شي جينپيڭ ورمۋز بۇعازى ارقىلى ەركىن ءوتۋدى قامتاماسىز ەتۋگە شاقىردى
استانا. KAZINFORM - قىتاي ءتوراعاسى شي جينپيڭ بۇل مالىمدەمەنى ساۋد ارابياسىنىڭ مۇراگەر حانزاداسى جانە پرەمەر- ءمينيسترى مۇحاممەد بەن سالمان ءال ساۋدپەن تەلەفون ارقىلى سويلەسۋ بارىسىندا ايتتى.
شي جينپيڭ قىتايدىڭ ساۋد ارابياسىمەن قارىم-قاتىناستاردى دامىتۋعا ۇلكەن ءمان بەرەتىنىن جانە ءارقاشان ءوزارا قۇرمەت، تەڭدىك جانە ءوزارا تيىمدىلىك قاعيداتتارىن ۇستانىپ كەلگەنىن اتاپ ءوتتى.
قىتاي مەن ساۋد ارابياسى اراسىندا جان-جاقتى ستراتەگيالىق ارىپتەستىك ورناعانىنا بيىل 10 جىل تولاتىنىن اتاپ وتكەن ول، وسى مۇمكىندىكتى پايدالانىپ، قىتاي ساۋد ارابياسىمەن بىرلەسىپ ستراتەگيالىق ءوزارا سەنىمدى تەرەڭدەتۋگە، پراكتيكالىق ىنتىماقتاستىقتى نىعايتۋعا، بارلىق دەڭگەيدەگى بايلانىستاردى جانداندىرۋعا، ەكىجاقتى ىنتىماقتاستىقتىڭ اۋقىمى مەن تەرەڭدىگىن كەڭەيتۋگە جانە قىتاي مەن اراب ەلدەرى اراسىنداعى قاتىناستاردى دامىتۋعا ۇلگى بولاتىن دەڭگەيگە جەتكىزۋگە دايىن ەكەنىن ايتتى.
تاياۋ شىعىس پەن پارسى شىعاناعى ايماعىنداعى قازىرگى جاعدايعا توقتالعان شي جينپيڭ قىتايدىڭ اتىستى دەرەۋ جانە تولىق توقتاتۋعا شاقىراتىنىن، بەيبىتشىلىكتى قالپىنا كەلتىرۋگە باعىتتالعان بارلىق كۇش-جىگەردى قولدايتىنىن جانە داۋلاردى ساياسي جانە ديپلوماتيالىق جولمەن شەشۋدى جاقتايتىنىن العا تارتتى.
شي جينپيڭ سونداي-اق ورمۋز بۇعازى ارقىلى كەدەرگىسىز ءوتۋدىڭ ءوڭىر ەلدەرى مەن حالىقارالىق قاۋىمداستىقتىڭ ورتاق مۇددەسىنە قىزمەت ەتەتىنىن ايتىپ، قىتايدىڭ ايماق ەلدەرىن تاتۋ كورشىلىك، دامۋ، قاۋىپسىزدىك جانە ىنتىماقتاستىققا نەگىزدەلگەن ورتاق ءۇي قۇرۋعا، ءوز بولاشاعى مەن تاعدىرىن وزدەرى ايقىنداۋعا جانە وڭىردە ۇزاق مەرزىمدى بەيبىتشىلىك پەن تۇراقتىلىقتى ىلگەرىلەتۋگە قولدايتىنىن جەتكىزدى.
بۇعان دەيىن يران ا ق ش تاراپىنان جالعاسىپ جاتقان تەڭىز بلوكاداسىنا بايلانىستى ورمۋز بۇعازىنىڭ قايتا جابىلعانىن مالىمدەدى.
سونىمەن قاتار، ۇلى بريتانيانىڭ تەڭىز ساۋدا وپەراتسيالارى باسقارماسى ورمۋز بۇعازىندا بولعان تانكەردىڭ يران يسلام ريەۆوليۋتسياسى ساقشىلارى كورپۋسىنا تيەسىلى ەكى كاتەردىڭ وزدەرىن اتقىلاعانىن حابارلاعان.