التايدا كولىك ايداعان ادامنىڭ قانىنان ەسىرتكى تابىلدى

وسكەمەن. KAZINFORM - شىعىس قازاقستان وبلىسى التاي اۋدانىندا ەسىرتكى قابىلداپ العان ادام كوشەدە كولىك ايداعان.

ءتارتىپ ساقشىلارى التاي اۋدانى جاڭا بۇقتىرما كەنتىنىڭ كوشەلەرىن پاترۋلدەۋ كەزىندە ءجۇرىسى كۇدىك تۋدىرعان اۆتوكولىكتى توقتاتتى. 35 جاستاعى جۇرگىزۋشى مەديتسينالىق كۋالاندىرۋدان وتكەننەن كەيىن، ونىڭ ەسىرتكىگە ماس كۇيدە بولعانى انىقتالدى.

«سونىمەن قاتار ازاماتتىڭ ناۋرىز ايىندا سوت شەشىمىمەن 7 جىل مەرزىمگە كولىك قۇرالىن باسقارۋ قۇقىعىنان ايىرىلعانى بەلگىلى بولدى. وسىعان قاراماستان ول قايتادان كولىك تىزگىنىنە وتىرعان»، - دەلىنگەن ش ق و پوليتسيا دەپارتامەنتى تاراتقان اقپاراتتا.

اتالعان فاكتى بويىنشا قىلمىستىق ءىس قوزعالدى. قازىرگى ۋاقىتتا ەر ادام ۋاقىتشا ۇستاۋ يزولياتورىنا قامالدى.

وسى رەتتە، پوليتسەيلەر جول قوزعالىسىنا قاتىسۋشىلارعا ماس كۇيدە كولىك ايداۋدىڭ قايعىلى جاعدايعا دۋشار قىلۋى مۇمكىن ەكەنىن قاتاڭ ەسكەرتەدى.

اۆتور
تالعاتجان مۇحامەتبەك ۇلى