شەتەلدىك ب ا ق-تاعى قازاقستان: بايدەنمەن كەزدەسۋ، ب ۇ ۇ-داعى توقايەۆتىڭ ۇندەۋى جانە كوشپەلى قازاقتاردىڭ تۇرمىسى

وسى اپتادا شەتەلدىك ب ا ق-تا ا ق ش-تا ورتالىق ازياداعى بەس مەملەكەت پرەزيدەنتتەرى قاتىسقان س5+1 سامميتى، قاسىم-جومارت توقايەۆتىڭ نيۋ-يوركتە ب ۇ ۇ باس اسسامبلەياسىنىڭ 78-سەسسياسىندا كوتەرگەن وزەكتى ماسەلەلەرى، تۇركى ينۆەستيتسيالىق قورىن قۇرۋ تۋرالى كەلىسىمنىڭ راتيفيكاتسيالانۋى جايلى ماقالالار جاريالاندى.

تولىعىراق تومەندەگى قازاقپارات ساراپشىسىنىڭ شولۋىنان وقي الاسىزدار.

Anadolu Agency: ب ۇ ۇ قاۋىپسىزدىك كەڭەسىندە «ورتا دەرجاۆالاردىڭ» جانە بارلىق دامۋشى ەلدەردىڭ ءۇنى كۇشەيۋى كەرەك - قازاقستان پرەزيدەنتى

20 قىركۇيەكتە تۇركيالىق Anadolu Agency باسىلىمى ق ر پرەزيدەنتى قاسىم-جومارت توقايەۆتىڭ نيۋ-يورك قالاسىندا ب ۇ ۇ باس اسسامبلەياسىنىڭ 78-سەسسياسى اياسىندا وتكەن جالپى دەباتتا سويلەگەن سوزىندەگى وزەكتى ماسەلەلەرگە نازار اۋداردى.

اگەنتتىكتىڭ جازۋىنشا، قاسىم-جومارت توقايەۆ حالىقارالىق داۋلاردى شەشۋدە ءارقاشان ديپلوماتيا مەن ديالوگ باسشىلىققا الىنۋى كەرەك ەكەنىن، قاۋىپسىزدىك كەڭەسىنە جان-جاقتى رەفورما جاساماي، بۇل قيىندىقتار ەڭسەرىلمەيتىنىن مالىمدەدى.

«كەڭەستە «ورتا دەرجاۆالاردىڭ» جانە بارلىق دامۋشى ەلدەردىڭ ءۇنى كۇشەيەتىنىنە، انىق ەستىلەتىنىنە كامىل سەنەمىن. بايقاۋىمىزشا، قاۋىپسىزدىك كەڭەسى تىعىرىقتان شىعا المايتىن سياقتى. سوندىقتان بەيبىتشىلىك پەن قاۋىپسىزدىكتى ساقتاۋدا ماڭىزدى ءرول اتقارا الۋى ءۇشىن ونىڭ قۇرامىندا باسقا ەلدەر، سونىڭ ىشىندە قازاقستان دا بولۋى كەرەك. ءبىزدىڭ وڭىردە ۇيىمعا مۇشە مەملەكەتتەردىڭ ىقپالداستىعىنىڭ جاندانۋى ازياداعى ءوزارا ءىس-قيمىل جانە سەنىم شارالارى جونىندەگى كەڭەستى قۇرلىقتاعى دەلدالدىق پەن بىتىمگەرشىلىككە ۇلەس قوسۋعا قابىلەتتى تولىققاندى حالىقارالىق ۇيىمعا اينالدىرۋدا وڭ ىقپال ەتتى. قازاقستان شانحاي ىنتىماقتاستىق ۇيىمىنىڭ قازىرگى ءتوراعاسى رەتىندە ادىلەتتى الەم مەن كەلىسىمدى جاقتايتىن دۇنيەجۇزىلىك بىرلىك تۋرالى باستاما كوتەردى. ءبىز سىزدەردى وسى يگى ىسكە قوسىلۋعا شاقىرامىز»، - دەدى مەملەكەت باسشىسى.

Voice of America: بايدەن ب ۇ ۇ اياسىندا ورتالىق ازيا ەلدەرىنىڭ 5 پرەزيدەنتىمەن كەزدەستى

19-قىركۇيەك كۇنى Voice of America اگەنتتىگى ا ق ش پرەزيدەنتى دجو بايدەننىڭ ورتالىق ازيانىڭ بەس مەملەكەتى پرەزيدەنتتەرىمەن كەزدەسۋى جايلى ماقالا جاريالادى.

«ا ق ش پرەزيدەنتى دجو بايدەن رەسەي جانە قىتايمەن شەكتەسەتىن ءارى تەڭىزگە شىعاتىن مۇمكىندىگى جوق ورتالىق ازيا ايماعىمەن بايلانىستى نىعايتۋعا ۇمتىلىپ، ۆاشينگتوننىڭ نازارىن وسى وڭىرگە اۋدارىپ وتىر»، - دەپ جازادى باسىلىم.

بايدەن وسىنداي دەڭگەيدە العاش رەت وتكەن C5+1 ديپلوماتيالىق پلاتفورماسىنىڭ بيىلعى وتىرىسىنا «جىلدار بويعى تىعىز قارىم-قاتىناسقا نەگىزدەلگەن تاريحي ءسات» دەپ باعا بەردى.

The Hill: «ب ۇ ۇ ادامزاتتىڭ جاقىن اراداعى عانا ەمەس، تۇتاس عاسىرلىق بولاشاعىن ايقىنداۋعا باسا ءمان بەرۋى كەرەك»

19 قىركۇيەكتە امەريكالىق The Hill باسىلىمى قر پرەزيدەنتى قاسىم-جومارت توقايەۆتىڭ «ب ۇ ۇ باس اسسامبلەياسى ادامزاتتىڭ جاقىن اراداعى عانا ەمەس، تۇتاس عاسىرلىق بولاشاعىن ايقىنداۋعا باسا ءمان بەرۋى كەرەك» دەگەن ماقالاسىن جاريالادى.

ماتەريالدا كليماتتىڭ وزگەرۋى، جاساندى ينتەللەكت سياقتى سالالار رەزونانس تۋدىراتىنى جازىلعان. سونداي-اق سوڭعى جىلدارداعى تاجىريبە كورسەتكەندەي، قاۋىپ- قاتەرلەرگە دايىن ەمەس ەكەنىمىزگە دە توقتالعان. وعان پاندەميا ايقىن مىسال ەكەنىن اتاپ وتكەن.

«ءبىز بىرىككەن ۇلتتار ۇيىمىنىڭ بيولوگيالىق قاۋىپسىزدىك اگەنتتىگىن قۇرۋ قاجەت دەپ سانايمىز. بۇل قۇرىلىم الەم قاۋىمداستىعىنىڭ الداعى ۋاقىتتا پايدا بولۋى ىقتيمال پاندەميامەن ءتيىمدى كۇرەسۋىنە مۇمكىندىك بەرەدى. سونىمەن بىرگە ءبىز جاھاندىق سۋ جانە ازىق- تۇلىك قاۋىپسىزدىگى ماسەلەسىن اشىق كوتەرىپ كەلەمىز. ۋران، ليتيي، سيرەك كەزدەسەتىن مەتالدار جانە باسقا دا ماڭىزدى پايدالى قازبالاردى يگەرۋدىڭ ءتيىمدى تاسىلدەرىن ىزدەستىرۋ ارقىلى بولاشاقتىڭ ەكونوميكاسىن قالىپتاستىرۋ ءۇشىن حالىقارالىق سەرىكتەستەرمەن تىزە قوسىپ جۇمىس ىستەي بەرەمىز»، - دەپ جازادى پرەزيدەنت.

Anadolu Agency: ا ق ش پرەزيدەنتى نيۋ-يوركتە ورتالىق ازيا ەلدەرىنىڭ باسشىلارىمەن سامميت وتكىزىپ جاتىر

20-قىركۇيەكتە تۇركيالىق Anadolu Agency اگەنتتىگى ا ق ش-تا ورتالىق ازياداعى بەس ەلدىڭ پرەزيدەنتتەرى س5+1 ديالوگ فورماتى اياسىندا ا ق ش باسشىسىمەن كەزدەسكەنى جونىندە ماتەريال جاريالادى.

س5+1 كەزدەسۋىنە قازاقستان پرەزيدەنتى قاسىم-جومارت توقايەۆ، قىرعىزستان باسشىسى سادىر جاپاروۆ، تاجىكستان پرەزيدەنتى ەمومالي راحمون، تۇركىمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيەيەۆ قاتىستى. سامميت ب ۇ ۇ باس اسسامبلەياسىنىڭ 78-سەسسياسى اياسىندا ءوتتى.

«مەنىڭ ويىمشا، بۇل - تاريحي ءسات. ءبىز ورتالىق ازيا مەن امەريكا قۇراما شتاتتارى اراسىنداعى ەگەمەندىك، تاۋەلسىزدىك، اۋماقتىق تۇتاستىقتى قولداۋعا نەگىزدەلگەن كوپ جىلدىق ىنتىماقتاستىعىمىزدى دامىتىپ جاتىرمىز»، - دەدى بايدەن كەزدەسۋ قورىتىندىسى بويىنشا.

باسىلىمنىڭ حابارلاۋىنشا، دجو بايدەن امەريكا قۇراما شتاتتارى مەن ورتالىق ازيا ەلدەرى اراسىنداعى ىنتىماقتاستىق جاڭا دەڭگەيگە كوتەرىلگەنىن اتاپ وتكەن. سونداي-اق ا ق ش باسشىسى وڭىردەگى قاۋىپسىزدىكتى قارجىلاندىرۋ، تەرروريزممەن كۇرەس، ەكونوميكا، ەنەرگەتيكالىق قاۋىپسىزدىك، لوگيستيكا جانە مۇگەدەكتىگى بار جاندار قۇقىعى سياقتى ءبىرقاتار سالادا ىقپالداستىقتى نىعايتۋعا نيەتتى ەكەنىن ءمالىم ەتتى.

اگەنتتىكتىڭ جازۋىنشا، وسى سامميت ۆاشينگتوننىڭ ورتالىق ازيا ەلدەرىنە دەگەن قىزىعۋشىلىعىنىڭ ارتىپ كەلە جاتقانىن كورسەتىپ وتىر.

Forbes: قازاقستان كۇتپەگەن جەردەن ەۋرو-2024 ىرىكتەۋىندە ەۋروپالىقتاردى تاڭعالدىردى

Forbes باسىلىمى 18-قىركۇيەكتە فۋتبولدان قازاقستان قۇراماسى جايلى ماقالا جاريالاپ، ونىڭ «ەۋرو-2024» تۋرنيرىنە جولداما الۋ مۇمكىندىگىن ساراپتاپ كوردى.

«قازاقستان ءوز تاريحىندا العاش رەت ءىرى حالىقارالىق فۋتبول جارىسىنا جولداما الۋعا مۇمكىندىگى زور. بۇعان دەيىن بۇل ەلدىڭ فۋتبولشىلارى الەم كۋبوگى نەمەسە ەۋروپا چەمپيوناتىنا قاتىسىپ كورگەن جوق. كەلەسى جىلى جازدا گەرمانيادا ەۋروپانىڭ ەڭ مىقتى ۇلتتىق قۇرامالارى ەۋرو-2024 كۋبوگى ءۇشىن تالاسادى. سول كەزدە ولاردىڭ جولىندا كۇتپەگەن قارسىلاس كەزدەسۋى مۇمكىن»، - دەپ جازادى باسىلىم.

Trend News Agency: قازاقستان پارلامەنتى تۇركى ينۆەستيتسيالىق قورىن قۇرۋ تۋرالى كەلىسىمدى راتيفيكاتسيالادى

20-قىركۇيەكتە ازەربايجاندىق Trend اگەنتتىگى قازاقستان پارلامەنتى تۇركى ينۆەستيتسيالىق قورىن قۇرۋ تۋرالى كەلىسىمدى راتيفيكاتسيالاعانىن حابارلادى.

قوردى قۇرۋ باستاماسىن ازەربايجان تۇركى مەملەكەتتەرى ۇيىمىنىڭ 2021 -جىلدىڭ ناۋرىز ايىندا وتكەن بەيرەسمي سامميتىندە ۇسىنعان ەدى.

«زاڭ جوباسىن پالاتانىڭ جالپى وتىرىسىندا تانىستىرعان ۇلتتىق ەكونوميكا ءمينيسترى الىبەك قۋانتىروۆ قازىرگى جاھاندىق گەوساياسي تۇراقسىزدىق جاعدايىندا قازاقستاننىڭ سىرتقى بايلانىستارىن ءارتاراپتاندىرۋ باستى مىندەتتەردىڭ ءبىرى ەكەنىن اتاپ ءوتتى»، - دەپ جازادى باسىلىم.

ونىڭ ايتۋىنشا، تۇركى مەملەكەتتەرى ۇيىمىنىڭ مىندەتى - ەكونوميكانىڭ وزىق سەكتورلارىنا ينۆەستيتسيا تارتۋ ءۇشىن قولايلى جاعداي جاساۋ، جاڭا تەحنولوگيالاردىڭ پايدا بولۋىن جانە ولاردى ەنگىزۋدى ىنتالاندىرۋ. بۇل باعىتتاعى نەگىزگى باسىمدىقتاردىڭ ءبىرى تۇركى ينۆەستيتسيالىق قورىن قۇرۋ بولدى.

Vogue India: كوشپەلى قازاق حالقى قالاي ءومىر ءسۇردى

20 قىركۇيەكتە ءۇندىستاندىق Vogue India جۋرنالىندا كوشپەلى قازاق حالقىنىڭ تۇرمىس سالتى، سالت-ءداستۇرى، ادامدارى جايلى كولەمدى ماتەريال جاريالاندى.

«قازاقستان ورتالىق ازيادا ورنالاسقان دۇنيە جۇزىندەگى تەڭىزگە شىعا المايتىن ەڭ ۇلكەن مەملەكەت.

ەرتەدە قازاقتار كوشپەلى حالىق بولعان، مالمەن كۇن كورىپ، ءبىر جەردەن ەكىنشى جەرگە كوشىپ- قونىپ جۇرگەن. ولار قايىڭنان نەمەسە اعاشتان جاسالعان جانە جىلۋدى ساقتاۋ ءۇشىن كيىزبەن قاپتالعان دوڭگەلەك جىلجىمالى ۇيلەردە - كيىز ۇيلەردە تۇردى. كەڭەس ۇكىمەتى ورناعان سوڭ ولار ءبىر جەرگە قونىستانۋعا ءماجبۇر بولىپ، بىرتە-بىرتە كوشپەلى ءومىر سالتى جويىلدى. 2014 -جىلى قىرعىز جانە قازاق كيىز ۇيلەرىن جاساۋدىڭ ءداستۇرلى تاسىلدەرى مەن داعدىلارى يۋنەسكو-نىڭ ماتەريالدىق ەمەس مۇرالار تىزىمىنە ەندى»، - دەپ جازادى باسىلىم.

نازەركە سۇيىندىك