شىعىس قازاقستاندا قوس ازاماتتىقپەن جۇرگەن 16 ادام انىقتالدى

وسكەمەن. KAZINFORM - شىعىس قازاقستان وبلىسىندا قوس ازاماتتىقپەن جۇرگەن 2 ادام ەلدەن شىعارىلدى.

ءوڭىردىڭ پوليتسيا قىزمەتكەرلەرى ەكى ەلدىڭ تولقۇجاتىمەن جۇرگەندەردى جاۋاپقا تارتىپ جاتىر. جىل باسىنان بەرى باسقا مەملەكەتتىڭ ازاماتتىعىن العانى تۋرالى ىشكى ىستەر ورگاندارىنا حابارلاماعان 16 ادام انىقتالىپ، ولاردىڭ ەكەۋى ەلدەن شىعارىلدى.

- ماسەلەن، تۇرعىنداردىڭ ءبىرى 2021 -جىلى كورشى ەلدىڭ ازاماتتىعىن العانىمەن، بۇل تۋرالى قازاقستاننىڭ كوشى-قون قىزمەتىنە بەلگىلەنگەن مەرزىمدە حابارلاماعان. ونىڭ ايتۋىنشا، قۇجاتتاردى تاپسىرۋ قاجەتتىگىن بىلمەگەن جانە وتباسىلىق جاعدايلار قازاقستانعا ۋاقتىلى ورالۋىنا مۇمكىندىك بەرمەگەن. سوت ونى ەلدەن شىعارۋ تۋرالى شەشىم شىعاردى، - دەپ حابارلادى ش ق و پوليتسيا دەپارتامەنتىنەن.

ايتا كەتەيىك، 2025 -جىلدىڭ ناۋرىز ايىنان باستاپ قازاقستاندا ازاماتتىعىنان ايىرىلعان تۇلعالاردىڭ ق ر قۇجاتتارىن پايدالانۋىنا قاتىستى زاڭناماعا وزگەرىستەر ەنگىزىلىپ، جاۋاپكەرشىلىك كۇشەيتىلدى. ەندى اتالعان قۇقىقبۇزۋشىلىق ءۇشىن ايىپپۇل مولشەرى 100 ا ە ك-تەن 200-گە دەيىن ارتتى.

- باسقا ەلدىڭ ازاماتتىعىن العان ادامدار 30 كۇن ىشىندە كوشى-قون قىزمەتىنە حابارلاپ، بۇرىنعى ازاماتتىعىن راستايتىن قۇجاتتاردى تاپسىرۋعا مىندەتتى ەكەنىن ەسكەرتەمىز. بۇل تالاپتى بۇزعانى ءۇشىن اكىمشىلىك جاۋاپكەرشىلىك قاراستىرىلعان، - دەلىنگەن اقپاراتتا.

اۆتور

تالعاتجان مۇحامەتبەك ۇلى