شىعىس قازاقستاندا 40 مىڭ تەڭگە پارا العان پوليتسەي تۇرمەگە قامالدى

وسكەمەن. KAZINFORM - شىعىس قازاقستان وبلىسى گلۋبوكوە اۋدانىندا پارا العان پوليتسەي مەن وعان اقشا بەرگەن جۇرگىزۋشى سوتتالدى.

پاترۋلدىك پوليتسيا باتالونىنىڭ ينسپەكتورى ارىپتەسىمەن بىرگە وسكەمەن- شەمونايحا تاسجولىندا قىزمەتتىك كولىگىمەن كەزەكشىلىكتە جۇرگەن. ولار گلۋبوكوە كەنتىنە بۇرىلاتىن تۇستا جەڭىل كولىكتىڭ «گازەلدى» باسىپ وزۋ ءۇشىن قارسى جولاققا شىعىپ كەتكەنىن بايقادى.

سوت بارىسىندا انىقتالعانداي، ينسپەكتور ك. كولىكتى توقتاتىپ، جۇرگىزۋشىنى قىزمەتتىك كولىككە شاقىرعان. سودان سوڭ جۇرگىزۋشىگە ق ر ا ق ب ت ك-نىڭ 596-بابى 3-بولىگى (قارسى قوزعالىس جولاعىنا شىعۋ) بويىنشا حاتتاما تولتىرىلاتىنى تۋرالى ەسكەرتكەن.

- الايدا ەر ادام جۇرگىزۋشى كۋالىگىنەن ايىرىلعىسى كەلمەگەندىكتەن حاتتاما تولتىرماۋدى وتىنگەن. وسى ءۇشىن ينسپەكتور ودان 40 مىڭ تەڭگە سۇراعان. جۇرگىزۋشى بۇل سومانى ءوزى اۋدارا الماعان سوڭ، تانىسىنا حابارلاسىپ، جاعدايدى ءتۇسىندىرىپ، پوليتسەيدىڭ بانكتەگى شوتىنا اقشا اۋدارىپ بەرۋىن وتىنگەن، - دەپ حابارلادى گلۋبوكوە اۋداندىق سوتتىڭ باسپا ءسوز قىزمەتىنەن.

وسىلايشا ءۇش ادام سوتتالدى: پوليتسەي - پارا العانى ءۇشىن، جۇرگىزۋشى - پارا بەرگەنى ءۇشىن، ال ونىڭ تانىسى - پارا بەرۋگە كومەكتەسكەنى ءۇشىن.

- سوت شەشىمىمەن پوليتسيا قىزمەتكەرى 1 جىلعا تۇرمەگە قامالدى. ال كولىك جۇرگىزۋشىسى مەن ونىڭ تانىسى 7 اي مەرزىمگە باس بوستاندىقتارىنان ايىرىلدى، - دەلىنگەن اقپاراتتا.

سوتتالۋشىلار بۇل شەشىممەن كەلىسپەي اپەللياتسيالىق شاعىم ءتۇسىردى. ناتيجەسىندە وبلىستىق سوت جۇرگىزۋشى مەن ونىڭ تانىسىنا تاعايىندالعان جازا ءتۇرىن باس بوستاندىعىنان ايىرۋدان - باس بوستاندىعىن شەكتەۋگە اۋىستىردى.

ەسكە سالساق، وسىعان دەيىن ريددەر تۇرعىنى تەمەكى تۇقىلىن تاستاعانى ءۇشىن سالىنعان ايىپپۇلمەن كەلىسپەي، پوليتسەيلەردى سوتقا بەرگەنى حابارلانعان.

اۆتور

تالعاتجان مۇحامەتبەك ۇلى