شىعىس قازاقستاندا سوڭعى ءبىر اپتادا 28 رەت جول جابىلدى
وسكەمەن. KAZINFORM - شىعىس قازاقستان وبلىسىندا سوڭعى ءبىر اپتادا اۋا رايى قولايسىزدىعىنا بايلانىستى 28 رەت جول جابىلدى.
وڭىردە سوڭعى جەتى كۇن بويى قاتتى جەل مەن قارلى بوران سوعىپ تۇر.
سونىڭ سالدارىنان وبلىستىق جانە رەسپۋبليكالىق ماڭىزى بار جولدار ءبىر اپتادا 28 رەت جابىلعان.
«شىعىس قازاقستاندا قار كوشكىنى قاۋپى دە ساقتالۋدا. «قازسەلدەنقورعاۋ» ش ق فيليالىنىڭ ماماندارى قاۋىپتى ۋچاسكەلەرگە باقىلاۋ جۇرگىزىپ جاتىر. سونداي-اق پروفيلاكتيكالىق ماقساتتا كوشكىن ءتۇسىرىپ جاتىر. قىس مەزگىلىنىڭ باسىنان بەرى بارلىعى 29 رەت جاساندى جولمەن قار كوشكىنى جۇرگىزىلگەن. ناتيجەسىندە 48300 تەكشە مەتر قار ءتۇستى»، - دەپ حابارلادى ش ق و توتەنشە جاعدايلار دەپارتامەنتىنەن.
وتكەن تاۋلىكتە قۇتقارۋشىلار شەمونايحا اۋدانىندا جەدەل جاردەم كولىگىنە كومەك كورسەتتى.
ونىڭ جۇرگىزۋشىسى رۋلگە يە بولا الماي قالىپ، كولىك جىراعا قۇلاعان.
«ايماقتا قاتتى جەل، كوكتايعاق جالعاسىپ جاتىر. وسى رەتتە، ازاماتتاردان داۋىلدى ەسكەرتۋ جاريالانعان كەزدە ەلدى مەكەندەردەن الىس جولعا شىقپاۋدى سۇرايمىز»، - دەلىنگەن اقپاراتتا.