شي جينپيڭ مەن دونالد ترامپ قىتايدا كەزدەستى

استانا. KAZINFORM — قىتاي ءتوراعاسى شي جينپيڭ مەن ا ق ش پرەزيدەنتى دونالد ترامپ شىنجىن قالاسىندا كەلىسسوز وتكىزىپ، ەكى ەل اراسىنداعى قارىم-قاتىناستى تۇراقتاندىرۋ ماسەلەسىن تالقىلادى. كەزدەسۋ ەكى ەل اراسىنداعى ساۋدا جانە تەحنولوگيا سالالارىنداعى قايشىلىقتار ساقتالىپ وتىرعان كەزەڭدە ءوتتى، دەپ حابارلايدى Kazinform اگەنتتىگىنىڭ ۆاشينگتونداعى مەنشىكتى ءتىلشىسى Channel NewsAsia باسىلىمىنا سىلتەمە جاساپ.

Фото: Channel News Asia

ازيا-تىنىق مۇحيتى ەكونوميكالىق ىنتىماقتاستىعى (اتەس) سامميتى اياسىنداعى جيىن شىنجىن قالاسىنىڭ سولتۇستىك-باتىسىنداعى، كول جاعاسىندا ورنالاسقان «شيلين» (QilinShanzhuang) ءساندى مەملەكەتتىك دەمالىس كەشەنىندە ءوتتى.

كەزدەسۋ الدىندا دونالد ترامپ كەلىسسوزدەردىڭ ناتيجەلى وتەتىنىنە سەنىم ءبىلدىرىپ، شي جينپيڭدى دوسى سانايتىنىن جانە ولاردىڭ اراسىندا ەرەكشە قارىم-قاتىناس بار ەكەنىن ايتتى.

ترامپتىڭ سوزىنشە، مامىر ايىندا بەيجىڭدە شي جينپيڭمەن قۇرۋعا كەلىسكەن ساۋدا كەڭەسى ەكى ەل اراسىنداعى ساۋدا قاتىناستارىنداعى تەڭسىزدىكتى ازايتۋعا ىقپال ەتكەن. سونداي-اق ول تاريفتەردى ءبولۋ ماسەلەسى ءادىل شەشىلگەنىن مالىمدەدى.

ال شي جينپيڭ ءوز سوزىندە قىتاي مەن ا ق ش اراسىنداعى قارىم-قاتىناس جالپى العاندا تۇراقتى ءارى جاقسارىپ كەلە جاتقانىن ايتتى. بۇعان قوسا ول ترامپپەن بىرلەسىپ، ەكى ەل بايلانىسىن ودان ءارى نىعايتۋعا دايىن ەكەنىن جەتكىزدى.

- ءبىز ستراتەگيالىق تۇراقتىلىققا نەگىزدەلگەن قىتاي-ا ق ش قاتىناسىنىڭ جاڭا ۇلگىسىن قالىپتاستىرىپ، ونى ءوزارا قۇرمەت، ادىلدىك پەن تەڭدىك قاعيداتتارىنا نەگىزدەلگەن جاڭا مازمۇنمەن تولىقتىردىق، - دەدى شي جينپيڭ.

كەزدەسۋ ءبىر ساعاتتان استام ۋاقىتقا سوزىلدى.

بۇل - شي جينپيڭ مەن دونالد ترامپتىڭ بيىلعى ءۇشىنشى كەزدەسۋى. بۇعان دەيىن ولار مامىردا بەيجىڭدە، قىركۇيەكتە ۆاشينگتوندا جۇزدەسكەن.

سونىمەن قاتار كەلىسسوزدەردە ا ق ش- تىڭ قىتايعا جاساندى ينتەللەكتىگە ارنالعان وزىق چيپتەردى جەتكىزۋگە قويعان شەكتەۋلەرى مەن بەيجىڭنىڭ ستراتەگيالىق ماڭىزى بار پايدالى قازبالار ەكسپورتىنا باقىلاۋى تالقىلاندى.

بىرنەشە رەت ۇزارتىلعان ساۋدا ءبىتىمىنىڭ مەرزىمى كەلەسى جىلدىڭ 10- قاڭتارىندا اياقتالادى. سوندىقتان ونىڭ ودان ءارى جالعاسۋى دا كەلىسسوزدەردەگى ماڭىزدى ماسەلەلەردىڭ ءبىرى بولدى.

ايتا كەتەيىك، بەيسەنبى كۇنگى كەلىسسوزدەر قارساڭىندا، سارسەنبىدە شي جينپيڭ دونالد ترامپتى اۋەجايدان جەكە ءوزى قارسى العان. بۇل - قىتاي ءتوراعاسىنىڭ 2013 -جىلى قىزمەتىنە كىرىسكەلى بەرى شەتەلدىك كوشباسشىنى اۋەجايدان العاش رەت قارسى الۋى.

سالتاناتتى قارسى الۋ راسىمىندە قۇرمەت قاراۋىلى ساپ تۇزەپ، اسكەري ۇشاقتار اۋەدە قالىقتادى. بۇل قىركۇيەكتە قىتاي ءتوراعاسى ا ق ش- قا مەملەكەتتىك ساپارمەن بارعاندا، ترامپتىڭ ونى ەندريۋس اسكەري بازاسىندا قارسى الۋىنا جاسالعان جاۋاپ بولدى.

ەكىجاقتى كەلىسسوزدەردەن كەيىن شي جينپيڭ، دونالد ترامپ جانە رەسەي پرەزيدەنتى ۆلاديمير پۋتيننىڭ قاتىسۋىمەن ءۇشجاقتى كەزدەسۋ ءوتتى. مۇنداي فورماتتاعى كەزدەسۋ بۇرىن-سوڭدى بولماعان ەدى.

بۇعان دەيىن ترامپ پەن پۋتين شىنجىندە كەلىسسوز جۇرگىزگەنىن جازعان بولاتىنبىز.