شىعىس قازاقستاندا سۋ تاسقىنىنىڭ ەكىنشى كەزەڭى باستالدى
وسكەمەن. KAZINFORM - شىعىس قازاقستان وبلىسىندا سۋ تاسقىنىنىڭ ەكىنشى كەزەڭى باستالدى.
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، بۇگىنگى تاڭدا ءوڭىر اۋماعىنىڭ 44 پايىزىندا ءالى قار جاتىر.
«تاۋلى ايماقتاردا جانە تاۋلاردىڭ وڭتۇستىك بەتكەيلەرىندە قار ەرۋىنە بايلانىستى وبلىستا سۋ تاسقىنىنىڭ ەكىنشى تولقىنى باستالدى. سولتۇستىك، سولتۇستىك- شىعىس جانە شىعىس بولىكتەگى اۋداندار ەرەكشە باقىلاۋدا. ولار ريددەر قالاسى، التاي، سامار، مارقاكول، گلۋبوكوە، كاتونقاراعاي، كۇرشىم جانە شەمونايحا اۋداندارى» دەلىنگەن اقپاراتتا.
سۋ تاسقىنى قاۋپىن باقىلاۋ ءۇشىن تىكۇشاقپەن وسكەمەن-التاي-كاتونقاراعاي باعىتى بويىنشا اەروۆيزۋالدى مونيتورينگ جۇرگىزىلدى.
وعان وبلىس اكىمىنىڭ ورىنباسارى باقىتجان باياحمەتوۆ، ش ق و ت ج د باستىعى ەرعالي باحايەۆ جانە باسقا دا مۇددەلى ورگانداردىڭ ماماندارى قاتىستى.
«سونىڭ ناتيجەسىندە، سارىمساقتى تاۋىنىڭ وڭتۇستىك بوكتەرىنىڭ تازا ەكەنى بەلگىلى بولدى. زۋبوۆسك جانە مالەيەۆسك كەنتتەرىندەگى وزەندە جۇرگىزىلگەن جاعالاۋدى نىعايتۋ جۇمىستارى قارالدى. قازىر شىعىس قازاقستانداعى بارلىق گيدروتەحنيكالىق قۇرىلىستار شتاتتىق رەجيمدە جۇمىس ىستەپ تۇر» دەلىنگەن حابارلامادا.
جەرگىلىكتى اتقارۋشى ورگاندار كانالداردى، ارىقتاردى جانە كوپىرلەردى تازارتۋ بويىنشا جوسپارلانعان جۇمىستاردى تولىقتاي جۇرگىزدى. جاعالاۋدى نىعايتۋ جانە وزەندەردىڭ ءتۇبىن تەرەڭدەتۋ، ىدىس- قاپتاردى توسەۋ جۇمىستارى جالعاسىپ جاتىر.