شەتەلدەگى زاڭدى جۇمىس: وڭتۇستىك كورەيا قانداي تالاپتاردى قويىپ وتىر

استانا. KAZINFORM – ق ر ەڭبەك جانە حالىقتى الەۋمەتتىك قورعاۋ مينيسترىلىگى وڭتۇستىك كورەيادا قازاقستان ازاماتتارىنىڭ زاڭدى جۇمىس ىستەۋى ءۇشىن قانداي ءىس-شارالار اتقارىلىپ جاتقانى تۇسىنىك بەردى.

«مينيسترلىك كورەيا رەسپۋبليكاسىندا قازاقستاندىق جۇمىسشىلاردىڭ قۇقىقتارىن قورعاۋ اياسىندا قازاقستاندى كورەيا رەسپۋبليكاسىنداعى Employment Permit System (EPS) جۇيەسىنە ەنگىزۋ جۇمىستارى اتقارىلىپ جاتىر. EPS جۇيەسى ءوز جۇمىسىن 2004 -جىلدىڭ 1-تامىزىندا باستادى جانە قازىرگە دەيىن بۇل جۇيە بويىنشا 16 ەلدىڭ ازاماتى وڭتۇستىك كورەيادا جۇمىس ىستەي الادى»، - دەلىنگەن ەڭبەك مينيسترلىگىنىڭ Kazinform اگەنتتىگىنە بەرگەن جاۋابىندا.

ايتا كەتەيىك، بۇل جۇيەدەگى جۇمىس قىزمەت كورسەتۋ، ءوندىرىس، قۇرىلىس، اۋىل شارۋاشىلىعى جانە بالىق اۋلاۋ سالالارىندا ۇسىنىلادى. EPS جۇيەسى شەتەلدىككە وڭتۇستىك كورەيادا 3 جىلعا دەيىن جۇمىس ىستەۋگە مۇمكىندىك بەرەدى، سونداي- اق جۇمىسشىلارمەن كەلىسىمشارت ۇزارتىلۋى مۇمكىن. بۇل ءوز كەزەگىندە ازاماتتارعا وسى ەلدە 4 جىل 10 ايعا دەيىن تۇرۋعا مۇمكىندىك بەرەدى. EPS جۇيەسىنە قاتىسۋ ءۇشىن كورەيا جاعى EPS دايىندىق ورتالىقتارىنا بارۋدى تالاپ ەتەدى. بۇل ورتالىقتاردا وڭتۇستىك كورەيادا جۇمىسقا ورنالاسقىسى كەلەتىندەر ءتىلدى ۇيرەنۋ كۋرستارىنان، كوشى-قون جانە مەديتسينالىق ماسەلەلەرگە قاتىستى تەستىلەۋدەن وتەدى.

«قازاقستان ازاماتتارى مەديتسينالىق تەكسەرۋدەن، ءتىلدى مەڭگەرۋ وقۋىنان جانە كوشپەلى دايارلىقتان ءوتۋى ءۇشىن كورەيا رەسپۋبليكاسى الماتى جانە الماتى وبلىسىنىڭ قونايەۆ قالالارىندا EPS ورتالىعىن اشۋعا كەلىسىمىن بەردى»، - دەپ اتالىپ وتكەن مينيسترلىك اقپاراتىندا.

كورەيا رەسپۋبليكاسىنىڭ زاڭناماسىنا سايكەس، شەتەلدى وڭتۇستىك كورەيانىڭ EPS جۇيەسىنە قوسۋ ماسەلەسى ءۇش كەزەڭدە جۇزەگە اسىرىلادى: - مەملەكەتىشىلىك كەلىسۋ؛

- EPS ورتالىعىن اشۋعا ارنالعان وبەكتىلەرمەن تانىسۋ؛

- كورەيا رەسپۋبليكاسىنىڭ ۆەدومستۆوارالىق كوميسسياسىندا قازاقستاندى EPS جۇيەسىنە قوسۋ تۋرالى تۇپكىلىكتى شەشىم قابىلداۋ.

قازىرگى كەزدە ەلدى EPS جۇيەسىنە قوسۋ ماسەلەسى كورەيا رەسپۋبليكاسىنىڭ جاۋاپتى مەملەكەتتىك ورگاندارىمەن مەملەكەتىشىلىك كەلىسۋ ساتىسىندا تۇر. كورەي تاراپى قازاقستاندى EPS جۇيەسىنە قوسۋ ءۇشىن ءتيىستى ءۇش شارتتى قويدى. بىرىنشىدەن، كورەيا رەسپۋبليكاسىنىڭ كوشى- قون زاڭناماسىن بۇزۋعا جول بەرمەۋ جونىندەگى مىندەتتەمەنى قابىلداۋ كەرەك. ەكىنشىدەن، قازاقستاننىڭ كورەيا رەسپۋبليكاسىنداعى ەلشىلىگى جانىنداعى «ەڭبەك كوشى-قونى جونىندەگى اتتاشە» جەكە لاۋازىمىن ەنگىزۋ قاجەت. ۇشىنشىدەن، بۇرىن وڭتۇستىك كورەيادا زاڭسىز بولعان جانە كوشى-قون زاڭناماسىن بۇزعان قازاقستان ازاماتتارىنىڭ كورەيا رەسپۋبليكاسىنا قايتا كەلمەۋى جونىندە شارالار قابىلداۋ.

بۇل تۇرعىدا وسى تالاپتاردى ق ر ەڭبەك جانە حالىقتى الەۋمەتتىك قورعاۋ مينيسترىلىگى ءتيىستى مەملەكەتتىك ورگاندارمەن بىرلەسىپ پىسىقتاپ جاتىر.

وسىعان دەيىن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا وڭتۇستىك كورەيادا 15 مىڭ قازاقستان ازاماتى زاڭسىز جۇرگەنىن ايتقان ەدى.