بۇل ساۋالعا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جاۋاپ بەردى.
- ەڭبەك نارىعىنا قاتىستى الاڭداۋشىلىق بولماۋى ءتيىس دەپ ويلايمىن، ەكونوميكا تۇرعىسىنان العاندا بەلگىلى ءبىر سەرپىن پايدا بولادى. سەبەبى ستۋدەنتتەر كەلگەندە، ولاردىڭ اتا-اناسى دا كەلەدى، بۇل ەكونوميكاعا ۇلەس، سەبەبى ولار پاتەر جالدايدى، ءتۇرلى قىزمەتتى پايدالانادى، - دەدى سۆەتلانا جاقىپوۆا ءماجىلىستىڭ جالپى وتىرىسىنان كەيىن وتكەن باسپا ءسوز ءماسليحاتىندا.
ءمينيستردىڭ مالىمدەۋىنشە، ستۋدەنتتىك ۆيزا بەرۋ پروتسەسى قۇقىق قورعاۋ ورگاندارى تاراپىنان باقىلانادى.
- ءبىر ستۋدەنت ەلىمىزدە جۇمىسقا تۇرسا، بىرنەشە جۇمىس ورنىن اشۋعا ىقپال ەتۋى مۇمكىن. سوندىقتان الاڭداۋعا سەبەپ جوق، - دەيدى ول.
ەسكە سالا كەتسەك، ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك شەتەلدىك ستۋدەنتتەرگە قازاقستاندا جۇمىس ىستەۋگە مۇمكىندىك بەرەتىن ۆيزا ەنگىزۋ تۋرالى مالىمدەگەن ەدى.