شىعىس قازاقستان تۇرعىندارىنا قانشا توننا كومىر قاجەت جانە باعاسى قانشا

وسكەمەن. KAZINFORM - جايدارى جاز ءبىتىپ، جىلىتۋ ماۋسىمى دا تاياپ قالدى. حالىق كومىر الىپ، قىسقا قامدانا باستادى. وسى رەتتە، شىعىس قازاقستان وبلىسىنداعى جۇرتشىلىققا قانشا توننا وتىن قاجەت، ونى قاي جەرلەردەن الۋعا بولادى، باعاسى قانشا دەگەن سۇراقتاردىڭ جاۋابىن ىزدەپ كوردىك.

ءوڭىر بويىنشا حالىققا جانە جىلۋ كوزدەرى ءۇشىن كومىر جەتكىزۋ «قاراجىرا» ا ق جانە «ق ت ج ۇ ك» ا ق- مەن بىرلەسىپ بەكىتىلگەن كەستە بويىنشا جۇزەگە اسىرىلادى. بۇل تۋرالى Kazinform ءتىلشىسىنىڭ سۇراقتارىنا جاۋاپ بەرگەن شىعىس قازاقستان وبلىسى ەنەرگەتيكا جانە تۇرعىن ءۇي- كوممۋنالدىق شارۋاشىلىق باسقارماسىنىڭ باسشىسى نۇرلان رامازانوۆ ءمالىم ەتتى.

«وبلىستا حالىق پەن زاڭدى تۇلعالار ءۇشىن كومىردى 22 وڭىرلىك وپەراتور ساتادى. بايلانىس دەرەكتەرى مەن وتىن ساتۋ ورىندارىنىڭ مەكەنجايلارى كورسەتىلگەن وڭىرلىك وپەراتورلاردىڭ تىزبەسى باسقارمانىڭ رەسمي سايتىندا جاريالانعان. شىعىس قازاقستان وبلىسى تۇرعىندارى ءۇشىن كومىرگە قاجەتتىلىك - 440069 توننا، بيۋدجەتتىك ۇيىمدار ءۇشىن - 39,5 مىڭ توننا. بۇگىنگى تاڭدا حالىق ءۇشىن 216,4 مىڭ توننا، بيۋدجەتتىك ۇيىمدار ءۇشىن 37,3 مىڭ توننا كومىر جەتكىزىلدى»، - دەيدى باسقارما باسشىسى.

قىركۇيەك ايىنىڭ باسىنداعى جاعداي بويىنشا وبلىس تۇيىقتارىندا 15,9 مىڭ توننا كومىر بار. ونىڭ ىشىندە:

وسكەمەن قالاسىندا - 7609 توننا

ريددەر قالاسىندا - 205 توننا

التاي اۋدانىندا - 2240 توننا

گلۋبوكوە اۋدانىندا - 3300 توننا

شەمونايحا اۋدانىندا - 2487 توننا.

كومىردىڭ باعاسى - ورتا ەسەپپەن 15800-22000 تەڭگە ارالىعىندا.

ايماقتاعى جىلۋ جەلىلەرىن جوندەۋ جۇمىستارى اياقتالۋعا جاقىن. بۇگىنگى كۇنى جوسپارلانعان 67,3 شاقىرىمنىڭ 55,6 شاقىرىمى جوندەلدى. بۇل دەگەنىمىز - �. كومىردىڭ باعاسىن، الىپ جاتقان حالىقتىڭ از-كوپتىگىن ءبىلۋ ءۇشىن وسكەمەننىڭ سول جاعالاۋ شاعىن اۋدانىندا ورنالاسقان كومىر ساتاتىن تۇيىققا بارىپ كوردىك. «توپليۆنايا كومپانيا تەرمينال» ج ش س ديرەكتورى مانسۇر بەكباۋوۆتىڭ ايتۋىنشا، قارا وتىن الۋعا كەلىپ جاتقاندار سانى ونشا كوپ ەمەس.

«بىزگە كومىر 10 ۆاگونمەن كۇندەلىكتى جەتكىزىلىپ جاتىر. ءبىراق حالىق ازداۋ. تاڭەرتەڭ 30-40 ادام كەلسە، تۇستەن كەيىن كەلەتىندەر ساۋساقپەن سانارلىقتاي. كومىردىڭ ءبىر تونناسىنىڭ باعاسى - 15800 تەڭگە. بىلتىرعىمەن سالىستىرعاندا 600 تەڭگەگە قىمباتتادى. بۇل تاسىمالداۋعا كەتەتىن شىعىننىڭ ارتۋىنا بايلانىستى بولىپ وتىر. الەۋمەتتىك كومىردىڭ باعاسى تونناسىنا - 15300 تەڭگە»، - دەيدى ول.

بۇل تۇيىقتاعى قويمادا 3 مىڭ توننا كومىر بار. جىلدا قىركۇيەك ايىنىڭ اياعى مەن قازان ايىندا كومىرگە دەگەن سۇرانىس كۇرت ءوسىپ، ۇزىن-سونار كەزەك قالىپتاسادى.

«كومىردى اباي وبلىسىنداعى قاراجىرا كومىر كەن ورنىنان ساتىپ الامىز. دەگەلەڭ ستانسياسى ارقىلى سەمەيدى باسىپ ءوتىپ وسىندا جەتكىزىلەدى. جۇرتشىلىقتى كومىردى ەرتەرەك ساتىپ الۋعا شاقىرامىن. سەبەبى كۇن سۋىتىپ، قار جاۋىپ كەتسە كومىرگە سۋ تيەدى»، - دەيدى مانسۇر بەكباۋوۆ.

قىس بويى كومىر جاعىپ شىعاتىن اۋىل تۇرعىندارىمەن بايلانىسىپ كوردىك.

«جەر ۇيدە تۇرامىز. جىل سايىن قاراشا ايىنىڭ اياعىندا 5 توننا كومىر ساتىپ الامىز. قاراجىرانىڭ كومىرىن اۋىلعا كاماز-بەن الىپ كەلەدى. ءبىر تونناسى - 30000 تەڭگە. جەتپەي قالادى. بىردەن جەتەتىندەي قىلىپ الايىق دەسەك قالتاعا سالماق ءتۇسىپ كەتەدى»، - دەيدى تارباعاتاي اۋدانى سارىولەڭ اۋىلىنىڭ تۇرعىنى نۇربول ساماتوۆ.

ۇلان اۋدانى ءىزعۇتتى ايتىقوۆ اۋىلىندا تۇراتىن ەربولات حامزا كومىردى جىل سايىن قاراشا ايىنىڭ ورتاسىندا ساتىپ الاتىنىن جەتكىزدى.

«كومىردىڭ باعاسى تونناسىنا - 14000-18000 تەڭگە ارالىعىندا. 14000 تەڭگە تۇراتىن كومىردىڭ ساپاسى ناشارلاۋ. سول ءۇشىن قىمباتىن الامىز. جىلىتۋ ماۋسىمى اياقتالعانعا دەيىن 8 توننا كومىر جاعامىز. كومىردى وسكەمەننەن ساتىپ الىپ، ءوزىمىز جەتكىزەمىز. ال اۋىلعا تاسيتىندارعا 5 توننا كومىر ءۇشىن 20 مىڭ تەڭگە تولەۋگە تۋرا كەلەدى. ال 5 توننادان كوپ الساڭ جەتكىزىپ بەرۋشىلەرگە 30 مىڭ تەڭگە تولەيسىڭ»، - دەيدى ول.

اۆتور

تالعاتجان مۇحامەتبەك ۇلى