شىعىس قازاقستاندا الاياقتار وزدەرىن كوممۋنالدىق قىزمەتكەر رەتىندە تانىستىرىپ ءجۇر

وسكەمەن. KAZINFORM - شىعىس قازاقستان وبلىسىندا الاياقتار حالىقتى الداۋدىڭ جاڭا ادىسىنە كوشتى. ەندى ولار تۇرعىندارعا تەلەفون شالىپ، وزدەرىن كوممۋنالدىق قىزمەتكەر رەتىندە تانىستىرىپ ءجۇر.

سوڭعى كۇندەرى ءوڭىر جۇرتشىلىعىنا قوڭىراۋ شالعان الاياقتار وزدەرىن وڭىرلىك ەلەكتر كومپانياسىنىڭ قىزمەتكەرى رەتىندە تانىستىرا باستادى. ءسوز اراسىندا حالىققا ەلەكتر ەسەپتەگىشتەرىن تەگىن اۋىستىرىپ بەرەتىندىكتەرىن العا تارتادى.

وسىلاي سەنىمگە كىرىپ الادى دا ۇيالى تەلەفونعا حابارلاما جىبەرگەندەرىن ايتادى. ءسويتىپ سونداعى كودتى ايتىپ جىبەرۋلەرىن سۇرايدى. ال كودتى بىلگەن سوڭ اتىنا قاس قاعىمدا نەسيە راسىمدەپ جىبەرەدى.

«ءبىزدىڭ كومپانيا قىزمەتكەرلەرى ەش ۋاقىتتا حالىققا حابارلاسىپ، كود سۇرامايدى. بۇل - الاياقتار. وسى ارقىلى ءسىزدىڭ جەكە دەرەكتەرىڭىزگە قول جەتكىزىپ الماقشى. سوندىقتان دا بارىنشا اباي بولىڭىزدار»، - دەپ حابارلادى «و ە ك» ا ق- دان.

ەسكە سالساق، وسىعان دەيىن شقو تۇرعىندارىن الداپ، 106 ميلليون تەڭگە پايدا كورگەن ەكى الاياقتىڭ جازاسى قاتاڭداتىلعانى حابارلانعان.