شىمكەنت قالاسىندا دەموگرافيالىق ءوسىم تۇراقتى جالعاسىپ كەلەدى. جىل باسىنان بەرى مەگاپوليستە 20 مىڭنان استام ءسابي دۇنيەگە كەلدى. ونىڭ ىشىندە 213 ەگىز جانە ءتورت ۇشەم تىركەلدى. بۇل كورسەتكىش قالا تۇرعىندارىنىڭ تابيعي ءوسىمى مەن انا مەن بالا دەنساۋلىعىن قورعاۋ باعىتىنداعى جۇمىستاردىڭ ماڭىزىن ايقىندايدى.
جۋىردا شىمكەنت قالالىق پەريناتالدىق ورتالىعىندا جەتى بالانىڭ اناسى 36 جاستاعى اجار تاشقارايەۆا ۇشەمدى دۇنيەگە اكەلدى. السيا، سافيا جانە ايمۇحاممەد ەسىمدى سابيلەردىڭ جاعدايى جاقسى. بۇعان دەيىن ەكى رەت ەگىز بوسانعان انا وسىلايشا ون بالانىڭ اناسى اتاندى. وتباسى دارىگەرلەردىڭ كومەگى مەن كورسەتكەن قامقورلىعىنا العىسىن ءبىلدىردى، - دەپ حابارلادى د س م باسپا ءسوز قىزمەتى.
قالالىق دەنساۋلىق ساقتاۋ باسقارماسىنىڭ مالىمەتىنشە، انا مەن بالا ءولىمى كورسەتكىشى 23,6 پايىزعا تومەندەگەن. بۇل باعىتتاعى وڭ ناتيجەگە جۇكتى ايەلدەردى ەرتە ەسەپكە الۋ، ۋاقتىلى دياگنوستيكالىق تەكسەرۋدەن وتكىزۋ، جۇكتىلىك بارىسىن تۇراقتى باقىلاۋ جانە بوساندىرۋ ۇيىمدارىندا مەديتسينالىق كومەكتىڭ ساپاسىن ارتتىرۋ ىقپال ەتەدى.
بۇگىندە قالادا بوساندىرۋ قىزمەتىن كورسەتەتىن ءتورت مەديتسينالىق ۇيىم جۇمىس ىستەيدى. ونىڭ ۇشەۋى ءۇشىنشى دەڭگەيدەگى، بىرەۋى ەكىنشى دەڭگەيدەگى پەريناتالدىق كومەك كورسەتەدى. مەديتسينالىق ۇيىمداردا جوعارى قاۋىپ توبىنا جاتاتىن جۇكتى ايەلدەرگە، مەرزىمىنەن بۇرىن دۇنيەگە كەلگەن سابيلەرگە جانە ەرەكشە كۇتىمدى قاجەت ەتەتىن نارەستەلەرگە ءتيىستى مەديتسينالىق كومەك كورسەتىلەدى، - دەلىنگەن مينيسترلىك حابارلاماسىندا.
سونىمەن قاتار مەملەكەت باسشىسىنىڭ تاپسىرماسىنا سايكەس، شىمكەنت قالاسىندا 200 ورىندىق جاڭا پەريناتالدىق ورتالىقتىڭ قۇرىلىسى جۇرگىزىلىپ جاتىر. زاماناۋي مەديتسينالىق كەشەن حالىقارالىق ستاندارتتارعا ساي سالىنىپ، زەرتحانالىق- دياگنوستيكالىق بولىمشەمەن جابدىقتالادى. قۇرىلىس جۇمىستارىن 2027 -جىلدىڭ ءتورتىنشى توقسانىندا اياقتاۋ جوسپارلانعان.
جاڭا ورتالىقتىڭ ىسكە قوسىلۋى بوساندىرۋ قىزمەتىنىڭ الەۋەتىن ارتتىرىپ، مەديتسينالىق ينفراقۇرىلىمدى دامىتۋعا، انا مەن بالاعا كورسەتىلەتىن كومەكتىڭ ساپاسى مەن قولجەتىمدىلىگىن جاقسارتۋعا مۇمكىندىك بەرەدى.
ايتا كەتەيىك، بۇعان دەيىن استانانىڭ سول جاعالاۋىندا بالالار اۋرۋحاناسى سالىناتىنى، وندا كىمدەر ەمدەلەتىنى جانە قاشان اشىلاتىنى حابارلاندى.