شوتىڭىز بەن مۇلكىڭىزدىڭ بۇعاتتالماعانىن قالاي تەكسەرۋگە بولادى

استانا. KAZINFORM - ادىلەت مينيسترلىگىنىڭ رەسمي وكىلى تالعات ءۋالي ۆەدومستۆونىڭ باسپا ءسوز ءماسليحاتىندا الاياقتار اراسنىدا شوت پەن مۇلىكتى بۇعاتتاۋ تۋرالى جالعان اقپاراتپەن قورقىتۋ ءتاسىلى جيىلەپ كەتكەنىن ءمالىم ەتتى.

«جالعان قىزمەتكەرلەر وزدەرىن سوت ورىنداۋشىسى رەتىندە تانىستىرىپ، ازاماتتاردان قارىزدارىن وتەۋدى تالاپ ەتۋدە. تالاپ ورىندالماعان جاعدايدا ولار جەكە شوتتاردى، مۇلىكتى بۇعاتتايتىنىن ايتىپ قورقىتۋدا. سىزگە وسىنداي قوڭىراۋ نەمەسە حابارلاما تۇسكەن جاعدايدا ادىلەت مينيسترلىگىنىڭ، رەسپۋبليكالىق جانە وڭىرلىك جەكە سوت ورىنداۋشىلار پالاتاسىنىڭ رەسمي سايتتارىنداعى اقپاراتتى ءوز بەتىڭىزشە تەكسەرىپ، قاجەت بولعان جاعدايدا بانككە حابارلاسۋدى ۇسىنامىز»، - دەدى رەسمي وكىل.

كەز كەلگەن ازامات ءوزىنىڭ شوتى مەن مۇلكى بۇعاتتالماعانىنا ينتەرنەت ارقىلى كوز جەتكىزە الادى. ول ءۇشىن ءۇشىن ينتەرنەت-براۋزەردىڭ ىزدەۋ جۇيەسىندە «اتقارۋشىلىق ءىس جۇرگىزۋدىڭ اۆتوماتتاندىرىلعان اقپاراتتىق جۇيەسى» دەپ جازۋ كەرەك. سودان كەيىن «بورىشكەرلەر مەن تىيىم سالۋلار ءتىزىلىمى» ءبولىمىن تاڭداپ، تەك ج س ن- نى ەنگىزۋ كەرەك.

«ەگەر ءسىز بورىشكەر بولساڭىز، وندا ءسىزدىڭ قارىزىڭىز تۋرالى اقپارات، سوت ورىنداۋشىسىنىڭ اتى- ءجونى جانە ونىڭ تەلەفون ءنومىرى كورسەتىلەدى. ەگەر ءسىز بورىشكەر بولماساڭىز، قىزعىلت سارى تۇسپەن «سۇراۋىڭىز بويىنشا ەشتەڭە تابىلمادى» حابارى پايدا بولادى. بۇل ءسىزدىڭ شوتتارىڭىز بەن مۇلىكتەرىڭىزدى ەشكىم بۇعاتتالماعان جانە بۇعاتتاي المايدى دەگەندى بىلدىرەدى. تەك رەسمي دەرەككوزدەرگە سەنىڭىز، جەكە دەرەكتەرىڭىزدى بەلگىسىز تۇلعالارعا بەرمەڭىز»، - دەدى تالعات ءۋالي.

قوسىمشا اقپاراتتى ۆەدومستۆونىڭ مىنا تەلەفوندارىنا حابارلاسىپ الۋعا بولادى: 119 نەمەسە 87172580058.