بايقاۋ اياسىندا قاتىسۋشىلار قازاق اعارتۋشىسى ىبىراي التىنساريننىڭ كەز كەلگەن شىعارماسى نەگىزىندە مانەرلەپ وقۋ، تەاترلاندىرىلعان قويىلىم نەمەسە شىعارماشىلىق يمپروۆيزاتسيا فورماتىندا بەينەروليك دايىنداۋى ءتيىس.
ۇيىمداستىرۋشىلاردىڭ مالىمەتىنشە، بايقاۋعا جەكە قاتىسۋعا دا، ەكى ادامنان اسپايتىن توپتىق فورماتتا دا ءوتىنىم بەرۋگە بولادى. قاتىسۋشىلار ولەڭدەر، مۋزىكالىق شىعارمالار، دەكوراتسيالار، رەكۆيزيتتەر جانە تەاترلاندىرۋعا ارنالعان وزگە دە شىعارماشىلىق ەلەمەنتتەردى قولدانا الادى.
بەينەجازبا ۇزاقتىعى 1-4 مينۋت ارالىعىندا بولۋى قاجەت. سونىمەن قاتار قاتىسۋشىلار بەينەنىڭ ساپالى ءتۇسىرىلۋىن جانە دىبىستىڭ انىق ەستىلۋىن قامتاماسىز ەتۋى ءتيىس.
بەينەجازبامەن بىرگە ۇمىتكەرلەر 2026-جىلعى 28-مامىرعا دەيىن oqbaiqau@gmail.com ەلەكتروندى پوشتاسىنا اتى-ءجونىن، مەملەكەتىن، بايلانىس ءنومىرىن، تۋعان كۇنىن (جىلى، ايى، كۇنى) جانە شەتەلدىك پاسپورت كوشىرمەسىن جولداۋى قاجەت.
ۇزدىك جۇمىستار قوعامنىڭ الەۋمەتتىك جەلىلەرىندە جاريالانادى.
بايقاۋ جەڭىمپازدارىنا ارنايى ماراپات قاراستىرىلعان. ۇزدىك دەپ تانىلعان 15 قاتىسۋشى «JAS QAZAQ- 2026» جازعى تانىمدىق ەتنو-لاگەرىنە جولداما يەلەنەدى. جولداما ەكى اپتالىق وقۋ باعدارلاماسىن، تۇرۋدى، تاماقتانۋدى جانە ءتۇرلى ءىس-شارالارعا قاتىسۋدى قامتيدى. ال لاگەرگە بارىپ-قايتۋ جول اقىسى قاتىسۋشى ەسەبىنەن تولەنەدى.