شەتەلدىك جۋرناليستەر يزرايلدى گازاعا كىرۋگە رۇقسات بەرۋگە شاقىردى

استانا. KAZINFORM - اشىق حاتتا حالىقارالىق ب ا ق- تىڭ 55 قىزمەتكەرى يزرايلدى بارلىق شەتەلدىك جۋرناليستەردىڭ گازا سەكتورىنا ەركىن جانە كەدەرگىسىز كىرۋىن قامتاماسىز ەتۋگە شاقىردى.

حاتقا BBC ،Sky News ،ITV ،Channel 4 ،ABC ،CBS ،NBC جانە CNN سياقتى بريتاندىق جانە امەريكالىق حابار تاراتۋشىلاردىڭ تىلشىلەرى مەن جۇرگىزۋشىلەرى قول قويدى.

«گازادا سوعىس باستالعالى بەس ايعا جۋىق ۋاقىت وتسە دە، يزرايل اسكەري قىزمەتكەرلەرىنىڭ ەرىپ جۇرۋىمەن بولعان سيرەك جاعدايلاردى قوسپاعاندا، شەتەلدىك تىلشىلەرگە اۋماققا كىرۋگە تىيىم سالىنۋدا»، - دەلىنگەن حاتتا.

يزرايل اسكەريلەرىنىڭ مالىمدەۋىنشە، ولار گازاعا جۋرناليستەردى ولاردىڭ قاۋىپسىزدىگى ءۇشىن الىپ باراتىنىن ايتادى، ءبىراق بۇل ساپارلار قاتاڭ باقىلانىپ، كوبىنە حاماس سودىرلارى پايدالاناتىن تۋننەلدەردى نەمەسە قارۋ قويمالارىن كورسەتۋگە ارنالعان.

«قازىرگى كەزدە يزرايل ارمياسى حاماس لاڭكەستىك ۇيىمىنا قارسى سوعىسىپ جاتىر. جۋرناليستەردىڭ قاۋىپسىز حابارلاۋىن قامتاماسىز ەتۋ ءۇشىن ءبىز ولاردى ۇرىس دالاسىنا الىپ بارامىز»، - دەدى تساحال وكىلى.

حاتتا سونداي-اق مىسىر بيلىگىنەن مىسىر مەن گازا سەكتورىنىڭ شەكاراسىنداعى «رافاح» باقىلاۋ-وتكىزۋ بەكەتىنە كىرۋدى قامتاماسىز ەتۋ سۇرالدى.