شي جينپيڭ ۆيزاسىز رەجيم تۋرالى: تۋىستار ءبىر- بىرىنە ءجيى قاتىناۋعا مۇمكىندىك الدى

 استانا. KAZINFORM - قىتاي حالىق رەسپۋبليكاسىنىڭ ءتوراعاسى شي جينپيڭ الداعى مەملەكەتتىك ساپار الدىندا قازاقستاننىڭ بۇقارالىق اقپارات قۇرالدارىنا ارناپ جازعان اۆتورلىق ماقالاسىندا قىتاي مەن قازاقستاننىڭ مادەني بايلانىسىنا ەڭبەك ەتىپ جۇرگەن قازاقتاردى اتادى.

«ءوزارا ۆيزاسىز رەجيم ەكى ەل ادامدارىنىڭ ءبىر- بىرىنە، تۋىستارىنا ءجيى ساپارلاۋىنا مۇمكىندىك بەردى. ەكى اراداعى ساپارلاردىڭ سانى بىلتىر 600 مىڭنان، ال بيىل العاشقى 3 ايدىڭ وزىندە 200 مىڭنان استى، جاڭا رەكورد تىركەلەتىن ءتۇرى بار. وڭىرلەر اراسىنداعى ارىپتەستىك تە قارقىن الىپ كەلەدى. اڭگىمە 26 باۋىرلاس قالانىڭ بايلانىسى تۋرالى بولىپ وتىر. قىتايلىق ناۋقاستاردىڭ اراسىندا زور قۇرمەت پەن بەدەلگە يە وفتالمولوگ دارىگەر س. قابىلبەكوۆ، سيرەك كەزدەسەتىن «پاندا قانى» توبىنىڭ دونورى رۋسلان تولەنوۆ، قىتايدا اسا تانىمال ءانشى ديماش جاڭا داۋىردەگى قىتاي- قازاقستان دوستىعىنىڭ ەلشىلەرىنە اينالدى»، - دەدى ول.

ق ح ر ءتوراعاسى بەيجىڭ مەن استانانىڭ تىعىز ىقپالداستىعى مەن قاتەرلەرگە قارسى بىرگە قابىلداعان جاۋاپتارى حالىقارالىق ارەنادا ءوز جەمىسىن بەرىپ جاتقانىن ايتادى.

«قىتاي مەن قازاقستاننىڭ حالىقارالىق جانە وڭىرلىك ىستەردەگى ۇستانىمى ۇقساس، ورتاق، كەشەندى، بىرلەسكەن ءارى ورنىقتى قاۋىپسىزدىك تۇجىرىمداماسىن ىسكە اسىرۋدى جاقتايدى. ەكى ەل دە جەر شارىندا بەيبىتشىلىك ورناتۋعا، جاھاندىق اۋقىمدا دامۋعا، ادىلەتتى الەمدىك تارتىپكە ۇمتىلادى. ءبىز «قىتاي- ورتالىق ازيا» فورماتىن قۇرىپ، ب ۇ ۇ، ش ى ۇ، ا ءو س ش ك اياسىندا جانە وزگە دە كوپجاقتى ديالوگ الاڭدارىندا تىعىز ىقپالداستىقتامىز. ءبىر- ءبىرىمىزدىڭ حالىقارالىق ىنتىماقتاستىق جونىندەگى كونسترۋكتيۆتى باستامالارىمىزدى بەلسەندى قولداپ، ورتاق ستراتەگيالىق مۇددەلەرىمىزدى، قاۋىپسىزدىك پەن دامۋ مۇددەلەرىن باتىل قورعاپ كەلەمىز»، - دەدى قىتاي باسشىسى.

سونداي- اق ماقالادا قىتايلىقتاردىڭ داستارحانىندا قازاقستاندىق ءونىم كوبەيە تۇسكەنى ايتىلعان.

بۇعان دەيىن حابارلانعانىنداي، 2-4-شىلدە كۇندەرى پرەزيدەنت قاسىم-جومارت توقايەۆتىڭ شاقىرۋىمەن قىتاي حالىق رەسپۋبليكاسىنىڭ ءتوراعاسى شي جينپيڭ قازاقستانعا مەملەكەتتىك ساپارمەن كەلەدى. ول سونداي- اق، شاڭحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24- وتىرىسىنا قاتىسادى.