شۆەتسيا 2 جاسقا تولماعان بالالارعا تەلەفون بەرمەۋدى ۇسىندى

استانا. KAZINFORM - شۆەتسيا ەكى جاسقا تولماعان كىشكەنتاي بالالارعا ۇيالى تەلەفون نەمەسە تەلەديدار ەكرانىن قاراۋعا تىيىم سالۋعا كەڭەس بەرەتىن جاڭا ەرەجە شىعاردى.

سينگاپۋردىڭ 8world رەسۋرسىنىڭ حابارلاۋىنشا، شۆەتسيانىڭ دەنساۋلىق ساقتاۋ مينيسترلىگى 2-قىركۇيەكتە دەنساۋلىق ساقتاۋدىڭ جاڭا نورماسىن ىسكە قوسقان.

ۆەدومستۆو ەكى جاستان بەس جاسقا دەيىنگى بالالاردىڭ ۇيالى تەلەفون نەمەسە تەلەديدار ەكرانىن كورۋگە جۇمسايتىن ۋاقىتىن كۇنىنە ءبىر ساعاتتان از ۋاقىتقا شەكتەۋدى ۇسىنادى.

ال 6 مەن 12 جاس ارالىعىنداعى بالالارعا - ەكى ساعات، 13 پەن 18 جاس ارالىعىنداعى جاسوسپىرىمدەردىكى - ءۇش ساعاتتان اسپاۋى كەرەك.

شۆەتسيا دەنساۋلىق ساقتاۋ مينيسترلىگى ءتىپتى 2 جاسقا تولماعان بالالار موبيلدى ويىندار مەن ۆيدەولار سياقتى سيفرلىق مەديادان اۋلاق بولۋى كەرەك دەپ مالىمدەدى.

«سيفرلىق ونىمدەر مەن قوسىمشالار بالالارىمىزدىڭ كۇندەلىكتى ومىرىنە ەنىپ كەتكەنىنە تىم ۇزاق بولدى»، - دەيدى شۆەتسيانىڭ دەنساۋلىق ساقتاۋ جانە الەۋمەتتىك ىستەر ءمينيسترى ياكوب فورسسمەد.

ونىڭ ايتۋىنشا، شۆەتسيادا 9 بەن 12 جاس ارالىعىنداعى جاسوسپىرىمدەر ساباقتان تىس ۋاقىتتا كۇنىنە ءتورت ساعاتقا دەيىن، ال 17 مەن 18 جاس ارالىعىنداعى جاستار جەتى ساعاتتان استام ۋاقىتىن ەكران الدىندا وتكىزەدى.

ياكوب فورسسمەد بۇل بالالاردىڭ ۋاقىتى مەن ەنەرگياسىن تاۋىسىپ، دەنە مەن اقىلعا پايدالى ارەكەتتەرگە كەتەتىن ۋاقىتتى ايتارلىقتاي قىسقارتادى دەپ سانايدى.

ب ا ق حابارلاۋىنشا، شۆەتسيا ۇكىمەتى باستاۋىش مەكتەپتە سمارتفونعا تىيىم سالۋدى قاراستىرىپ جاتىر.

اۆتور

مۇقتار مۇرات