شەتەلدىكتەرگە جەر بەرىلىپ جاتىر ما - مينيستر جاۋابى

استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ ۇكىمەتتە وتكەن بريفينگتە جەر ماسەلەسى تۋرالى تىلشىلەر سۇراعىنا جاۋاپ بەردى.

− ءالى كۇنگە دەيىن جەلىدە «قازاقستان قىتايعا كەڭ كولەمدە جەر تەلىمىن بەرەدى» دەگەن اقپارات ايتىلىپ ءجۇر. وسىعان بايلانىستى ءوز اۋزىڭىزدان ناقتى جاۋاپ ەستىگىمىز كەلەدى، − دەدى تىلشىلەر.

− شىنىندا جەر رەسۋرستارىن باسقارۋ كوميتەتى بىزدە. جەردى ءبىز باقىلاۋدا ۇستايمىز. ويتكەنى جەر كودەكسىنە بايلانىستى، شەتەلدىكتەرگە ەشقانداي جەر بەرىلمەيدى. ارەنداعا دا بەرىلمەيدى. سوندىقتان ەشقانداي جەر بەرىلىپ جاتقان جوق. ول فەيك. وندا ءوزىمىزدىڭ شارۋاشىلىقتار جۇمىسىن جاساپ جاتىر، − دەدى اۋىل شارۋاشىلىعى ءمينيسترى ايداربەك ساپاروۆ ۇكىمەتتە وتكەن بريفينگتە.

ايتا كەتەيىك، قىزىلوردادا مەملەكەت مەنشىگىنە وتكەن جەر شارۋالارعا بەرىلىپ جاتىر.

2024 -جىلى جەر رەسۋرستارىن باسقارۋ جونىندەگى كوميتەت جۇرگىزگەن تەكسەرۋلەردىڭ قورىتىندىسى بويىنشا 3,7 مىڭ اكىمشىلىك ءىس قوزعالىپ، 500 ميلليون تەڭگە ايىپپۇل سالىنعان.

سونداي-اق، ەكولوگيا جانە تابيعي رەسۋرستار ءمينيسترى ەرلان نىسانبايەۆ اۋا رايى بولجامدارىن بايانداپ، قۇرعاقشىلىق بولۋى مۇمكىن وڭىرلەردى اتادى جانە ەگىن ەگۋ جۇمىستارىن ەرتەرەك باستاۋدى ۇسىندى.