شەتەلدىك ب ا ق- تاعى قازاقستان: بايدەن قازاقستانعا كەلە مە، گەرمانياعا مۇناي جەتكىزۋ جانە ءۇندىستانعا جاڭا رەيستەر

وسى اپتادا شەتەلدىك ب ا ق بەتتەرىندە ق ر پرەزيدەنتىنىڭ بەرلينگە ساپارى، گەرمانياعا مۇناي جەتكىزۋ كولەمىن ارتتىرۋ ماسەلەسى، مەملەكەت باسشىسىنىڭ نيۋ- يوركتە ب ۇ ۇ باس اسسامبلەياسىنىڭ 78-سەسسياسىنداعى ۇسىنىستارى، الماتى مەن دەلي اراسىندا اشىلاتىن اۋە رەيستەرى، سونىمەن قوسا قاسىم- جومارت توقايەۆتىڭ 1 -قىركۇيەكتەگى جولداۋىنا قاتىستى ماقالالار لەگى جاريالاندى. تولىعىراق قازاقپارات ساراپشىسىنىڭ شولۋىندا.

Reuters: قازاقستان گەرمانياعا مۇناي كولەمىن جەتكىزۋدى ارتتىرۋعا دايىن - پرەزيدەنت

28 -قىركۇيەكتە Reuters اقپارات اگەنتتىگى قازاقستان پرەزيدەنتى قاسىم- جومارت توقايەۆ بەرليندە گەرمانيا كانتسلەرى ولاف شولتسپەن كەزدەسكەنى تۋرالى جازدى.

باسىلىمنىڭ جازۋىنشا، پرەزيدەنت توقايەۆ كەلىسسوزدەردەن كەيىن قازاقستان گەرمانياعا مۇناي كولەمىن جەتكىزۋدى ارتتىرۋعا دايىن ەكەنىن حابارلادى.

قاسىم- جومارت توقايەۆ بيىل قازاقستان گەرمانيانىڭ Schwedt مۇناي وڭدەۋ زاۋىتىنا رەسەيلىك «دوستىق» قۇبىرى ارقىلى 500 مىڭ توننا مۇناي جەتكىزگەنىن ايتتى. پرەزيدەنتتىڭ سوزىنشە، بەرلين رەسەيلىك مۇنايدى ساتىپ الۋدى توقتاتۋ تۋرالى شەشىم قابىلداعاننان كەيىن گەرمانياعا قازاقستان ءوز مۇنايىن ساتا باستاعان.

«گەرمانيالىق دوستارىمىزدىڭ ءوتىنىشى بويىنشا جەتكىزىلەتىن مۇناي كولەمىن ۇلعايتۋعا، ونىڭ ۇزاقمەرزىمدى بولۋىن قامتاماسىز ەتۋگە ەلىمىزدىڭ دايىن ەكەنىن راستادىم»، - دەدى قازاقستان پرەزيدەنتى بريفينگتە.

The Jerusalem Post: ب ۇ ۇ قاۋىپسىزدىك كەڭەسىنە «ورتا دەرجاۆالاردى» قابىلداۋ پروگرەسكە جول اشار ەدى - پىكىر

28 -قىركۇيەكتە يزرايلدىك The Jerusalem Post باسىلىمىندا ب ۇ ۇ باس اسسامبلەياسىنىڭ 78-سەسسياسىندا ق ر پرەزيدەنتى قاسىم- جومارت توقايەۆتىڭ ۇيىمنىڭ قاۋىپسىزدىك كەڭەسى جۇمىسىن مودەرنيزاتسيالاۋعا قاتىستى ۇسىنىسى توڭىرەگىندە ماتەريال جارىق كوردى.

«گەوساياسي لاندشافتىڭ وزگەرۋى جانە جاھاندىق پروبلەمالاردىڭ شيەلەنىسىپ تۇرعان شاعىندا بىرىككەن ۇلتتار ۇيىمى قاۋىپسىزدىك كەڭەسىنىڭ ءرولى ارتىپ وتىر. دەگەنمەن ونىڭ قۇرامى ەكىنشى دۇنيەجۇزىلىك سوعىستان بەرى وزگەرىسسىز قالىپ وتىر، بۇنىڭ قازىرگى زامانعا سايكەس كەلمەيتىنى ايتىلىپ، سىنعا كوپ ۇشىراپ جاتىر. قاۋىپسىزدىك كەڭەسىنە رەفورما جاساۋ تۋرالى ۇسىنىستار اسىرەسە بيىلعى ب ۇ ۇ باس اسسامبلەياسىندا كوپ ايتىلدى. ماسەلەن، قازاقستان پرەزيدەنتى قاسىم- جومارت توقايەۆ قاۋىپسىزدىك كەڭەسىن رەفورمالاۋ كەرەگىن ايتتى»، - دەپ جازادى باسىلىم.

كەڭەستىڭ جاھاندىق پروبلەمالار مەن قاقتىعىستاردى شەشە الماي وتىرعانىن العا تارتا وتىرىپ، توقايەۆ ب ۇ ۇ قاۋىپسىزدىك كەڭەسى بەيبىتشىلىك پەن قاۋىپسىزدىكتى ساقتاۋدا ماڭىزدى ءرول اتقارا الۋى ءۇشىن ونىڭ قۇرامىندا باسقا ەلدەر، سونىڭ ىشىندە قازاقستان دا بولۋى كەرەك ەكەنىن اتاپ ءوتتى.

«امەريكا قۇراما شتاتتارى، رەسەي جانە ب ۇ ۇ باس حاتشىسى انتونيۋ گۋتەرريش تە كوپجاقتى ينستيتۋتتاردى مودەرنيزاتسيالاۋ جانە قازىرگى الەمنىڭ كەلبەتىن جاقسىراق كورسەتۋ ءۇشىن ب ۇ قاۋىپسىزدىك كەڭەسىن رەفورمالاۋدىڭ قاجەتتىگىن اتاپ كورسەتەدى. بۇل تەك اكادەميالىق تالقىلاۋلاردى عانا ەمەس، سونىمەن قاتار بۇگىنگى كۇردەلى گەوساياسي ورتاعا بەيىمدەلۋدىڭ ناقتى قاجەتتىلىگىن كورسەتىپ وتىر»، - دەپ جازادى ماقالا اۆتورى.

Trend: ا ق ش پرەزيدەنتى دجو بايدەن قازاقستانعا كەلۋى مۇمكىن

29 -قىركۇيەكتە ازەربايجاندىق Trend اگەنتتىگى ا ق ش- تىڭ قازاقستانداعى ەلشىسى دەنيەل روزەنبليۋمگە سىلتەمە جاساپ، ا ق ش پرەزيدەنتى دجو بايدەن قازاقستانعا كەلۋى مۇمكىن دەپ حابارلادى.

باسىلىمنىڭ جازۋىنشا، ەلشى دجو بايدەن قازاقستانعا كەلە مە ول تۋرالى ناقتى اقپاراتى جوق ەكەنىن ايتقان، ءبىراق مۇنداي مۇمكىندىكتى جوققا شىعارۋعا بولمايدى.

«مەن مۇنداي مۇمكىندىك بار ەكەنىن ايتقىم كەلەدى. ا ق ش- تىڭ جوعارى باسشىلىعى قازاقستان مەن ورتالىق ازياعا ۇلكەن قىزىعۋشىلىق تانىتىپ وتىر، سوندىقتان مۇنداي ساپاردىڭ بولىپ قالۋى ابدەن مۇمكىن»، - دەدى ول.

تاۋەلسىزدىك العالى قازاقستانعا امەريكا باسشىلارى كەلگەن جوق.

ەسكە سالايىق، 20 -قىركۇيەكتە نيۋ- يوركتە «س5+1» سامميتى ءوتىپ، وعان ا ق ش پرەزيدەنتى دجو بايدەن مەن ورتالىق ازيا بەس ەلىنىڭ پرەزيدەنتتەرى قاتىسقان ەدى.

Modern Diplomacy: قازاقستان ەكونوميكاسىنىڭ جاڭا باعىتتارى

وسىدان ءبىر اپتا بۇرىن Modern Diplomacy باسىلىمىندا «سامۇرىق- قازىنا» ۇلتتىق ءال- اۋقات قورى» ا ق باسقارما ءتوراعاسى نۇرلان جاقىپوۆتىڭ ق ر پرەزيدەنتى قاسىم- جومارت توقايەۆتىڭ 1 -قىركۇيەكتەگى جولداۋىنا قاتىستى ماقالاسى جاريالاندى.

«قىركۇيەكتىڭ 1- كۇنى قازاقستان پرەزيدەنتى قاسىم- جومارت توقايەۆ ەل دامۋىنىڭ باسىم باعىتتارىن بەلگىلەگەن جولداۋىن جاريالادى. پرەزيدەنتتىڭ ەڭ الدىمەن قازاقستان ەكونوميكاسىنىڭ جاڭا باعىتتارىنا قاتىستى ءسوزى مەملەكەتتىك ورگانداردىڭ، سونىڭ ىشىندە ەلدەگى كۆازيمەملەكەتتىك ورگاندارعا ايتارلىقتاي اسەر ەتەدى»، - دەپ جازادى اگەنتتىك.

اۆتور مەملەكەت باسشىسىنىڭ نەگىزگى ەكونوميكالىق باعىتتارىنا تالداۋ جاسايدى. ونىڭ ىشىندە تاريفتىك ساياساتتى قايتا قاراۋ ماسەلەسىنە، گەولوگيالىق بارلاۋ جۇمىستارىنا، الداعى بەس جىلعا ارنالعان ەنەرگەتيكا سالاسىنداعى ماقساتتار تۋرالى، سونىمەن قوسا كولىك جانە لوگيستيكا سالاسىنا كەڭىرەك توقتالىپ وتكەن.

Caspian News: قازاقستان ازىق- تۇلىك جەتكىزۋشى ايماقتىق حابقا اينالۋعا دايىن - پرەزيدەنت

24 -قىركۇيەكتە Caspian News اقپارات اگەنتتىگى ق ر پرەزيدەنتى قاسىم- جومارت توقايەۆتىڭ نيۋ- يوركتە ب ۇ ۇ باس اسسامبلەياسىنىڭ 78-سەسسياسىندا كوتەرگەن ازىق- تۇلىك قاۋىپسىزدىگى ماسەلەسىنە توقتالىپ وتكەن.

«ءبىز حالىقارالىق قاۋىمداستىقتىڭ ازىق- تۇلىك داعدارىستارىنا توتەپ بەرۋ شارالارىن قارجىلاندىرۋىنا اشىق مونيتورينگ جۇرگىزۋدى بىرلەسىپ قامتاماسىز ەتۋىمىز كەرەك. قازاقستان ازىق- تۇلىك جەتكىزۋشى ايماقتىق حابقا اينالۋعا دايىن. ول ءۇشىن بىزدە بارلىق قاجەتتى رەسۋرس، ينفراقۇرىلىم جانە لوگيستيكا بار»، - دەدى پرەزيدەنت.

باسىلىم قازاقستاننىڭ استىق وندىرۋدەن الەمدە جەتىنشى ورىندا تۇرعانىن اتاپ وتەدى.

«قازاقستاننىڭ شامامەن 202 ميلليون گەكتارىن نەمەسە ەل اۋماعىنىڭ % 74- ىن اۋىل شارۋاشىلىعى جەرلەرى الىپ جاتىر. بۇل اۋىلشارۋاشىلىق القاپتارىنىڭ كولەمى بويىنشا قازاقستاندى الەمدەگى ەڭ ءىرى ەلدەردىڭ بىرىنە اينالدىرىپ وتىر. گەوگرافيالىق ورنالاسۋى مەن كليماتى ءداندى داقىلداردى وسىرۋگە قولايلى جاعداي جاسايدى. قازاقستاننىڭ نەگىزگى استىق وندىرەتىن ايماقتارى - قوستاناي، اقمولا جانە سولتۇستىك قازاقستان وبلىستارى، سونىمەن قاتار شىعىس قازاقستان، اباي وبلىستارى مەن پاۆلودار قالاسىندا دا ءىرى ءوندىرىس جۇمىستارى جۇرگىزىلۋدە»، - دەلىنگەن ماقالادا.

The Travel News Asia: ءۇندىستاندىق IndiGo اۋە كومپانياسى دەلي مەن الماتى اراسىندا رەيستەر اشپاقشى

25 -قىركۇيەكتە The Travel News Asia اگەنتتىگى ءۇندىستاندىق IndiGo Airlines اۋە كومپانياسى دەلي مەن الماتى اراسىندا اۋە رەيستەرىن اشقانىن حابارلادى. اتالمىش اۋە كومپانياسى وسى باعىت بويىنشا اپتاسىنا ءۇش رەت: دەليدەن سەيسەنبى، بەيسەنبى جانە سەنبى كۇندەرى، الماتىدان سارسەنبى، جۇما جانە جەكسەنبى كۇندەرى رەيستەر ورىندايدى.

«6E 1801 رەيسى دەليدەن وسى كۇندەرى ساعات 20:50-دە ۇشىپ شىعىپ، كەلەسى كۇنى 01:05-تە الماتىعا جەتەدى. ال كەرى باعىتتاعى رەيس 6E 1802 الماتىدان ساعات 02:05-تە ۇشىپ، دەليگە 05:10-دا جەتەدى»، - دەپ جازادى باسىلىم.

«ءبىز دەليدەن الماتىعا (قازاقستان) رەيستەردى اشۋعا قۋانىشتىمىز»، - دەدى IndiGo كومپانياسى ساتۋ ءبولىمىنىڭ باسشىسى ۆيناي مالحوترا. «الماتى - قازاقستاننىڭ ءىرى ساۋدا، قارجى جانە مادەني ورتالىعى، سونىمەن قاتار ەلدەگى حالقى ەڭ كوپ شوعىرلانعان جانە كوسموپوليت قالا. بۇل جاڭا باعىتتىڭ ىسكە قوسىلۋى كەڭەيىپ جاتقان حالىقارالىق جەلىمىزدى ودان ارمەن نىعايتادى، ەڭ باستىسى، ورتالىق ازيامەن بايلانىسىمىزدى ارتتىرادى».

اۆتور

نازەركە سۇيىندىك