شۆەتسيا جاستارى دەربەس ومىرگە دايىن ەمەس

استانا. KAZINFORM - كوپتەگەن شۆەد جاستارى اتا-اناسىمەن بىرگە تۇرىپ، تۇرمىستىق شىعىندى تولەمەيدى.

AZERTAC اگەنتتىگىنىڭ حابارلاۋىنشا، Pengakollen-نىڭ جىل سايىنعى ەسەبىنە سايكەس، 19-29 جاس ارالىعىنداعى جاستاردىڭ 53 پايىزى تۇرعىن ۇيگە، ازىق-تۇلىككە جانە باسقا دا شىعىنعا اقى تولەمەيدى. جەكە قارجى سالاسىنداعى ساراپشىلاردىڭ پىكىرىنشە، بۇل جاعداي جاستاردىڭ ءوز بەتىنشە ءومىر ءسۇرۋ داعدىلارىنىڭ قالىپتاسۋىن قيىنداتۋى مۇمكىن.

ەسەپتەۋلەرگە قاراعاندا، ۇيدە تۇراتىن 20 جاستاعى ءبىر بالانىڭ شىعىنى ايىنا ورتا ەسەپپەن 7320 شۆەد كرونى (شامامەن 659 ا ق ش دوللارى) بولادى. الايدا جاستاردىڭ تەك 10 پايىزى عانا تۇرۋ ءۇشىن ايىنا 3000 كرون (شامامەن 310 دوللار) نەمەسە ودان كوپ تولەيدى، ال 28 پايىزى بۇل سومادان از تولەيدى. مۇنداي جاعدايدىڭ نەگىزگى سەبەپتەرى - اتا-انالاردىڭ بالالارىنا اقشا ۇنەمدەۋگە كومەكتەسۋگە ۇمتىلۋى جانە قارجىلىق ساۋاتتىلىقتىڭ ماڭىزدىلىعى جونىندەگى تۇسىنىكتىڭ جەتكىلىكسىزدىگى.

جاستاردىڭ جارتىسى تولىق جۇمىس ىستەسە دە، اتا-اناسىنان اقشالاي كومەك الادى. كوپ جاعدايدا اتا-انالار ۇيالى بايلانىس، ينتەرنەت، ستريمينگ قىزمەتتەرى مەن ازىق-تۇلىك شىعىندارىن تولەيدى. سونىمەن قاتار، ساۋالناماعا قاتىسقان جاستاردىڭ 36 پايىزى الداعى بەس جىل ىشىندە ءوز باسپاناسىن ساتىپ الاتىنىنا سەنبەيتىنىن ايتقان.

ساۋالناما ناتيجەلەرى جاستاردىڭ ومىرىندە شوپينگتىڭ ماڭىزدى ورىن الاتىنىن دا كورسەتتى. رەسپوندەنتتەردىڭ 61 پايىزى قىزىعۋشىلىقتارى مەن حوببيلەرىنە بايلانىستى تاۋار ساتىپ الاتىنىن ايتسا، جاستاردىڭ جارتىسىنا جۋىعى جەڭىلدىكتەر مەن ساتىلىمداردى بەلسەندى پايدالانادى. اسىرەسە قىزدار اراسىندا شوپينگتى جاعىمسىز ەموتسيالارمەن كۇرەسۋ ءادىسى رەتىندە پايدالاناتىندار كوپ. بۇل تۋرالى ساۋالناماعا قاتىسقانداردىڭ 19 پايىزى مالىمدەدى.

«قازىر ساتىپ ال - كەيىن تولە» قىزمەتتەرىنىڭ، الەۋمەتتىك جەلىلەر مەن ينفليۋەنسەرلەردىڭ تانىمالدىعى جاستاردىڭ ساتىپ الۋ بەلسەندىلىگىن ارتتىرىپ وتىر. ساراپشىلار جاستارعا مۇنداي قوسىمشالاردى جويۋدى، ەكران الدىندا وتكىزەتىن ۋاقىتتى شەكتەۋدى جانە «24 ساعات ەرەجەسىن» ۇستانۋدى ۇسىنادى.