سوتقا دەيىنگى تەرگەۋدى شىمكەنت قالاسى پوليتسيا دەپارتامەنتىنىڭ تۇران اۋداندىق پوليتسيا باسقارماسى جۇرگىزىپ جاتىر. كۇدىكتىنىڭ ارەكەتى ق ر قىلمىستىق كودەكسىنىڭ 306-بابىنىڭ 2-بولىگى بويىنشا سارالانعان. بۇل باپ بويىنشا قاۋىپسىزدىك تالاپتارىن بۇزا وتىرىپ قىزمەت كورسەتكەنى ءۇشىن 5 مىڭ ا ە ك-كە دەيىن (2026 -جىلى 21,6 ميلليون تەڭگە) ايىپپۇل سالۋ نەمەسە بەس جىلعا دەيىن باس بوستاندىعىنان ايىرۋ جازاسى كوزدەلگەن.
Kazinform ءتىلشىسى ءىستىڭ ءمان-جايىن ناقتىلاۋ ءۇشىن پوليتسيا دەپارتامەنتىنە، سوتقا جانە پروكۋراتۋراعا ساۋال جولدادى. پوليتسيا كۇدىكتىنىڭ ۋاقىتشا ۇستاۋ يزولياتورىندا وتىرعانىن راستادى.
سوت تەرگەۋ كەزەڭىندەگى شەكتەۋلەرگە بايلانىستى ءىستىڭ ءمان-جايىن جاريا ەتپەدى.
- ق ر قىلمىستىق-پروتسەستىك كودەكسىنىڭ 201-بابىنا سايكەس، ءىس سوتقا دەيىنگى تەرگەۋ ساتىسىندا بولعاندىقتان، مالىمەت بەرە المايمىز. قوسىمشا اقپارات الۋ ءۇشىن تەرگەۋ ورگاندارىنا نەمەسە پروكۋراتۋراعا جۇگىنۋدى سۇرايمىز، - دەپ حابارلادى سوت.
پروكۋراتۋرا سوت شەشىمى شىققانعا دەيىن قولدانىلاتىن ءتارتىپتى ءتۇسىندىردى.
- ادام 48 ساعاتقا دەيىن ۇستالۋى مۇمكىن. وسى مەرزىم اياقتالعانعا دەيىن تەرگەۋ سۋدياسى كۇدىكتىنى كۇزەتپەن ۇستاۋعا سانكتسيا بەرۋ نەمەسە ودان باس تارتىپ، وزگە بۇلتارتپاۋ شاراسىن قولدانۋ ماسەلەسىن قارايدى. قازىرگى ۋاقىتتا ماتەريال سۋديانىڭ قاراۋىنا ءالى تۇسكەن جوق، - دەپ ءتۇسىندىردى پروكۋراتۋرا.
ەسكە سالايىق، 10-قازان كۇنى كەشكە شىمكەنتتە قايرات نۇرتاستىڭ كونسەرتى باستالار الدىندا ستاديونعا كىرەبەرىستە ادامدار كوپ جينالىپ، سالدارىنان كورەرمەندەر زارداپ شەكتى. مەديتسينالىق كومەككە سەگىز ادام جۇگىندى. دارىگەرلەر تەكسەرگەننەن كەيىن ولاردىڭ جەتەۋى ۇيىنە جىبەرىلدى. ال 18 جاستاعى قىز اۋرۋحاناعا جاتقىزىلدى. 12-قازانداعى مالىمەت بويىنشا ونىڭ جاعدايى اۋىر.
پوليتسيانىڭ الدىن الا مالىمەتىنشە، ساتىلعان بيلەتتەر سانى الاڭنىڭ بەلگىلەنگەن سىيىمدىلىعىنان ەداۋىر اسىپ، كورەرمەندەردىڭ قاۋىپسىزدىگىنە قاتەر توندىرگەن. كونسەرت ۇيىمداستىرۋشىسى ۇستالىپ، ۋاقىتشا ۇستاۋ يزولياتورىنا قامالدى.
كونسەرتتەن كەيىن الەۋمەتتىك جەلىلەردە قازا تاپقاندار مەن كوپ ادامنىڭ زارداپ شەككەنى تۋرالى اقپارات تارادى. رەسمي ورگاندار بۇل مالىمەتتەردى جوققا شىعاردى. قازا تاپقان ءۇش ادام مەن جاراقاتتانعان ونداعان ادام تۋرالى جالعان اقپارات جاريالاعان ايەل جاۋاپكەرشىلىككە تارتىلدى.
وقيعادان كەيىن Freedom افيشا كومپانياسى ءدا وز ۇستانىمىن ءبىلدىردى. كومپانيانىڭ مالىمەتىنشە، كونسەرتتىڭ تىكەلەي ۇيىمداستىرۋشىسى Show Service بولعان. بيلەت ساتۋ سەرۆيسى بيلەتتەردى مالىمدەلگەن كۆوتا شەگىندە ساتىپ، سونداي-اق كورەرمەندەردىڭ بيلەتتەرىن تەكسەرىپ، بىلەزىكتەرىن تاراتۋعا جاۋاپتى ەرىكتىلەردىڭ جۇمىسىن قامتاماسىز ەتكەن.
Freedom افيشانىڭ مالىمدەۋىنشە، الاڭدى دايىنداۋ، كورەرمەندەردىڭ ستاديونعا كىرۋىن ۇيىمداستىرۋ جانە كۇزەت قىزمەتىن تارتۋ بيلەت سەرۆيسىنىڭ جاۋاپكەرشىلىك اياسىنا كىرمەگەن.