ۇشەۋى جانىپ كەتتى: اقتوبەدە ورتتەن كەيىن گاز قۇيۋ بەكەتىنىڭ يەسى قامالدى

اقتوبە وبلىستىق پ د باسپا ءسوز قىزمەتىنىڭ حابارلاۋىنشا، ورتتەن كەيىن بىردەن ءىس قوزعالدى.

- گاز قۇيۋ بەكەتىندە Honda ماركالى كولىك ورتەندى. وقيعا سالدارىنان ءۇش ادام، ايەل جانە ەكى كامەلەتكە تولماعان بالا قازا تاپتى. سونداي-اق ەر ادام كۇيىك شالىپ، مەديتسينالىق مەكەمەگە جەتكىزىلدى. ق ر قىلمىستىق كودەكسىنىڭ 281-بابى («جارىلىس قاۋپى بار وبەكتىلەردە قاۋىپسىزدىك قاعيدالارىن بۇزۋ») بويىنشا ءىس تىركەلدى. اۆتوگاز قۇيۋ ستانتسياسىنىڭ يەسى ۇستالىپ، ۋاقىتشا ۇستاۋ يزولياتورىنا قامالدى، - دەدى اقتوبە وبلىستىق پ د باستىعىنىڭ ورىنباسارى اسەت قاليەۆ. 

اۋرۋحاناعا 1972 -جىلعى ەر ادام جەتكىزىلگەن.

- دەنەسىنىڭ جوعارعى بولىگىن كۇيىك شالعان ناۋقاس جانساقتاۋ بولىمىنە ءتۇستى. ول اقتوبە قالالىق كوپبەيىندى اۋرۋحاناسىندا جاتىر. ەسىن بىلەدى، وزدىگىنەن دەم الىپ جاتىر. ەم تاعايىندالدى، - دەپ حابارلادى اقتوبە وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.

ايتا كەتەيىك، وقيعا كەشە تۇندە اقتوبە قالاسىندا بولدى. كولىك ىشىندە تىرىدەي جانىپ كەتكەن ءۇش ادامنىڭ ەكەۋى كامەلەت جاسقا تولماعان.