شەتەلدىك قوناقتاردى باۋراعان قازاقتىڭ بەس ۇلتتىق تاعامى

استانا. KAZINFORM - استانادا وتكەن 5-دۇنيەجۇزىلىك كوشپەندىلەر ويىندارى ۇلتتىق سپورت تۇرلەرىن ۇلىقتاپ، ۇلى دالانىڭ مادەني باي مۇراسىن كورسەتتى.

شەتەلدىك مەيماندار سپورتتىق جارىستاردان بولەك، قازاقتىڭ ءداستۇرلى تاعامدارىنا دا ەرەكشە ءتانتى بولدى. وتاندىق تۋروپەراتورلاردىڭ ساۋالداماسى نەگىزىندە ويىندارعا كەلگەن قوناقتاردىڭ ەسىندە قالعان بەس ۇلتتىق تاعامدى نازارلارىڭىزعا ۇسىنامىز.

1. بەسبارماق

ۇزدىك بەستىكتىڭ كوشباسشىسى، ارينە - بەسبارماق (ءار وڭىردە ءارتۇرلى ايتىلادى). بۇل ءداستۇرلى تاعام قايناتىلعان ەت پەن ۇلكەن ءتورتبۇرىشتى قامىردان (جايما/شەلپەك) جاسالادى. تاماقتىڭ نەگىزگى قۇرامىنا ءتورت تۇلىك مالدىڭ - قوي، سيىر، جىلقى جانە تۇيە ەتى كىرەدى. اسىرەسە، جىلقى ەتى (قازى، شۇجىق، جال، جايا) مەرەكەلىك داستارحاننىڭ ءسانىن كەلتىرەدى. شەتەلدىك قوناقتار بۇل تاعامنىڭ ءتىل ۇيىرەتىن ءدامىن ەرەكشە باعالادى.

2. باۋىرساق

ەكىنشى ورىندا - باۋىرساق. بۇل تاعام ءار قازاق داستارحانىندا مىندەتتى تۇردە بولادى. شەتەلدىك قوناقتار قامىردان جاسالىپ، مايدا قۋىرىلعان التىن تۇستەس جۇمساق تاعامنىڭ ەرەكشە دامىنە ءتانتى بولدى. اسىرەسە، شەتەلدىك مەيماندار شي باۋىرساقتى كادەسىي رەتىندە كوپتەپ ساتىپ الدى.

3. قىمىز

ءۇشىنشى ورىندا - قىمىز. بيە سۇتىنەن اشىتىلىپ دايىندالعان بۇل سۋسىننىڭ قىشقىلتىم ءدامى مەن ەمدىك قاسيەتتەرى تۋريستەردىڭ ەرەكشە قىزىعۋشىلىعىن تۋدىردى.

4. قۇرت

ءتورتىنشى ورىندا - قۇرت. ءسۇت ونىمىنە جاتاتىن قۇرتتىڭ تۇزدى ءدامى شەتەلدىك قوناقتارعا قاتتى ۇنادى.

5. شۇبات

ۇزدىك بەستىكتى شۇبات تۇيىندەدى. بۇل - تۇيە سۇتىنەن جاسالعان قويۋ سۋسىن. شۇبات - تۇيە شارۋاشىلىعى كەڭ دامىعان قازاقستاننىڭ باتىس جانە وڭتۇستىك وڭىرلەرىندە كەڭىنەن تانىمال.

«ەلىمىزدىڭ ۇلتتىق تاعامدارى - تەك تاماق قانا ەمەس، وتكەن مەن بۇگىندى بايلانىستىراتىن مادەني كوپىر. گاسترونوميالىق تۋرلار شەتەلدىك تۋريستەردىڭ قازاقستانعا جاساعان ساپارلارىنىڭ ماڭىزدى بولىگىنە اينالدى»، - دەدى قازاقستان رەسپۋبليكاسى تۋريزم جانە سپورت مينيسترلىگى تۋريزم يندۋسترياسى كوميتەتىنىڭ رەسمي وكىلى ايجان جولداسبەكوۆا.