ر. ب. سۇلەيمەنوۆ اتىنداعى شىعىس تانۋ ينستيتۋتىنىڭ باس ديرەكتورى دۇكەن ءماسىمحان ۇلى كونفەرەنسيادا قازاقستاننىڭ شىعىس ەلدەرىمەن تاريحي، مادەني جانە ەكونوميكالىق بايلانىسىن زەرتتەۋ نە ءۇشىن ماڭىزدى ەكەنىن ايتتى.
سوزىنشە، قازاقستان تاۋەلسىزدىك العاننان كەيىن باتىس جانە شىعىس ەلدەرىمەن ديپلوماتيالىق قارىم-قاتىناس ورناتا باستادى. سول سەبەپتى ۇكىمەتتىڭ الدىندا ەكى باتىس جانە شىعىستى زەرتتەۋ مىندەتى تۇردى دەيدى. وسىلايشا قازاقستاننىڭ شىعىس ەلدەرىمەن بايلانىستارىن عىلىمي تۇرعىدان زەرتتەيتىن جانە ۇلتتىق تاريحقا قاتىستى شەتەلدىك دەرەكتەردى انىقتاپ، عىلىمي اينالىمعا ەنگىزەتىن مامانداندىرىلعان عىلىمي مەكەمە قۇرىلدى.
- شىعىس ەلدەرىنىڭ تاريحىن، مادەنيەتىن، ءتىلى مەن ءدىنىن، قوعامدىق-ساياسي جانە الەۋمەتتىك-ەكونوميكالىق دامۋىن زەرتتەۋ - عىلىمي قىزىعۋشىلىق قانا ەمەس، ستراتەگيالىق مۇددەلەرمەن ساباقتاس ماڭىزدى مىندەت. ەكى جارىم جىلدىق وتارشىلدىق كەزەڭدە ءبىز تاريحي جادىمىزدان ايىرىلىپ قالدىق. ال شىعىس مادەنيەتىندە بىزدە ۇمىت بولعان ءتىلىمىز، وركەنيەتىمىزدى تابا الامىز، - دەدى ول.
ايتۋىنشا، شىعىس ەلدەرىن زەرتتەۋ ارقىلى قازاقستان ءوزىنىڭ ەجەلگى تاريحىنىڭ ۇمىت بولعان جاۋھارىن تابا الادى. ناتيجەسىندە ەجەلگى تاريح، ورتا عاسىر، التىن وردا كەزەڭى جانە قازاق حاندىعىنا قاتىستى مىڭداعان ەڭبەك شىعىس ەلدەرىنىڭ ارحيۆىنەن الىندى دەيدى.
- 30 جىل - ءبىر بەلەس. كونفەرەنسيادا قازاقستان 30 جىلدا شىعىستى زەرتتەۋ ارقىلى قانداي ناتيجەگە جەتكەنىن، نە انىقتاعانىن حالىققا پاش ەتەمىز، بۇگىن ەسەپ بەرەمىز، - دەدى شىعىس تانۋ ينستيتۋتىنىڭ باس ديرەكتورى.
كونفەرەنسيا بارىسىندا قازاقستان مەن شىعىس ەلدەرىنىڭ ساياسي-ەكونوميكالىق جانە مادەني ىنتىماقتاستىعى، ايماقتىق قاۋىپسىزدىك، حالىقارالىق ۇيىمدار اياسىنداعى سەرىكتەستىك، جىبەك جولىنىڭ تاريحي ماڭىزى، سونداي-اق ورتالىق ازياداعى ءدىني احۋال مەن تۇركىتىلدەس مەملەكەتتەردىڭ ينتەگراتسياسى ماسەلەلەرى تالقىلانباق.
سونداي-اق ينستيتۋتتىڭ 30 جىلدىعىنا ارنالعان «وردالى وتىز جىل» كىتاپ-البومى مەن كونفەرەنسيا ماتەريالدارىنىڭ جيناعى تانىستىرىلىپ، عىلىمي جاريالانىمدار كورمەسى ۇيىمداستىرىلادى.
ەسكە سالساق، قازاقستاننىڭ زايىرلىلىق تاجىريبەسى ۆارشاۆاداعى ە ق ى ۇ كونفەرەنسياسىندا تانىستىرىلدى.