سوتتا انىقتالعانداي، 30 جاستاعى گۇلميرا ەرگەشوۆا بالالارىن ۇدايى ۇرىپ-سوعىپ، ولارعا فيزيكالىق ءارى پسيحولوگيالىق زورلىق كورسەتكەن.
ءىس ماتەريالدارىنا سايكەس، ايىپتالۋشى كامەلەتكە تولماعان بالالارىن جازالاۋدىڭ اسا قاتىگەز تاسىلدەرىن قولدانعان. اتاپ ايتقاندا، تۋعان ۇلىن ۇرىپ-سوعىپ، دەنە جاراقاتتارىن سالعان، كەيىن شانىشقىنى قىزدىرىپ، ونىڭ اۋزىن كۇيدىرىپ، ازاپتاعان.
- سونىمەن قاتار قىزدىرىلعان ۇتىكپەن ۇلىنىڭ بەتىن، قىزىنىڭ ءىشىن كۇيدىرگەن. ولاردى وزەنگە اپارىپ، مۇزداي سۋعا سەكىرۋگە ماجبۇرلەپ، تۇنشىقتىرعان. بالالاردىڭ شاشىن تاقىرلاپ الىپ، پسيحولوگيالىق زيان كەلتىرگەن، - دەلىنگەن قالالىق سوتتىڭ حابارلاماسىندا.
ۇكىم شىعارۋ كەزىندە سوتتالۋشى ءوزىنىڭ قاتىگەز ارەكەتىن ەنەسىمەن جانە جۇبايىمەن جىلدار بويى جالعاسقان جانجالدارمەن بايلانىستىردى. ايەلدىڭ ايتۋىنشا، وتباسى بالالارعا راسىمدەلگەن مەملەكەتتىك جاردەماقى ەسەبىنەن عانا كۇن كورگەن.
سوتتالعان ايەل بالالاردى شەتەلدە جۇمىس ىستەپ جۇرگەن كۇيەۋىنە جانە ەنەسىنە قايتارماۋدى سۇرادى. سونداي-اق ول بالالاردىڭ مەملەكەت قامقورلىعىندا قالۋىن ءوتىندى.
سوت گۇلميرا ەرگەشوۆانى كىنالى دەپ تانىپ، 5 جىل 3 اي مەرزىمگە باس بوستاندىعىنان ايىردى.
بۇدان بۇرىن شىمكەنتتە سوت بالالارىنا قاتىگەزدىك كورسەتكەن ايەلدى انا قۇقىعىنان شەكتەگەنىن جازعان ەدىك.