شىعىس قازاقستاندا ساق قورعاندارىن زاڭسىز قازعاندارعا قاتىستى تەرگەۋ جۇرگىزىلىپ جاتىر

وسكەمەن. KAZINFORM - شىعىس قازاقستان وبلىسى زايسان اۋدانىنداعى ساق قورعاندارىن زاڭسىز قازۋ فاكتىسىنە قاتىستى قىلمىستىق ءىس قوزعالدى.

Фото: әл-Фараби атындағы Қазақ ұлттық университеті

«شاعانوبا» ارحەولوگيالىق كەشەنى اۋماعىندا بولعان وقيعاعا بايلانىستى وبلىس اكىمدىگىندە جينالىس ءوتتى. زايسان اۋدانى اكىمدىگىنىڭ مالىمەتىنشە، 13- قاراشادا وقيعا ورنىنا پوليتسيا قىزمەتكەرلەرى بارعان.

ارحەولوگيالىق كەشەن اۋماعىندا «SRS» ج ش س- نە تيەسىلى تەحنيكانى پايدالانىپ، بۇعان دەيىن قازىلعان شۇڭقىرلاردى توپىراقپەن كومۋ جۇمىستارى جۇرگىزىلگەنى انىقتالدى. وقيعا ورنىنداعى ازاماتتاردىڭ كىم ەكەنى انىقتالىپ، ءتيىستى ماتەريالدار پوليتسيادا تىركەلگەن.

- سول كۇنى تاريحي- مادەني مۇرانى قورعاۋ سالاسىنىڭ ماماندارى، ارحەولوگ، اۋدان اكىمدىگى مەن پوليتسيا وكىلدەرى اۋماقتى تەكسەردى. جەر قازۋ جۇمىستارىنىڭ ىزدەرى فوتو جانە ۆيدەوعا ءتۇسىرىلىپ، ءتيىستى اكت جاسالعان. الايدا قار جامىلعىسىنا بايلانىستى قورعانداردىڭ قازىرگى جاي-كۇيىن تولىق باعالاپ، كەلتىرىلگەن زالالدىڭ كولەمىن انىقتاۋ ازىرگە مۇمكىن بولماي وتىر. قوسىمشا زەرتتەۋ جۇمىستارى 2027 -جىلدىڭ كوكتەمىنە جوسپارلانعان. قاجەت بولعان جاعدايدا شۇعىل ارحەولوگيالىق- قۇتقارۋ جۇمىستارى ۇيىمداستىرىلادى، - دەپ حابارلادى ش ق و اكىمدىگىنەن.

ارحەولوگيالىق جۇمىستاردى زاڭسىز جۇرگىزۋ دەرەگى بويىنشا ق ر قىلمىستىق كودەكسىنىڭ 295-بابى 2-بولىگى 1 جانە 3-تارماقتارى نەگىزىندە قىلمىستىق ءىس قوزعالعان. اتالعان باپتا ادامدار توبىنىڭ الدىن الا ءسوز بايلاسۋى ارقىلى، سونداي-اق ارنايى تەحنيكالىق قۇرالدار مەن جەر قازۋ ماشينالارىن پايدالانىپ، ارحەولوگيالىق جۇمىستاردى زاڭسىز جۇرگىزگەنى ءۇشىن جاۋاپكەرشىلىك كوزدەلگەن. قازىر سوتقا دەيىنگى تەرگەۋ امالدارى جۇرگىزىلۋدە.

ەسكە سالساق، وسىعان دەيىن زايسان اۋدانىنداعى «شاعانوبا» ارحەولوگيالىق كەشەنىنىڭ قورعاندارىنا زاقىم كەلتىرىلۋى مۇمكىن ەكەنى تۋرالى الەۋمەتتىك جەلىلەردە تاراعان اقپاراتقا قاتىستى ش ق و اكىمدىگى جاۋاپ قاتقانى حابارلانعان.

اۆتورلار

بوتاكوز كەنجەحان قىزى