شىعىس وڭىرىنە گاز تارتۋ ماسەلەسى قاشان شەشىلەدى

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ۇلىقبەك تۇماشينوۆ ەلىمىزدىڭ سولتۇستىك جانە شىعىس وڭىرلەرىنە گاز تارتۋ ماسەلەسىن كوتەردى.

- شىعىس قازاقستاندا قىس مەزگىلى التى جارىم ايعا دەيىن سوزىلادى. قازىرگى تاڭدا شىعىس وڭىرىندەگى تۇرعىنداردىڭ باستى سۇراعى: «گازداندىرۋ ماسەلەسى قاشان شەشىلەدى؟». بۇل سۇراقتىڭ وزەكتىلىگى - سوڭعى جىلدارى كومىر باعاسىنىڭ شارىقتاۋىمەن جانە ونىڭ ساپاسىنىڭ سىن كوتەرمەۋىمەن بايلانىستى. اۋىلدىق جەرلەردە كومىر باعاسى 30 مىڭ تەڭگەگە دەيىن جەتتى، ال ونىڭ ساپاسى تۇرعىنداردى الاڭداتىپ وتىر. بيىلعى قىس مەزگىلىندە وسكەمەن قالاسىندا ەكولوگيالىق احۋالدىڭ ۋشىعۋى ناتيجەسىندە مەكتەپ وقۋشىلارى ون كۇن بويى ساباقتارىن قاشىقتان وقۋعا ءماجبۇر بولدى. بۇل جاعداي - كومىردىڭ تومەن ساپاسى مەن بالامالى ەكولوگيالىق تازا ەنەرگيا كوزدەرىنىڭ جەتىسپەۋشىلىگىنىڭ ايقىن كورىنىسى، - دەدى ۇ. تۇماشينوۆ پرەمەر-ءمينيستردىڭ اتىنا جولداعان ساۋالىندا.

ونىڭ ايتۋىنشا، بۇگىندە ەلىمىزدەگى گازداندىرۋ ماسەلەسى شىعىس قازاقستان، اباي، پاۆلودار جانە سولتۇستىك قازاقستان وبلىستارىنا قاتىستى. اسىرەسە، شىعىس قازاقستاننىڭ شەكارا ماڭىنداعى اۋداندارىن گازبەن قامتۋ - اسا وزەكتى.

- مامىر ايىندا زايسان اۋدانىنىڭ حالقىمەن كەزدەسۋ بارىسىندا تۇرعىندار گازداندىرۋ ماسەلەسىن تاعى دا كوتەردى. گاز كەنىشىنىڭ ۇستىندە وتىرىپ، كوگىلدىر وتىنعا قول جەتكىزە الماۋ - زايسان حالقى ءۇشىن تۇسىنىكسىز ءارى ادىلەتسىز جاعداي. اۋدانداعى گازدى يگەرىپ وتىرعان ينۆەستور گاز قورىنىڭ ازايىپ كەلە جاتقاندىعى جونىندە مالىمدەپ جاتىر، سوندىقتان مەملەكەتتىك ورگاندار زايساننىڭ كەيبىر ەلدى مەكەندەرىنە گاز قۇبىرىن تارتۋعا قارسى بولىپ وتىر. ولاي بولسا، حالىقتى گازبەن قامتۋدىڭ بالاما جولدارىن ويلاستىرۋ كەرەك. ول رەسەيدەن كەلەتىن نەمەسە قازاقستاننىڭ وڭتۇستىگىنەن كەلەتىن گازعا ماگيسترالدى قۇبىر تارتۋ ماڭىزدى. وسىعان وراي، سىزدەن حالىق ءۇشىن اسا ماڭىزدى بۇل ماسەلەنى جانە اتالعان وبلىستاردى گازداندىرۋدى كۇن تارتىبىنە قويۋىڭىزدى سۇرايمىن، - دەدى دەپۋتات.

بۇعان دەيىن ەنەرگەتيكا مينيسترلىگى قازىرگى تاڭدا سولتۇستىك ءوڭىردى گازداندىرۋ ماسەلەسىن شەشۋدە ەكى نەگىزگى جول قاراستىرىلىپ وتىرعانىن، ياعني وتاندىق گاز رەسۋرستارى مەن رەسەيدەن گاز يمپورتتاۋ پىسىقتالىپ جاتقانىن حابارلادى.