جاڭا جول وسينوۆ اسۋىنىڭ قاۋىپتى بۇرىلىستارىن اينالىپ وتۋگە مۇمكىندىك بەرەدى. بۇل تۋرالى كولىك مينيسترلىگى ءمالىم ەتتى.
شىعىس قازاقستان وبلىسىندا پيحتوۆكا وزەنى ارقىلى سالىنعان جاڭا كوپىرمەن كولىك قوزعالىسى سالتاناتتى تۇردە اشىلدى. ءىس-شاراعا قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى نۇرلىبەك نالىبايەۆ، شىعىس قازاقستان وبلىسىنىڭ اكىمى نۇرىمبەت ساقتاعانوۆ، كولىك ۆيتسە-ءمينيسترى دامير قوجاحمەتوۆ، «قازاۆتوجول» ۇ ك» ا ق باسقارما ءتوراعاسى دارحان يماناشيەۆ، جول سالاسى ۇيىمدارىنىڭ وكىلدەرى جانە باسقا دا قاتىسۋشىلار قاتىستى.
- بيىكتىگى 45 مەترگە جەتەتىن جاڭا كوپىردىڭ اشىلۋىمەن قاتار، رەسپۋبليكالىق ماڭىزى بار «وسكەمەن-التاي-ۇلكەن نارىن-كاتونقاراعاي-راحمان قاينارى» اۆتوجولىنىڭ 28 شاقىرىمىندا قايتا جاڭعىرتۋدىڭ نەگىزگى جۇمىستارى اياقتالدى. جاڭا جول وسينوۆ اسۋىنىڭ كۇردەلى بۇرالاڭ بولىگىن اينالىپ وتۋگە مۇمكىندىك بەرەدى. بۇل قوزعالىس قاۋىپسىزدىگىن ارتتىرىپ، وڭىردەگى ەلدى مەكەندەر مەن تۋريستىك نىساندارعا قاتىناۋدى جەڭىلدەتەدى، - دەلىنگەن ۆەدومستۆو حابارلاماسىندا.
جاڭا باعىتتاعى ەڭ ءىرى ينجەنەرلىك نىسان - پيحتوۆكا وزەنى ارقىلى سالىنعان ۇزىندىعى 175 مەترلىك كوپىر. ونىڭ تاۋ شاتقالىنداعى بيىكتىگى 45 مەترگە دەيىن جەتەدى. كوپىر جەتى ارالىق پەن سەگىز تىرەكتەن تۇرادى. قۇرىلىسىنا 79 تەمىربەتون پايدالانىلعان.
قۇرىلىس كۇردەلى تاۋلى جەردە جۇرگىزىلىپ، ارنايى ينجەنەرلىك شەشىمدەردى قاجەت ەتتى. اتاپ ايتقاندا، كوپىر تاۋ بەدەرىنىڭ ەرەكشەلىكتەرىنە قاراي يىلگەن باعىتتا سالىندى.
جاڭا جولدىڭ اشىلۋى شىعىس قازاقستان ءۇشىن ايرىقشا ماڭىزدى. وسينوۆ اسۋى ۇزاق جىلدار بويى رەسپۋبليكالىق جولداردىڭ ەڭ كۇردەلى بولىكتەرىنىڭ ءبىرى سانالىپ كەلدى. كۇرت بۇرىلىستار، ۇزاق ورلەر، قالىڭ قار مەن كوكتايعاق، اسىرەسە قىس مەزگىلىندە كولىك قوزعالىسىن ەداۋىر قيىنداتاتىن.
ەندى جۇرگىزۋشىلەر اسۋدىڭ ەڭ كۇردەلى بۇرالاڭ تۇستارىن اينالىپ وتە الادى. بۇل جىل بويى قاۋىپسىز ءارى تۇراقتى كولىك قاتىناسىن قامتاماسىز ەتۋگە قولايلى جاعداي جاسايدى.
- قايتا جاڭعىرتۋ اياسىندا 28 شاقىرىم جولدىڭ بويىنا جول نەگىزىنىڭ تومەنگى جانە جوعارعى قاباتتارى، سونداي-اق اسفالتبەتون جامىلعىسىنىڭ ەكى قاباتى تولىق توسەلدى، - دەپ حابارلادى مينيسترلىكتەن.
قۇرىلىس بارىسىندا 545 مىڭ تەكشە مەتر جەر جۇمىسى جانە 603 مىڭ تەكشە مەتر بۇرعىلاۋ-جارۋ جۇمىسى اتقارىلدى.
سونىمەن قاتار ەكى كوپىر مەن 38 سۋ وتكىزۋ قۇبىرى سالىندى. ونىڭ ىشىندە مال ايداپ وتكىزۋگە ارنالعان ەكى وتكەل بار. قۇرىلىسقا 135 مامان مەن 65 تەحنيكا جۇمىلدىرىلدى.
جولدىڭ جاڭارتىلۋى ءوڭىردىڭ الەۋمەتتىك-ەكونوميكالىق دامۋىنا دا وڭ ىقپال ەتەدى.
التاي، ۇلكەن نارىن جانە كاتونقاراعاي اۋداندارىنا قاتىناۋ جەڭىلدەپ، ىشكى تۋريزمدى، كاسىپكەرلىكتى جانە جۇك تاسىمالىن دامىتۋعا جاڭا مۇمكىندىكتەر اشىلادى.
پيحتوۆكا وزەنى ارقىلى وتەتىن كوپىردىڭ پايدالانۋعا بەرىلۋى مەن 28 شاقىرىم جولداعى نەگىزگى جۇمىستاردىڭ اياقتالۋى - شىعىس قازاقستاننىڭ كولىك ينفراقۇرىلىمىن جاڭعىرتۋداعى ماڭىزدى كەزەڭ.
ايتا كەتەيىك، بۇعان دەيىن جاڭا جولدىڭ ىسكە قوسىلۋى جول قوزعالىسىنىڭ قاۋىپسىزدىگىن ايتارلىقتاي ارتتىراتىنىن جازدىق. جاز مەزگىلىندە دەمالىس كۇندەرى عانا وسكەمەننەن بۇقتىرما سۋ قويماسىنا قاراي 20 مىڭنان استام اۆتوكولىك قاتىنايدى. جول پايدالانۋعا بەرىلگەننەن كەيىن جۇرگىزۋشىلەر قاۋىپتى وسينوۆ اسۋىن اينالىپ ءوتىپ، التاي، ۇلكەن نارىن جانە كاتونقاراعاي اۋداندارىنداعى تۋريستىك باعىتتارعا الدەقايدا جىلدام جەتە الادى.