شەتەلدەگى ازاماتتارىمىزدىڭ داۋىس بەرۋى جوعارى بەلسەندىلىكپەن ءوتىپ جاتىر – س ءى م

استانا. KAZINFORM - سىرتقى ىستەر ءمينيسترىنىڭ ورىنباسارى رومان ۆاسيلەنكو ورتالىق رەفەرەندۋم كوميسسياسىندا وتكەن بريفينگىدە شەتەلدەگى قازاقستاندىقتاردىڭ رەفەرەندۋمدا بەلسەندى داۋىس بەرىپ جاتقانىن ايتتى.

«ازاماتتارىمىزدىڭ كونستيتۋتسيالىق قۇقىقتارىن قامتاماسىز ەتۋ ءۇشىن قازاقستاننىڭ شەت ەلدەردەگى مەكەمەلەرى جانىنان 59 مەملەكەتتە 74 ۋچاسكەلىك رەفەرەندۋم كوميسسياسى قۇرىلعان بولاتىن. داۋىس بەرەتىن سايلاۋشىلاردىڭ جالپى سانى - 12307. ساعات 8.15 تەگى جاعداي بويىنشا، شەتەلدە 26 ۋچاسكەلىك رەفەرەندۋم كوميسسياسى جۇمىسىن باستادى. 48 ۋچاسكەنىڭ اشىلۋى كۇتىلۋدە. جاقىن ارادا ورتا شىعىس جانە ەۋروپا ەلدەرىندە ورنالاسقان ۋچاسكەلەر ءوز جۇمىسىن باستايدى»، - دەدى ول.

ۆيتسە- مينيستر شەتەلدەگى رەفەرەندۋم ۋچاسكەلەرىنىڭ ىشىندە ەڭ سوڭعى بولىپ ا ق ش- تىڭ سان- فرانسيسكو قالاسنىداعى ۋچاسكە اشىلاتىنىن ايتتى.

«جالپى شەتەلدەگى ازاماتتارىمىزدىڭ داۋىس بەرۋ ءۇردىسى جوعارى بەلسەندىلىكپەن ءوتىپ جاتقانىن بايقاپ وتىرمىز. ۋاقىت ايىرماشىلىعىنا بايلانىستى سوڭعى بولىپ استانا ۋاقىتىمەن ساعات 16.00 دە ۆاشينگتون، نيۋ-يورك، وتتاۆا قالالارىنداعى جانە استانا ۋاقىتىمەن ساعات 20.00 دە سان فرانسيسكو قالاسىنداعى رەفەرەندۋم ۋچاسكەلەرى جۇمىسىن باستايدى»، - دەدى رومان ۆاسيلەنكو.

ەسكە سالايىق، بۇگىن قازاقستاندىقتار اتوم ەلەكتر ستانسياسىن سالۋ ماسەلەسى بويىنشا جالپى ۇلتتىق رەفەرەندۋمدا داۋىس بەرەدى.

رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى: ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە؟ داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى: «ءيا، كەلىسەمىن» نەمەسە، «جوق، كەلىسپەيمىن».

وزدەرىنىڭ كونستيتۋتسيالىق قۇقىعىن كورەيا رەسپۋبليكاسىنداعى قازاقستان ازاماتتارى العاشقىلاردىڭ ءبىرى بولىپ جۇزەگە اسىردى.

1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمدا داۋىس بەرۋگە حاقىلى.

اۆتور

ەسىمجان ناقتىباي