگىزۋگە جانە ءونىم قالىپتاستىرۋعا قولايلى دەپ باعالاندى.
- سونىمەن بىرگە، جاز ايلارىنا ارنالعان بولجام الدىن الا ەكەنىن ەسكەرگەن ءجون. بۇل رەتتە، مينيسترلىككە قاراستى «قازگيدرومەت» قىزمەتى وسى جىلدان باستاپ جاساندى ينتەللەكت ەلەمەنتتەرى بار سيفرلىق قۇرالداردى قولداناتىنىن اتاپ وتكەن ماڭىزدى. بۇل - ۆرف سيفرلىق مودەلى (WRF - Weather Research and Forecasting - اۋا رايىن ساندىق بولجاۋ مودەلى). ول 2 جانە 6 كيلومەترلىك كەڭىستىكتەردە 48 ساعات جانە 10 تاۋلىككە دەيىنگى كەزەڭگە بولجام جاساۋعا مۇمكىندىك بەرەدى. اتالعان تەحنولوگيالاردى پايدالانۋ بولجامداردىڭ، ونىڭ ىشىندە اگرومەتەورولوگيالىق جانە گيدرولوگيالىق، سونداي-اق داۋىلدى ەسكەرتۋلەردىڭ ناقتىلىعىن ارتتىرۋدى قامتاماسىز ەتەدى، - دەدى مينيستر.